Куурусса этиттэн сонун бүлүүдэлэр

Куурусса этиттэн шницель

Куурусса түөһүн этэ – 2 уст.;

Сымыыт – 2 уст.;

Бурдук – 100-200 г;

Паприка – 2 ч.нь.;

Туус;

Мас арыыта – ыһаарылыырга.

Куурусса түөһүн этин бастаан аҥаардыыбыт, онтон чарааһатан өссө икки гына быһабыт. Бииртэн түөрт шницель тахсар этин оҥоробут.

Өтүйэнэн кыратык хаптаччы кырбаан биэрэбит.

Панировкатын бэлэмниибит: биир иһиккэ бурдук, паприка, ханнык туманы сөбүлүүргүтүнэн, иккис иһиккэ – сымыыттарбытын тууһаан ытыйабыт.

Куурусса этин бастаан ытыллыбыт сымыыкка, онтон бурдукка умньаан ыла-ыла, элбэх арыыга ыһаарылыыбыт.

Хоторорбутугар салфетка тэлгээн, арыытын оборторобут.

Кэтилиэт эбэтэр наггетсы

Куурусса түөһүн этэ – 3 уст.;

Сымыыт – 3 уст.;

Сыыр – 100 г;

Туус, тума;

Мас арыыта – ыһаарылыырга.

Бу ырысыапка куурусса этин ханнык баҕарар чааһын туттуохха сөп. Бастаан этин кыра гына кырбыыбыт, онно сымыыппытын уонна түөркэлэммит сыыры эбэбит. Туустуубут, тумалыыбыт уонна бурдуктаан хойуннарабыт.

Тиэстэбитин итии арыыга ньуосканан кутан ыһаарылыыбыт. Төгүрүктүү уурдахха, кэтилиэт буолар, кыра-кыра гына кутан ыһаарылаатахха, наггетсы курдук буолар.

Сымнаҕас, сүмэһиннээх, олус үчүгэй сокууска бэлэм.

Сүөгэйгэ буспут куурусса этэ

Куурусса түөһүн этэ – 300 г;

Эриэппэ луук – 0,5 уст.;

Моркуоп – 1 уст.;

Чеснок – 1 өлүүскэ;

Сүөгэй – 3 ост.нь.;

Томат паастата – 1 ост. нь.;

Бурдук – 1 ост. нь.;

Туус, хара биэрэс.

Куурусса этин сууйабыт, салфетканан сотон куурдабыт. Уһун синньигэс гына кырбастыыбыт.

Моркуоппутун түөркэлиибит, луукпутун кыра гына кырбыыбыт.

Арыылаах хобордооҕу сылытан баран бастаан эппитин ыһаарылыыбыт. Онтон онно луугу уонна моркуобу эбии кутабыт.

Бурдук кутан булкуйабыт уонна томат паасталаах сүөгэйбитин эбэбит.

Спагеттины эбэтэр ханнык баҕарар гарниры кытта барсар ыһаары буолар.

Аһылыкка сылаастыы биэрэбит.

Кууруссаттан рулет

Куурусса түөһүн этэ – 2 уст.

Кытаанах сыыр – 100 г;

Чеснок – 2-3 өлүүскэ;

Туус, хара биэрэс;

Бурдук – 100 г;

Мас арыыта.

Куурусса этин чараас гына бысталыыбыт. Кытыытыгар түөркэлэммит сыыры ууран рулет гына суулуубут уонна зубочистканан иҥиннэрэн иһэбит.

Бурдукка умньаан ыла-ыла, арыыга саһарчы ыһаарылыыбыт, зубочисткаларын туурабыт.

Сокууска быһыытынан эбэтэр ханнык баҕарар гарниры кытта ханыылаһар минньигэс бүлүүдэ бэлэм.