28.10.2022 | 16:00

Кыаллыбат диэн суох

Анастасия Угарова — Дьокуускай куорат дьаһалтатын ыччаты кытта үлэҕэ салаатын тутаах исписэлииһэ, маны сэргэ М.К. Аммосов аатынан Хотугулуу-Илиҥҥи федеральнай университет Инженернэй-техническэй институтун «Сири уонна кадастры оҥоруу» идэтин магистрана.
Кыаллыбат диэн суох
Ааптар: Айталина Софронова
Бөлөххө киир

– Дьокуускай куорат сойбот сонуннардаах хаһыатын ааҕааччылара, дорооболоруҥ!

Мин устудьуон буолуохпуттан ХИФУ уопсастыбаннай олоҕор актыбыыс этим. Балтараа сыл кэриҥэ көннөрү актыбыыһынан үлэлээн, “Актыып оскуолата” диэни ааһан, салгыы тугу сайыннарыахха сөбүн быһаарынан баран, Инженернэй-техническэй институт устудьуоннарын иһинэн үлэлиир профсоюзка бэрэссэдээтэлинэн кандидатурабын туруоруммутум. Устудьуоннар куоластааннар, эрэнэннэр, 2019-2022 сс. бэрэссэдээтэл быһыытынан үлэлээбитим.

Тыый! Бүтүн институт бэрэссэдээтэлэ буолар диэн улахан чиэс уонна эппиэтинэс буоллаҕа...

Оннук. Биһиги устудьуоннар араас кыһалҕаларын быһаарар этибит, холобура, уопсайга киирии, үрдүк истипиэндьийэҕэ докумуоннары тутуу о.д.а. Ону таһынан үөрэҕим тутар хамыыһыйатыгар үлэлээбитим. Бу сылдьан элбэх саҥа доҕордонон, биир санаалаахтарбын көрсөн, хамаанда тэриммитим, дьону кытта үлэлиир уопуту ылбытым уонна лидер хаачыстыбатын сайыннарбытым.

Анастасия, эн Дьокуускай куорат дьаһалтатыгар ыччат салаатыгар үлэлиигин, онно сүрүн хайысхаҥ ханныгый?

Билигин мин Дьокуускай куорат уокуруктааҕы дьаһалтатын уопсастыбаннай сибээскэ уонна ыччат политикатыгар управлениетыгар волонтерскай үлэ-хамнас исписэлииһэбин. Сүрүннээн волонтердары кытта үлэлиибит, куоракка ыытыллар улахан тэрээһиннэргэ көмөлөһөбүт, нэһилиэнньэ көрдөһүүтүгэр тирэх буолабыт. Билигин саҥа арыллыбыт Анал байыаннай эпэрээссийэ кыттыылаахтарын дьиэ кэргэттэригэр көмөлөһөбүт.

Управление иһинэн үс сүрүн отделлаахпыт, ол онно ыччат политиката, уопсастыбыннай сибээс уонна социальнай политика салаалара киирэллэр.

Сүрүн тэрээһиннэргитин ааттаталыаҥ дуо?

Култуурунай, патриотическай, айар, интеллектуальнай тэрээhиннэри ыытабыт. Ол курдук, «МЭР» дьыалабыай оонньуу, «Мамалыш», «Молодая семья», «Молодежный connect», «Поколение лидеров» уо.д.а. тэрээһиннэр нэһилиэнньэ биһирэбилин ылан, сыл аайы ыытыллар буоллулар.

“Волонтер” диэн кимий?

— Бэйэтин баҕа санаатынан дьоҥҥо үтүөнү оҥорор, көмөлөһөр киһи буоллаҕа. Дьокуускай куоракка волонтерскай хамсааһын күүскэ сайынна, аҕа көлүөнэҕэ көмөлөһүү, субуотунньуктары ыытыы, аадырыстаах көмөнү оҥоруу курдук үгэс буолбут тэрээһиннэри таһынан, холобура, медиаволонтерство диэн баар. Медиаволонтердар социальнай ситимнэргэ уонна СМИ-лэргэ волонтердуур дьаһаллары сырдаталлар, тарҕаталлар, ол дьаһаллар дьоҥҥо тиийимтиэ буолалларын туһугар тупсаҕай дизайнныыллар, макеттыыллар. Эковолонтерство, уопсастыбаннай куттал суох буолуутун волонтерствота уонна да атын элбэх хайысха баар. Мин санаабар, волонтерство ханнык баҕарар эйгэҕэ бэйэ кыаҕын холонон көрөр кыаҕы биэрэр. Волонтер учуутал, тутааччы, инженер, дизайнер оруолун барытын холонон көрүөн сөп.

