Сонун толкуйдааххын? «Б8» акселераторга кытын!

Кыттааччылар акселератор чэрчитинэн үс ыйдаах үөрэҕи ааһаллар, ментор (настаабынньык) өйөбүлүн ылаллар, ону тэҥэ бырайыак оҥоһуллар кэмигэр инфраструктурнай, юридическай уонна үп-харчы өттүнэн тирэхтэнэллэр.

Виолетта Никитина, 8-с «Б8» кыайыылааҕа, «Под присмотром» сыһыарыы ааптара:

— Биһиги бырайыакпыт акселератор кэмигэр «IOS” уонна “Android” балаһааккаларга сыһыарыы буолан, алтынньы ыйга таҥыллан тахсыбыта. Акселератор биһиги килийиэннэрбитин буларга көмөлөспүтэ. Бүгүҥҥү туругунан сыһыарыыга 9 700-тэн тахса киһи баар. Нэдиэлэ ахсын араас тургутуулары ыыппыт буоламмыт, бырайыакпыт билигин силигэ ситэн турар, онно акселератор быһаччы көмөлөөх. Акселератор түмүгүнэн сыһыарыыбыт тэхиньиичэскэй сорудаҕын оҥорбуппут. Онон Арассыыйа уонна тас дойду ырыынагар тахсар кыахтанныбыт.

Александр Федотов, «Рерад» ХЭТ салайааччыта, 7-с «Б8» кыайыылааҕа:

— Биһиги бырайыакпыт – искусственнай нейроннай ситимнэри туһанан, сүрэҕи-тымыры рентгент хаартыскаларыгар ырытан көрүү.  «Б8» акселераторга кыттаммыт элбэх билиини ылбыппыт. Бырайыакпыт быдан сайынна, итиэннэ инвестициялары тардар уонна бородууксуйаны салгыы оҥорор кыахтанныбыт.

Василий Бочуров, «Аркон» ХЭТ көҕүлээччитэ, 7-с «Б8»  кыайыылааҕа:

— «Б8» акселераторга ирбэт тоҥ усулуобуйатыгар дьиэни бырайыактааһыҥҥа кыттан, билиибитин дириҥэттибит. Түмүккэ бүгүн биһиэхэ атын регионнартан кытта килийиэннэр кэллилэр.

Иккис курдук үрдүк квалификациялаах ментордары кытта үлэлээһини ааттыам этэ. Акселератор кэмигэр атын стартаптары кытта доҕордоспуппут, билигин туох баар ыытыллар тэрээһиннэргэ көхтөөхтүк кыттабыт, сүбэ-ама бэрсэбит, сибээспитин быспаппыт.

«Б8» акселератор 10-с төгүлүн ыытыллар бырагырааматыгар  сайаапкалары балаҕан ыйын 20 күнүгэр диэри b8accelerator.com. саайка туталлар.

Санатан эттэххэ, «Б8» акселератор саҕаланыаҕыттан 100-тэн тахса араас хабааннаах стартап оҥоһуллубут. Уопсайа 54 бырайыакка 89 мөл. солк. тахса суумалаах үп көрүллүбүт. Тэрийээччилэр бэлиэтииллэринэн, хамаандалар сыл аайы күүһүрэн, бырайыактар хаачыстыбалара үрдээн иһэр.