«Звезднай» түөлбэ сабыылаах катогун тутуу 80% бэлэм

Тутуу министиэристибэтигэр иһитиннэрэллэринэн, киин куорат саҥа «Звезднай» түөлбэтигэр тутуллар сабыылаах катогу тутуу 80% бэлэм.

Бүгүҥҥү күҥҥэ манна түннүк туруоруута, уу, уот ситимнэрин тардыы, билиитэ, муоста ууруута курдук ис үлэлэр хаалан тураллар. 

Санатар буоллахха, 2023 сыл сааһыттан «Звезднай» түөлбэҕэ «Демография» национальнай бырайыак «Спорт – олох нуормата» хайысхатынан сабыылаах каток тутулла турар. Каток хоккейдыыр, керлининэн дьарыктанар саалалардаах, таҥас уларыттар, сынньанар, душтанар хостордоох буолар. Сынньанар блокка быраас кабинета, физиоэмтэнии, ванна, массаж хосторо баар буолуохтара. Административнай блок судьуйаларга, суруналыыстарга аналлаах хостортон, тренер, инструктор кабинеттарыттан, тренажернай саалаттан турар.
Катокка симиэнэҕэ 50 киһи хаҥкылыан сөп, 210 көрөөччү миэстэлээх.
«Спорт – олох нуормата» бырайыагынан Саха сиригэр өссө биир эбийиэк олоххо киирэн эрэр. Бүлүү оройуонун Кыһыл Сыыр бөһүөлэгэр тутуллар спорт саалата 73 %. бэлэм.

Маны сэргэ Бороҕон, Мэҥэ Хаҥалас өрөспүүбүлүкэтээҕи олимпийскай эрэл оскуолалара спорт тэрилинэн хааччылыннылар. 2024 сылга ити курдук бырайыагы олоххо киллэриигэ 585 817,55 тыһ. солк. туһаҕа таҕыста, ол иһигэр: федеральнай бүддьүөттэн – 6 632,60 тыһ. солк., өрөспүүбүлүкэ бүддьүөтүттэн – 579 184,95 тыһ. солк.
Ыытыллар үлэ үтүө түмүгүнэн бүгүҥҥү күҥҥэ Саха Өрөспүүбүлүкэтигэр 3-тэн 79-гар диэри саастаах нэһилиэнньэ спордунан уонна физическэй култууранан дьарыктанар араҥатын иэнэ 57,5 % тиийэ үрдээбитэ буолар (2023 – 55%), диэн иһитиннэрэр Ил Дархан уонна Бырабыыталыстыба пресс-сулууспата.