Аан дойду таһымнаах акселератор үлэтин саҕалаата

Саха сирин “Б8” акселератора видео оонньуу бырайыактарын түргэнник олоххо киллэрэр сыалтан Казахстан оҥорон таһаарааччыларын кытта биир балаһааккаҕа үлэлээн эрэр.
Ол курдук, быйыл муус устар ыйга Казахстаҥҥа Саха Өрөспүүбүлүкэтин күннэрин кэмигэр Саха сирин Б8 акселератора уонна Казахстан Omnium киинэ оонньуу эйгэтигэр кыттыгас бырайыактары олоххо киллэриигэ меморандум баттаспыттара.
Ол чэрчитинэн ыытыллар акселератор сүрүн партнердарынан Саха сириттэн аан дойдуга тахсыбыт Mytona хампаанньа уонна Ykt.Ru буоллулар.

Бырайыакка кыттарга 35 сайаапка киирбититтэн, сүүмэрдээһини 12 хамаанда ааспыт. Ол курдук, Саха сириттэн: Cryolite Games хамаанда – HAAR, «Архитектура Реальности» – «Хара Мыраан», Quaternion Games – Way to Valhalla, Kirpiche– Darkhan, And some Teriyaki – Б.О.О.Т. Р. (Боевой Отряд Особого Тактического Реагирования), Skyones Team.Deadlost оонньуулара киирбиттэр.
Оттон Казахстантан Stygian Games хамаанда – Arcane Path, Lithium Games – Underground, Some Games – Let’s Beer Together, Not Friendly Games – Untold Tales: A Scarlet Way,  «Сансоло» – Alien Planet Survivor, Daetern Games хамаанда Red Light: Escape from the Past бырайыактара кытталлар.
Кинилэр аҕыс нэдиэлэ устата видео оонньууну оҥоруу менеджменигэр, нейроситими туһаныыга, бэйэлэрин оонньууларын презентациялыырга үөрэниэхтэрэ. Оттон бырайыактары көмүскүүр демо-күн ахсынньы ыйга Астана куоракка былааннанар. Кыайыылаахтары харчынан бириэмийэлэр уонна оонньууларын аан дойду ырыынагар таһаарыыга өйөбүл күүтэр.

Санатар буоллахха, тэрийээччилэринэн СӨ Инновациялары сайыннарыыга пуондата, «Якутия» венчурнай хампаанньа, «Якутск» ИТ паарка уонна Казахстан Omnium интерактивнай технологияларга уонна үөрэх бырагыраамаларыгар киинэ буолаллар.
«Оонньуу индустриятыгар саамай уустуга – старт. Онон акселераторга кыттыы геймдев-хампаанньаларга улахан кыаҕы биэрэр. Акселератор кэмигэр кинилэри кытта аан дойду бөдөҥ хампаанньаларыттан экспертэр үлэлэһиэхтэрэ. Оттон оонньууну айааччылар бэйэлэрин бырайыактарыгар инвестордар болҕомтолорун тардыахтарын сөп», – диэн иһитиннэрэр Б8 акселератор бырагыраамаҕа дириэктэрдэриттэн биирдэстэрэ Петр Гоголев.
Сэтинньэ 12 күнүгэр Дьокуускайга «Цифровой Алмаз» III-с федеральнай форумҥа кыттааччылар бэйэлэрин бырайыактарын бастакы билиһиннэриини оҥоруохтара, диэн иһитиннэрэр СӨ инновацияҕа министиэристибэтэ. 
Санатан эттэххэ, «Б8» акселератор саҕаланыаҕыттан 100-тэн тахса араас хабааннаах стартап тахсыбыта. Тэрийээччилэр бэлиэтииллэринэн, хамаандалар сыл аайы күүһүрэн, бырайыактар хаачыстыбалара үрдээн иһэр. Ол туһунан https://kiinkuorat.ru/articles/sonun-tolkuydaahhyn-b8-akseleratorga-kytyn билсиэххэ сөп.