13.02.2022 | 19:00

ОНКОПОИСКСАХА.РФ сайт сүрэхтэннэ

ОНКОПОИСКСАХА.РФ сайт сүрэхтэннэ
Ааптар: Айыына Ксенофонтова
Бөлөххө киир

Олунньу 4 күнүгэр ОНКОПОИСКСАХА.РФ сайт сахалыы тылынан сүрэхтэннэ. Бу туһунан Өрөспүүбүлүкэтээҕи онкологическай диспансер пресс-сулууспата иһитиннэрдэ.

«Онкопоисксаха.рф» олохтоох нэһилиэнньэни хабарга туһаайылынна. Аҕам саастаах дьоҥҥо табыгастаах буолуо диэн эрэнэбит. Бырайыак олоххо киириэҕиттэн көдьүүстээҕин көрдөрдө. Онон нэһилиэнньэ доруобуйата бөҕөргүүрүгэр кылаатын киллэриэ дии саныыбыт. Саха сирин олохтоохторун көрдөрүнүҥ уонна доруобуйаҕытын, чугас дьоҥҥутун харыстааҥ диэн ыҥырабыт”, – диэтэ онкологическай диспансер кылаабынай бырааһа Татьяна Ивановна. 

Сайт ийэ тылынан оҥоһулларыгар “Сахалыы Бикипиэдьийэ” төрүттээччитэ Ньукулай Павлов-Халан өҥөтө улахан диэн тэрилтэ кэлэктиибэ киниэхэ махталын биллэрдэ. 

«Тылбаастыырбар элбэх киһиттэн сүбэлэттим. “Сахалыы тиэрминнэр” диэн хас да сыл тухарыалтыспыт бөлөхтөөхпүт, онно учуонайдар, суруналыыстар, эгэлгэ эйгэлэртэн саха тылын билэр дьон да киирэллэр. Онно, холобур, «шейка матки» уонна «предстательная железа» диэн уорганнар тылбаастарыгар элбэх мөккүөр тахсыбыта. Ордук улахан көмөнү Петр Сысоевич Тумусов диэн эмиэ быраас үөрэхтээх, “Аан туом” (сахалыы анатомия) кинигэ ааптара оҥордо. Иккис сүбэһитим университет саха салаатын дириэктэрэ Гаврил Григорьевич Торотоев, уонна үһүс киһим – Арчылан, “Күрүлгэн” сурунаал эрэдээктэрэ.
Онкодиспансер салалтата дьон туһа диэн үлэлиирин хайгыы көрдүм уонна сокуону ытыктаан, судаарыстыба икки тылын тэҥҥэ туттарга дьулуһуута атын да тэрилтэлэргэ үтүө холобур буоларыгар баҕарабын», – диэтэ Ньукулай Павлов-Халан, Ил Дархан Тылга сүбэтин чилиэнэ, медицина наукатын хандьыдаата, лингвистика магистра.

“Бырайыакпыт Арассыыйа атын регионнарыттан кэллиэгэлэрбит үрдүк сыанабылларын ылла”, – дииллэр диспансер үлэһиттэрэ.  

Санатан аастахха, бу 2020 сылтан үлэлиир web-платформаны онкодиспансер исписэлиистэрэ оҥорбуттара. Скрининг көмөтүнэн араак 6 көрүҥүн эрдэ быһаарыахха сөп. Ол курдук, баҕалаах дьон сайтка киирэн, тыҥа, быар, эмиий, суон оһоҕос, киэли хапчаҕайын (шейка матки), самах былчархайын (предстательная железа) чинчийиитин ааһар кыахтаахтар.

Икки сыл устата Саха сирин 15 тыһыынча олохтооҕо  «Онкопоисксаха.рф» скрининговай бырайыакка кыттыбыт. Табыгастаах уонна туттарга судургу буолан, хайыы-үйэ дьон-сэргэ биһирэбилин ылла.   

Сонуннар

Ордук ааҕаллар

Биир санаанан салайтаран
Дьон | 19.01.2023 | 13:00
Биир санаанан салайтаран
Норуот сомоҕолоһуута, биир санааланыыта – олохпут сарсыҥҥыга эрэллээх буолуутун олуга. Хаһыаппыт бүгүҥҥү нүөмэригэр Ытык Күөл бөһүөлэгэр түөлбэнэн үлэни салайар бастыҥ уопсастыбанньык, олоххо көхтөөх позициялаах Агафья Савватееваны кытта кэпсэтэбит.
Дьоҕур-талаан арыллыыта
Спорт | 26.01.2023 | 18:00
Дьоҕур-талаан арыллыыта
Дьиҥинэн, Орто дойдуга кэлбит киһи барыта туохха эрэ дьоҕурдаах, талааннаах. Дьэ, ол арыллара, туттуллара дэбигис кыаллыбат. Ону үрдүк үөһээ айыыларбыт бэйэлэрэ быһааран эрдэхтэрэ. Биллэн турар, улаханнык сыраластахха, күнү-дьылы бараатахха, сүрэхтээх-бэлэстээх, туруу үлэһит, айылҕаттан айдарыылаах буоллахха эрэ дьоҕур, талаан кэлиэн сөп. Дьөгүөр Картузов, дьэ, кырдьык, айылҕаттан хатаҕаламмыт киһи. Тыа киһитин сиэринэн...
Сардаана Токоемова:  «Иистэн дуоһуйууну ылабын...»
Дьон | 28.01.2023 | 16:00
Сардаана Токоемова: «Иистэн дуоһуйууну ылабын...»
Иис сахаларга урут-уруккуттан хааммытыгар баар. Билигин биһиги ортобутугар талааннаах иистэнньэҥнэр, норуот маастардара аҕыйаҕа суохтар. Кустуктуу субуллар оһуор быысапкалары, сахалыы тыынынан илгийэр кылтан, сиэлтэн оҥоһуктары, туостан көбүөрдэри, сэлээппэлэри, халадаай былаачыйалары, оноолоох соннору, хаһыаччыктары о.д.а. саха дьахталлара ис сүрэхтэриттэн тигэллэр. Бу тигиилэргэ төһөлөөх дууһа сылааһа ууруллубута буолуой диэн киһи сөҕө эрэ саныыр....
«Сатал» кыһалҕатын быһаарар былаан оҥоһулунна
Сытыы муннук | 20.01.2023 | 13:00
«Сатал» кыһалҕатын быһаарар былаан оҥоһулунна
«Киин куорат» хаһыат ааспыт нүөмэригэр «Сатал» түөлбэҕэ тахсыбыт саахал туһунан суруйан турабыт. Тохсунньу тоһуттар тымныыта саамай муҥутаан турар кэмигэр аны маннык быһылаан хатыламматын, дьон дьиэтэ, гарааһа хам тоҥмотун туһугар олохтоохтор сүрүннүүр бөлөх тэринэн, Ил Дархаҥҥа тиийэ сурук суруйдулар.   Дьокуускайга кытыы түөлбэлэри, тыа хаһаайыстыбатын, атыыны-эргиэни уонна урбааны сайыннарыыга куорат баһылыгын солбуйааччы...