08.07.2021 | 16:00

Өҥүрүк куйааска абыраллаах утах

Өҥүрүк куйааска абыраллаах утах
Ааптар: Айыына Саввинова
Бөлөххө киир

Умайар уот куйааска үгүс киһи аанньа аһаабат. Сорох дьон кыараҕас кыбартыыраҕа дьиэбит оргуйан хаалар диэн улаханнык астаммат буола сатыыллар. Маннык кэмҥэ смузи диэн доруобуйаҕа туһалаах, битэмииннээх утаҕы оҥостон иһиэххэ сөп.   

Смузи – фруктаттан, отонтон, оҕуруот аһыттан оҥоһуллар хойуу утах.

Аан дойду дьоно клубникаттан, кивиттэн уонна банантан смузины ордороллор. Астыырга бэрт судургу, блендер эрэ наада. Иһиэх эрэ иннинэ бэлэмниир ордук. Холодильникка өр турдаҕына, түгэхтэнэн хаалар диэн биир бэйэм сөбүлээбэппин.

Өҥүрүк куйааска сүрэҕи сөрүүкэтэр. Тотоойу буолан аччыктаабыты абырыыр, күүс-уох эбэр. Аны туран, смузи куртаҕы сынньатар, иһи-үөһү ыраастыыр аналлаах.  

Хойуу уонна тотоойу, ол эрээри үксүн калорийа аҕыйах утаҕы диетаҕа олорор эбэтэр ыйааһын түһэрэ сылдьар дьон сөбүлээн иһэллэр. Кинилэр үүт оннугар йогурт эбэтэр сыата суох кефири эбэллэр. Ол эрээри, төһө да диетаҕа олорбутуҥ иһин, аҥаардас смузинан сылдьыбаккын.

Мантан салгыы судургу ырысыаптары таһаарабыт. Смузита оҥостон иһиҥ!

Клубникаттан, банаантан

Туох наадата:

Банаан – 1 устуука

Клубника – 6-7 устуука

Уу (үүт ордук) – 0, 5 ыстакаан

Дьиҥэр, билигин маҕаһыыҥҥа дыргыл сыттаах клубника дэлэй. Ол эрээри мин үксүн сибиэһэйдии тоҥоруллубут клубниканы ылан кутабын. Сорохтор өссө банааны морозильникка кыратык тоҥоро түһэллэр эбит (хайдаҕын билбит суох). 

Уопсайынан, смузига кутуллар ингредиеннэр холодильникка эбэтэр сөрүүн сиргэ тураллара ордук дии саныыбын. Өҥүрүк куйааска ханнык да мороженайы солбуйар, эбиитин доруобуйаҕа туһалаах. 

Банааны төгүрүктүү эбэтэр кубиктыы быһыҥ. Блендергэ кутуҥ. Үрдүгэр клубниканы уонна ыстакаан аҥаара ууну эбиҥ. Биир кэлим маасса буолуор диэри блендеринэн ытыйыҥ. 

Оҕолор, улахан да дьон олус сөбүлүүллэр. Кырачааннарга саахар кутан минньитэ түһүөххэ сөп.

Моркуоптан, дьаабылыкаттан, апельсинтан

Сарсыардааҥҥы аһылыкка олус үчүгэй. Күн устата эрчимнээх сылдьыаххыт. Ыра сатыыр, хас биирдии бородуукта калорийын ааҕар дьоҥҥо өссө ордук.

Туох наадата:

Моркуоп – 1 устуука

Дьаабылыка – 1 устуука

Апельсин – 2 устуука

Лен сиэмэтэ – 1 ост.ньуоска

Моркуобу сууйабыт, ыраастыыбыт, куубуктуу кырбыыбыт. Дьаабылыканы хахтыыбыт, эмиэ куубуктуу быһабыт. Апельсины аҥаардыыбыт уонна суогун ыгабыт. Ону блендер иһитигэр кутабыт, ыгыллыбыт апельсиммытын бырахпакка, эмиэ угабыт. Моркуобу, дьаабылыканы кутабыт, ньуоска аҥаара лен сиэмэтин табыгынатабыт.

Блендербитин бастаан күүстээх эрэсиимҥэ холбуубут, онтон бытааҥҥа көһөрөбүт. Смузибытын ыстакааннарга эбэтэр бокалларга кутабыт уонна үрдүгэр ордубут лен сиэмэтин табыгынатабыт.     

Мороженайдаах, отонноох

Сорох оҕолор сир аһын сөбүлээбэттэр, барыанньа эҥин сиэбэттэр. Оттон бу туһалаах уонна минньигэс утаҕы амсайартан аккаастаныахтара суоҕа, астына-дуоһуйа иһиэхтэрэ.

