Куорат сааскы халааҥҥа бэлэм

Бүгүн куорат баһылыга Евгений Григорьев салалтатынан сүбэ мунньах сааскы халаан уутун көрсө биэрэги бөҕөргөтүү үлэтин көрдө-иһиттэ, сэрэхтээх учаастактары бэрэбиэркэлээтэ. 
Оробуочай бөлөххө куораттааҕы уокурук эппиэттээх салааларын бэрэстэбиитэллэрэ – Гражданскай оборона управлениетын начальнига Виталий Бобинов, «Якутдорстрой” тэрилтэ инженер-гидротехнига Петр Копырин уо.д.а каартанан көрө-көрө уу халааныттан эмсэҕэлиир сирдэргэ туох үлэ барбытын ырыттылар, уу ааһар сирдэрин көрдүлэр. 

«Уу үөһэттэн Шестаковкаҕа кэлэр. Онно 3 шлюз турар. Ол шлюзтарынан биһиги 3 тымырынан куоракка ууну ыытабыт. Биир тымырга быйыл турбалары уларыппыппыт. Бүгүн ол турбаларбыт хайдах үлэлииллэрин бэрэбиэркэлээтибит уонна үлэ сөпкө барбыт диэн көрдүбүт. Өрүс барарыгар бэлэмнэнэ сылдьабыт. Былааннаммыт үлэ барыта оҥоһулунна. Саамай ууга барар сирдэрбит  –  Тулагы, Пригороднай, Хатас, Табаҕа, Даркылаах. Ити сирдэри барытын хонтуруолга ылан олоробут», – диэтэ Евгений Николаевич.  
Билиҥҥи туругунан 1450 киһи батар эвакуационнай пууннары бэлэмнээбиттэр. Ынах-сүөһүнү күрэтэр сир эмиэ быһаарыллыбыт. Баһылык халаан уута кэлэн ааһарыгар толору бэлэмнэрин биллэрдэ.

Ааптар түһэриилэрэ