Сэтинньи 7 күнүгэр диэри пассажирдары тиэйиигэ муниципальнай куонкурус буола турар

«Куораттааҕы суол-тырааныспар сулууспата» МХТ салайааччыта Эдуард Садовников «Киин куорат» хаһыакка интервьютугар кыһыҥҥы өттүгэр Дьокуускай куорат уопсастыбаннай тырааныспарын өҥөтүнэн күннэтэ 100-түү тыһыынча киһи туһанар диэн турар.
Кыһыммыт кэллэ. Онон биһиги курдук тыйыс тымныылаах куоракка оптуобус сырыыта үгэс курдук тыын кыһалҕаҕа кубулуйара баар суол. Салалта даҕаны, бу кыһалҕаны иһиттэн билэрин, хас да сыллаах чинчийиини, үөрэтэн көрүүнү ыыппытынан даҕаны, уулуссалар өрөмүөннэрин бүтэртэрэ охсон, куорат бары түөлбэлэрин оптуобус сырыытынан хааччыйарга сүҥкэн болҕомтону уурар. Ол курдук, бу күннэргэ, Чернышевскай уулуссатын Кольцевой эргииртэн Михаил Николаев проспегар диэри кэрчигэр суол өрөмүөнэ түмүктэммитинэн, 1, 11, 18 №№-дээх оптуобустар сырыылара арыллыбыта. 
Маршруттарга сүүрэр массыыналар ис-тас көстүүлэрэ, аудио-информатор, видео-фиксация курдук туһааннаах тэхиньиичэскэй тэрилинэн хааччыллыылара эмиэ нэһилиэнньэҕэ табыгастаах усулуобуйаны тэрийии быһыытынан куорат  салалтатын болҕомтотун киинигэр турар. Ол курдук, Суол-тырааныспар сулууспата маннык хабааннаах бэрэбиэркэлэри тиһигин быспакка ыытар. Бу күннэргэ сулууспа салайааччыта Эдуард Садовников уонна «СоюзАвто» чааһынай тиэйээччилэр тэрилтэлэрин салайааччыта Андрей Косицкай куорат маршруттарын салайааччыларын кытта кыстыкка бэлэмнэнии туругун туһунан кэпсэттилэр.
Маны сэргэ, 2018 сылга түһэрсиллибит чааһынай тиэйээччилэри кытта муниципальнай хантараактар болдьохторо 2024 сыл сэтинньи 30 күнүгэр бүтэринэн, алтынньы 22 - сэтинньи 7 күннэригэр «Куораттааҕы суол-тырааныспар сулууспата» МХТ Дьокуускай куорат территориятыгар пассажирдары тиэйэр быраабы ыларга аһаҕас куонкуруһу ыытар.
Куонкурус 5 лотка ыытыллар. Биир лот үс маршруту хабар. Бу үс маршрут барыстаах, орто барыстаах, барыһа суох диэҥҥэ арахсар. Маны кытта маршруттар уһуннара, төһө тиэхиньикэлээхтэрэ, төһө киһи туһанара барыта учуоттанан таҥыллыбыт. 
Куонкурус туһунан сиһилии Олохтоох дьаһалта официальнай саайтыгар «торги» салааҕа билсиэххэ сөп: https://yakutskcity.ru/administration/torgi/152620/.
Ылыллар дьаһаллар пассажирдарга даҕаны, тиэйээччилэргэ даҕаны табыгастаах усулуобуйаны тэрийэллэригэр эрэнэбит, диэн иһитиннэрэр Суол-тырааныспар сулууспата.