Волонтердары кытта хайдах үлэлиигит?

Цифровой технология кэмигэр волонтердарбытын социальнай ситимнэринэн, мессенджеринэн булабыт. Билигин мин хамаандабар 20 тирэх киһи баар. Уопсастыбанньык быһыытынан тус бэйэм волонтердарбын өрүү өйүүбүн, Махтал суруктарынан, сылаас эбиэттэринэн эбэтэр өйдөбүнньүк сувенирдарынан бэлиэтиибин.

Дьэ, билигин волонтердар үлэҕит үгэнэ буоллаҕа.

Оннук. Бүгүҥҥү күҥҥэ мобилизацияҕа барбыт дьон дьиэ кэргэттэригэр көмөлөһөбүт – сайабылыанньаны толорууга, наадалаах докумуоннары сканныырга көмөлөһөбүт, туһааннаах исписэлиистэргэ ыытабыт о.д.а.

 

 

Ону тэҥэ билигин бу хайысхаларга волонтердары көрдүүбут:

Ыалларга аадырыстаах көмө оҥорор баҕалаах дьону;

PRO BONO волонтердар (юристар, психологтар, адвокаттар);

Автоволонтердар (массыыналаах дьон).

 

 

—Мобилизацияҕа барбыт дьоҥҥо дьаһалта өттүттэн өссө туох көмө оҥоһулларын ааҕааччыларбытыгар сырдатыахха эрэ.

Бастакытынан, куораттан барбыт дьон дьиэ кэргэттэригэр 30 000 солк. кээмэйдээх биир кэмнээх харчынан көмө оҥоһуллар. Бу күннэргэ оҕуруот аһынан көмө бара турар. Оскуола үөрэнээччитигэр оптуобуска босхо айан уонна эбиэт уо.д.а. курдук тустаахтарга балайда суолталаах өйөбүллэр эмиэ бааллар.

Эн, инженер идэлээх киһи, тоҕо идэҕинэн үлэлээбэккэ, волонтер буоллуҥ?  Туох санааттан?

Оскуола эрдэхтэн үтүө санаа аахсыйаларын сэргиирим, көхтөөх кыттыыны ыларым, ол эрээри оччолорго маны үлэ курдук өйдөөбөт этим. Устудьуоннуур сылларбар ити баҕам өссө күүһүрбүтэ. Оруобуна пандемия саҕаламмыта. Ол кэмҥэ ХИФУ устудьуоннарын идэлээх сойууһа бэйэтин волонтерскай киинин арыйбыта.

— Чэ, аны куорат ыччатыгар киириэххэ, эһиги ордук туохха болҕомтону уураҕыт?

Айар дьоҕурдаах ыччаттарга тирэх буолабыт, холобура, соторутааҕыта коммуникационнай сессия ыытан, ыччаппыт куораты тупсарыыга идеяларын хомуйбуппут. Биир саамай бастыҥ бырайыакпыт –  “МЭР” дьыалабыай оонньуу. Чуолаан бу оонньуу чэрчитинэн киин куоракка оптуобус сылаас тохтобуллара олоххо киирбиттэрин тоһоҕолоон бэлиэтиэххэ наада.

— Сылаас тохтобул – бэртээхэй идея! Атын туох бырайыак олоххо киирдэ?

2020 сыллааҕы оонньуу түмүгүнэн ХИФУ кылаабынай куорпуһун утары Теплай күөлгэ Ыччат скверэ тутуллубута.

— «Үтүө санаа” диэни хайдах өйдүүгүн?

Үтүө санаа хас биирдии киһиэхэ баар буолуохтаах. Бу эн олоххо сыһыаныҥ. Биир киһи бүтүн уопсастыба, норуот олоҕун тупсарыан, чэпчэтиэн сөп.