Туох наадата:

Уҥуоҕа суох отон (малина, сугун, ежевика, о.д.а.) – 300 г

Саахар – 1-1,5 ост.ньуоска

Мороженай – 1 стаканчик

Үүт (бэйэ сөбүлүүрүнэн)

Отоммутун (малинаны, сугуну, ежевиканы эбэтэр атыны) блендергэ кутабыт, саахар эбэбит (саахара суох да үчүгэй). Үрдүгэр мороженайбытын кутабыт, ириэрэ түһэбит. Үүтүнэн убатан биэриэххэ сөп. 1-2 мүнүүтэ эрэсиимҥэ туруоран блендердиибит.   

“Тропическай”

Туох наадата:

Үүт – 400 мл

Банаан – 3-4 устуука

Апельсин суога – 400 мл

Саахар – 1 ост.нь.

Барытын бииргэ блендердиибит. Ыстакааннарга эбэтэр бокалларга кутабыт.

Сүбүөкүлэттэн уонна моркуоптан

Антиоксиданнарынан, аминокислоталарынан, ферменнэринэн уонна минералларынан баай смузи. Күүс-уох эбэр, сүргэни көтөҕөр.

Туох наадата:

Сүбүөкүлэ – 140 г

Моркуоп – 70 г

Уу – 240 мл

Мүөт – ост.ньуоска аҥаара

Сүбүөкүлэни уонна моркуобу буһарбаппыт, онон минньигэс уонна симэһиннээх буолаллара ордук. Хатан хаалбыт амтана астыга суох.

Моркуобу уонна сүбүөкүлэни хаҕын ыраастыыбыт, сууйабыт, кыра гына кырбыыбыт. Блендер иһитигэр холбуу кутабыт, мүөт эбэбит. Онно ыраас ууну кутабыт. Күүстээх уонна түргэн эрэсиимҥэ холбоон эрийтэрэбит.

“Тотоойу”

Бу утаҕы сарсыардааҥҥы аһылыкка оҥостон истэххитинэ, күнү быһа тот, сэниэлээх сылдьыаххыт. 

Туох наадата:

Кефир – 1 ыстакаан

Дьаабылыка – 1 уст.

Банаан – 1 уст.

Эбиэс хлопьялара – 2 ост.нь.

Мүөт – 1 ч. ньуоска.

Блендер иһитигэр эбиэс хлопьяларын, үрдүгэр кефир кутабыт, 5-8 мүн.туруора түһэбит. Дьаабылыкабытын, банааммытын кыра гына кырбыыбыт. Барытын иһиккэ кутабыт, мүөт эбэбит. Биир маасса буолуор диэри блендердиибит.

Иэдьэгэйтэн, банаантан

Кыратык үссэнэргэ үчүгэй утах. Банаан амтанын минньитэр, онон саахар да наадата суох. Иэдьэгэй иҥэмтэтин, доруобуйаҕа туһатын бэркэ диэн билэр буолуохтааххыт.

Туох наадата:

Иэдьэгэй – 100 г

Банаан – 1 уст.

Үүт – 300 мл

Какао бороһуога – 1-2 ост.нь.

Бастаан блендер иһитигэр иэдьэгэйи, үрдүгэр какао бороһуогун, үрдүгэр үүт кутабыт. Иэдьэгэйи илдьирийиэр диэри блендердиибит. Онтон банааммытын эбэн эрийтэрэбит. Ыстакааннарга кутабыт уонна үрдүгэр биир кымаах какао бороһуогун эбэтэр сакалаат түөркэлээн кутабыт. Оччоҕо өссө минньигэс буолар.

Моонньоҕонтон уонна кефиртэн

Туох наадата:

Кефир – 1 ыстакаан

Моонньоҕон – 1 ыстакаан

Джем (ханнык баҕарар) – 1 ч.нь.

Блендер иһитигэр моонньоҕону, кефири, джеми холбуу кутабыт. Биир кэлим маасса буолуор диэри блендеринэн ытыйабыт.

Ырыан баҕалаахтарга

Туох наадата:

Улахан дьаабылыка – 1

Апельсин – 1 уст.

Киви – 2 уст.

Үүт – 0,5 мл (йогурт эбэтэр суок буолуон сөп)

Имбирь – 5 г

Лимон суога – 1 ост.нь.

Фруктаны барытын сууйан, ыраастаан, кыра гына кырбаан бэлэмниибит,  имбири эбэбит,  барытын блендер иһитигэр кутабыт, лимону ыгабыт. 5 мүн. кэриҥэ эрийтэрэбит. Онтон үрдүгэр үүтү кутан, өссө 1 мүн. блендердиибит. 

Арбузтан, сливаттан уонна дьаабылыкаттан

Туох наадата:

Арбуз – 300 г

Слива – 100 г

Дьаабылыка – 200 г

Мүөт – 1 ч. нь.

