09.04.2022 | 16:00

Санкцияларга бэриммэт бизнесменнэр

Санкцияларга бэриммэт бизнесменнэр
Ааптар: Розалия Томская
Бөлөххө киир

Билигин дойдубутугар тыҥааһыннаах күннэр-дьыллар тураллар, аан дойду барыта кэриэтэ Арассыыйаҕа санкциялары биллэрэн, дойдубут экономическай балаһыанньатыгар ыарахаттар үөскээтилэр. Маныаха биһиэхэ бэйэ оҥорон таһаарыыта күүскэ сайдыахтаах. Оттон бэйэ оҥорон таһаарыытын  биир сүрүн күүһэ - дьоҕус предпринимательствоҕа.
Санкциялар биллэриллибиттэригэр ким эрэ саахар, гречка хаһааммыт, үлэтин сүтэрэриттэн куттаммыт эбит буоллаҕына, ураты толкууйдаах, атын олоруулаах мэйиилээх дьон, предпринимателлэр, санааларын түһэрбэттэр.

Минньигэс сыттаах чүмэчилэр

Екатерина Шарапова 10 саастаах Элла диэн кыыһынаан бэйэ дьыалатын былырыын саҕалаабыттар. Кинилэр натуральнай воскаттан дьиэ интерьеригэр туттуллар чүмэчилэри оҥорон барбыттар, устунан ылсыбыт дьарыктарын сөбүлээн, бизнес-бырайыакка кубулуппуттар.

«Ella Candle Co» маҕаһыыҥҥа араас дьэрэкээн быһыылаах-таһаалаах, дьиэ сытын тупсарар чүмэчилэр атыыланаллар. Ону тэҥэ киһи бэйэтэ чүмэчи оҥостор набордара атыыга бааллар.

Интерьер чүмэчитин оҥорорго премиальнай хаачыстыбалаах арома-арыылар туттуллаллар. "Сүрүн болҕомтобутун хаачыстыбаҕа уурабыт, ол иһин билиҥҥитэ поставщиктарбытын уларытар былааммыт суох",-  диир Екатерина. Предприниматель кэпсээбитинэн, билиҥҥи экономическай балаһыанньаҕа олоҕуран, поставщиктар матырыйааллар сыаналарын үрдэтэн эрэллэр. Ол эрэн ийэ уонна кыыс санааларын түһэрбэттэр, бизнестэрин сайыннарар былааннары оҥостоллор. Муус устарга дылы урукку сыаналарын тута сатаабыттар, билигин сайдыы саҥа суолларын тобулаллар, блогердар көмөлөрүнэн табаардарын рекламалыыллар. 

 

 Идэтийбит кристаллайзер кэрэ оҥоһуктара

Предприниматель Изабелла Павлова сэлии муоһун, үрүҥ көмүһү, таҥаһы, кристаллары, тириини туһанан дьахтар киэргэлин оҥорон атыылыыр. Бастаан хобби быһыытынан саҕалаабыт дьыалата дохуот киллэрэр бизнес буола үүммүт.

Изабелла кристаллайзер идэтин баһылаабытын туоһулуур сертификаттаах, кристалларынан ханнык баҕарар оҥоһуктары инкрустациялыыр кыахтаах (таҥаһы-сабы, иһити-хомуоһу), натуральнай таастарынан уонна оҕуруоттан киэргэллэри оҥорор.

2020, 2021 сылларга кини оҥорбут киэргэллэрэ «Arctic fashion show» муода бэстибээлигэр кыттыбыттара. Санкциялар биллэриллибит кэмнэригэр, бэйэ дьыалатын салайар кэрэ аҥаар бизнеһин Вконтакте уонна Telegram социальнай ситимнэргэ күүскэ киллэрэн эрэр, итиэннэ ырыынагы сиһилии үөрэтэргэ кыһаллар.

Мас оонньууттан бизнескэ

«МасИгра» мастарыскыай-устуудьуйа экологичнай матырыйаалтан остуол оонньууларын уонна головоломкалары оҥорон таһаарар. Билиҥҥитэ уонтан тахса араас оонньууну толкуйдаабыттар.

Кэскил Прудецкай остуол оонньуутунан 2017 сыллаахтан дьарыктанан саҕалаабыт, бастаан бэйэтин оҕолоругар оҥортообут. Онтон кэргэнэ Светлана докумуонугар ылсан, дьиэ кэргэн бизнеһин тэриммиттэр.

Мастарыскыайга 5 сааһыттан үөһээ саастаах оҕолорго аналлаах оонньуурдары оҥороллор. Билигин “МасИгра” бородууксуйатын оҕо уһуйааннара уонна оскуолалар хото ылан эрэллэр.

Предпринимателлэр матырыйаалбыт сыаната икки төгүл эбилиннэ дииллэр, ол эрэн кинилэр санааларын түһэрбэттэр, Арассыыйа иһигэр атын поставщиктары булар санаалаахтар. Ону таһынан мастан миэбэл уонна дьиэҕэ-уокка туһаныллар араас табаары оҥорон атыыга таһаарар былааннаахтар.