Үтүө дьыалалары улахан эбэтэр кыра диэн араарбакка үлэлиирбин ордоробун. Дьон махтала миэхэ үөрүүнү аҕалар. Киһиргээн эттэххэ, кыаллыбат дьыала диэн суох, «Киһи барытын кыайар» диэн тус толкуйдаахпын.

Кэпсэтииҥ  иһин махтанабын, ситиһиилэри баҕарабын!

Махтал!

Сонуннар

Ордук ааҕаллар

Дрону күрдьэҕинэн суулларбыт саха буойуна
Дьон | 16.05.2024 | 14:00
Дрону күрдьэҕинэн суулларбыт саха буойуна
Нэдиэлэ аайы саҥаттан саҥа киһини билсэр, салгыы кинини кытта сибээһи тутар, суруйсар суруналыыс идэлээх киһи үлэтин биир эмиэ интэриэһинэй өрүтэ. Мин анал байыаннай дьайыыга сылдьар суруйбут, ааҕааччы киэҥ эйгэтигэр таһаарбыт уолаттарбын үгүстэрин билсэбин, ыйыталаһабын, ханна тиийбиттэрин, сылдьалларын сураһабын, хомойуох иһин, сорохторун сүтэрэбин...   Хачыгаардыы сылдьан бэбиэскэ туппутум Анал байыаннай дьайыыга мобилизация...
Татьяна Иванова:  «Дьол уйатын ытыктабыллаах сыһыан эрэ тутар»
Дьон | 16.05.2024 | 16:00
Татьяна Иванова: «Дьол уйатын ытыктабыллаах сыһыан эрэ тутар»
Арассыыйаҕа Дьиэ кэргэн сылынан уонна Дьиэ кэргэн аан дойдутааҕы күнүгэр сөп түбэһиннэрэн, таптал кыымыттан саҕыллан биэс уон биэс сыл бииргэ олоруу дьолун билбит Татьяна, Петр Ивановтар дьиэ кэргэн туһунан сырдатабын.   Киһи төрүүрүгэр олоҕо барыта үөһэттэн суруллан кэлэр ыйаахтаах, ол  сиэринэн оҕо, ыччат буола үүнэн, сирдээҕи тапталы көрсөн, ийэ, аҕа дьолун...
Дархан этээччи Валентин Хорунов:  «Саха оһуохайа аан дойду дьонун түмүөҕэ...»
Дьон | 23.05.2024 | 10:00
Дархан этээччи Валентин Хорунов: «Саха оһуохайа аан дойду дьонун түмүөҕэ...»
Былырыын балаҕан ыйын 7 күнүгэр Саха Өрөспүүбүлүкэтин Ил Дархана Айсен Николаев Оһуохай күнүн олохтуур туһунан Ыйаахха илии баттаабыта. Дьэ, ол үөрүүлээх күммүт – ыам ыйын 25 күнэ үүнэрэ икки хонук хаалла.  Бүгүҥҥү нүөмэрбит ытык-мааны ыалдьыта – Саха Өрөспүүбүлүкэтин Дархан этээччитэ Валентин Хорунов.   Дьуохар биһигэр улааппыт дьоллоохпун – Валентин Васильевич, саха...
Оҕуруотчут кистэлэҥнэрэ
Тускар туһан | 23.05.2024 | 18:00
Оҕуруотчут кистэлэҥнэрэ
Кылгас, ол эрээри өҥүрүк куйаас сайыннаах Сахабыт сиригэр эгэлгэ сибэккилэри, оҕуруот аһын арааһын үүннэрэн ылабыт. Сылтан сыл аайы соҕуруу дойдуга силигилии үүнэр сонун үүнээйилэр көрүҥнэрин олордон,  тиэргэммит, дьиэбит  кэрэ көстүүлэнэр, ону тэҥэ оҕуруот аһыттан, отонноох талахтартан кэнсиэрбэлэри, хомпуоттары оҥосторбут элбээтэ.    Бастыҥ тиэргэннээх  хаһаайка Мин бүгүн сайыҥҥы сырал күннэргэ ис сүрэхтэн...