Лён сиэмэтэ  – 10 г

Мята – икки сэбирдэх

Слива уҥуоҕун ылан быраҕабыт, блендеринэн илдьиритэбит. Пюретын икки ыстакааҥҥа арааран кутабыт. Дьаабылыканы сууйан, ыраастаан, кыра гына кырбаан блендердиибит. Аһыы буоллаҕына, мүөт эбиэхпитин сөп. Итиэннэ ыстакааннарбытыгар тэҥ гынна үллэрэн иккис араҥа оҥорон кутабын.  Онтон арбузпутун ыраастыыбыт, сиэмэлэрин ылан быраҕабыт. Эмиэ блендердиибит, үһүс араҥанан ыстакааннарга кутабыт. Үрдүгэр лён сиэмэтин табыгынатабыт. Мята сэбирдэҕинэн киэргэтэбит.

Клюквалаах, банааннаах уонна мүөттээх

Туох наадата:

Үүт – 1 ыстакаан

Банаан – 1 уст.

Клюква (сибиэһэй эбэтэр тоҥоруллубут)  – 4 ост. нь.

Мүөт (саахар) – 2 ост. нь.

Банааны ыраастыыбыт, төгүрүк гына быһабыт, блендер иһитигэр кутабыт. Үрдүгэр клюкваны, мүөтү (саахары), үүтү эбэбит. Барыта биир кэлим маасса буолуор диэри блендердиибит.

Сонуннар

Ордук ааҕаллар

Татьяна Гоголева:  «Төрөөбүт тылын билбэт ыччат ханна да сыаналаммат»
Дьон | 13.06.2024 | 10:00
Татьяна Гоголева: «Төрөөбүт тылын билбэт ыччат ханна да сыаналаммат»
«Хотугу сулус» оҕо телерадиоакадемиятын төрүттээбит, үгүс көлүөнэ талааннаах ыччаты көччөх гынан көтүппүт Татьяна Гоголева, чахчы, Саха сиригэр тыыннаах номох буолбут киһи. СӨ култууратын үтүөлээх үлэһитэ, СӨ култууратын, социальнай эйгэтин туйгуна, «Гражданскай килбиэн» бэлиэ хаһаайына олоҕун тухары оҥорбута, айбыта-туппута, үйэтиппитэ үгүс.   Кини туһунан бу иннинэ сурулунна ини, суруллубата ини. Ол эрээри...
Арыгы атыытын бобуутун полиция үлэһиттэрэ хонтуруоллуохтара
Сонуннар | 08.06.2024 | 11:51
Арыгы атыытын бобуутун полиция үлэһиттэрэ хонтуруоллуохтара
Куорат баһылыга Евгений Григорьев дьаһалынан VIII-с «Азия оҕолоро» Оонньуулар ыытыллар кэмнэригэр бэс ыйын 25 күнүттэн  от ыйын 8 күнүгэр диэри Дьокуускай куоракка арыгылаах утах атыыта бобуллар. Ол эбэтэр бу күннэргэ арыгылаах утах атыытыгар идэтийэр эргиэн туочукалара сабыллаллар, атын маҕаһыыннарга арыгы атыылыыр отделлар үлэлээбэттэр.  Бу хаарчах арыгынан эргинэр кафе, ресторан, бар...
Дьахтар киэли хапчаҕайын искэниттэн өлүө суохтаах
Сонуннар | 07.06.2024 | 10:00
Дьахтар киэли хапчаҕайын искэниттэн өлүө суохтаах
Искэн төрүүр-ууһуур саастаах эдэр дьахталлары булара аан дойду онкогинеколог быраастарын ордук дьиксиннэрэр. Саха сиригэр дьахтар аймах ортотугар киэли хапчаҕайын араага (рак шейки матки) эмиий искэнин кэнниттэн иккис миэстэҕэ турар уонна онкология ыарыытыттан өлүү биир сүрүн төрүөтүнэн буолар. Хомойуох иһин, дьахтар аймах 83%-на балыыһаҕа хомнуо-хойут, ыарыы хайыы үйэ ытарчалыы ылбытын кэннэ...
Үөрэнээччилэр спартакиадалара
Спорт | 07.06.2024 | 12:00
Үөрэнээччилэр спартакиадалара
Өрөспүүбүлүкэ үөрэнээччилэрин спартакиадата бэс ыйын 6-10 күннэригэр спорт 29 көрүҥэр 35 улуустан 1700 оҕо кыттыылаах буолуоҕа.  Бу туһунан билиһиннэрэр пресс-конференцияны Саха Өрөспүүбүлүкэтин үөрэххэ уонна наукаҕа миниистирин солбуйааччы Альбина Аргунова, “Спортивные якутяне” Киин дириэктэрин солбуйааччы Александр Брызгалов уонна Спартакиада сүрүн судьуйата Юрий Балаганскай иһитиннэрдилэр. Спартакиада кыайыылаахтарыгар туттарыллыахтаах Кубоктар, мэтээллэр, спортсменнар экипировкалара...