 

Чэпчэки сыаналаах тутуу

«Эко-дом» тутуу СИП-панелларын оҥорор тэрилтэ 2020 сыллаахха Аллараа Бэстээххэ Мэҥэ Хаҥаластааҕы бизнес-инкубатор базатыгар арыллыбыта.

 

Дьиэ тутар мас сыаната бас баттах барбытыгар предприниматель Николай Аржаков СИП-панеллары оҥорон киэҥник атыыга таһаарар санааны ылыммыт. СИП-панель каркаастаан тутууга туттуллар, пенополистирол сылааһы үчүгэйдик тутар матырыйаал буолан дьиэ ичигэс, ол аата оттукка улахан экономия буолар. Маны тэҥэ СИП-панельтан тутуу олус түргэнник барар, сыаната да чэпчэки.

Санкциялар «Эко-дом” үлэтигэр улаханнык охсубатахтар, матырыйааллара барыта Арассыыйа поставщиктарыттан кэлэр эбит. Николай Аржаков этэринэн, саппаастара өссө биир сылга тиийэр баар. Инникитин предприниматель биир этээстээх чааһынай дьиэлэри туттууга табыгастаах “двутавровай баалканы” уонна полистиролбетон блоктары оҥорон таһаарар кэскиллээх былааннаах.

“Эко-дом” биир сүрүн уратыта – тобоҕо суох оҥорон таһаарыы, ол аата пенополистирол тобоҕо бөххө быраҕыллыбат, салҕыы блоктары оҥорууга баран иһэр.

Бэйэ кэтилиэтэ ордук амтаннаах

Майя Егорова – “Майины котлетки” бренд төрүттээччитэ, Дьокуускайга эттэн полуфабрикат оҥорор сыаҕы 2021 сылга арыммыта. Онтон ыла кини кэтилиэтин, тиэптэллэрин сөбүлүүр дьон элбээтэр элбээн иһэр.

Кини этэринэн, билиҥҥи соччото суох экономическай балаһыанньаҕа ыксалынан поставщиктарынан уларытарга уонна логистикатын атыннык тутарга күһэллибит. Саамай сүрүнэ, биһиги атыылаһааччыларбыт интэриэстэрин учуоттаан туран, поставщиктарбытын уларыттыбыт диэн этэр.

Билигин оҥорон таһаарыы ассортименын хаҥаталлар, балыктан оҥоһуллар полуфабрикаттары төннөрөн эмиэ оҥорор буолбуттар. Маны тэҥэ “Майины котлетки” бренд үлэлэһэр маҕаһыыннарын кэҥэтэн эрэр, ол аата Дьокуускай уонна өрөспүүбүлүкэбит араас улуустарыгар бэйэбитигэр оҥоһуллубут эт астары амсайыахпыт.

Сонуннар

Ордук ааҕаллар

Дьикти түбэлтэ
Сынньалаңңа | 01.06.2024 | 17:00
Дьикти түбэлтэ
Уйбаан Уйбаанабыс сураҕа суох сүппүтүн туһунан сурах нэһилиэги биир гына тилийдэ. Сарсыарда олус хойуу сиик түспүт этэ. Ойоҕо халдьаайыттан көрөн турдаҕына, эр киһи алааһы бүтүннүү тарҕаммыт күдэрик тумаҥҥа ынахтарын көрдүү киирбитэ уонна ол кэнниттэн ууга тааһы бырахпыттыы мэлийбитэ... Дьахтар бу киһи туман түспүтүн туһанан арыгыһыт доҕотторун диэки сүүрбүт дии санаан,...
Умнуллубут аспытын сөргүтүөххэ
Тускар туһан | 01.06.2024 | 18:00
Умнуллубут аспытын сөргүтүөххэ
Оскуолалар, уһуйааннар ыһыахтара үгэннээн тураллар. Сотору улахан ыһыахтар кэлиэхтэрэ. Ону кытта сахалыы сандалыбытыгар тугу астыырбытын былаанныыбыт. Үгэс буолбут бүлүүдэлэртэн хал буолбут буоллаххытына, өбүгэлэрбит умнулла быһыытыйбыт астарын сөргүтэргэ ыҥырабыт.   Искэхтээх эбэтэр хааннаах алаадьыэ Алаадьы тиэстэтигэр ханнык баҕарар бөдөҥ балык искэҕин кутан буһардахха, ураты уонна тотоойу бүлүүдэ буоларын билэбит. Оттон сорох хотугу...
Былатыан Эверстов:  «Элбэх дьоҥҥо сонуну кэпсиир кыахтаах буолар — дьол»
Дьон | 06.06.2024 | 10:00
Былатыан Эверстов: «Элбэх дьоҥҥо сонуну кэпсиир кыахтаах буолар — дьол»
Хас сир аайы ураты дьон баар буолар. Кинилэр олохторун хара маҥнайгыттан атыннык олоро сатыыллар. Барыларыгар баар курдук нус-хас дьылҕаҕа дураһыйбаттар. Оннук дьикти киһинэн Дьааҥы улууһугар олорор эрээри, өрөспүүбүлүкэ, дойду, аан дойду үгүс бэлиэ спортивнай түгэннэрин көтүппэккэ хамнаһа суох сырдатар суруналыыс, киэҥ сырыылаах айанньыт, коллекционер, фотограф, спортсмен, норуот тапталын ылбыт Платон...