Кондиционеры хайдах талабыт?

Куорат дьонун куйаастан кондиционер эрэ быыһыах айылаах. Дьэ, ханныгы талабыт? Сыаната төһөнүй? Хайдах туруораллар? Бу күннэргэ маннык ыйытыыларга элбэх киһи хоруй көрдүү сылдьар буолуохтаах.

Кондиционер көрүҥнэрэ

Бастакынан, кондиционеры таларга эһиги дьиэҕитигэр ханнык көрүҥ сөп түбэһэрин быһаарыаххытын наада. Холобура, манныктар бааллар:

Истиэнэҕэ ыйаныллар сплит-система

Үчүгэй өрүтэ: Сплит-система ордук кыбартыыраҕа, чааһынай дьиэҕэ барсар. Тымныынан да үрэр, ититэр да аналлаах, уонна тыаһа-ууһа быдан кыра, салгынын бэйэтэ ыраастыыр.

Итэҕэстэрэ: Улахан иэннээх дьиэни ситэ сойутумуон сөп, ол инниттэн кыбартыыраҕа эбэтэр кыра хосторго туруорар ордук.

Сыаната: Ортотунан 20 м2 – 20 000 тыһ. солк.

Билигин дьон үксэ сплит-система кондиционердары туруорар эбит. Истиэнэҕэ судургутук ыйаныллар, дьиэ тас өттүгэр (фасадыгар) ыйанар. Сплит-система сүрүннээн 20 миэтэрэҕэ диэри иэни сөрүүкэтэр аналлаах. Дьиэ иһиттэн итиини таһырдьа үрэн таһаарар.

Кондиционеры уопуттаах исписэлиистэргэ туруортарар ордук. Туруоруу сыаната быһа холоон кондиционер бэйэтин сыанатын кытта араа-бараа. Маны таһынан маастардар дьиэ ханнык көрүҥнээҕин эмиэ аахсаллар, онон, ортотунан, 15000 – 20000 тыһ. солк. тиийэ сыаналыыллар.

Кассеталаах кондиционер

Кассеталаах кондиционер улахан чааһынай дьиэҕэ, 3 миэтэрэттэн итэҕэһэ суох үрдүктээх коттеджка барсар.

Үчүгэй өрүтэ: Түргэнник сойутар.

Итэҕэстэрэ: Туруоруута арыый уустуктардаах, сыаната үрдүк, дьиэ үрүтүгэр туһунан ирдэбиллээх.

Сыаната: 50 м2 – 50 000 тыһ. солк.

Салгын сүүрүктэрин түөрт хайысханан үллэрэрин суотугар түргэнник сөрүүкэтэр. Маннык кондиционер 50 м2 итэҕэһэ суох иэннээх дьиэҕэ барсар. Боростуой бытовой тиэхиньикэ маҕаһыыныгар соччо-бачча көстүбэттэр, анал хампаанньалар эрэ дьарыктаналлар эбит.

Көһө сылдьар кондиционер

Истиэнэҕэ ыйаныллар сплит-системаны сатаан туруорбат дьон көһө сылдьар көлүөһэлээх кондиционеры туруоруохтарын сөп. Маннык дьоҕус кондиционер ордук даачаҕа уонна кыра иэннээх дьиэҕэ табыгастаах.

Үчүгэй өрүтэ: Ханна баҕар, хостон хоско көһөрө сылдьан туруоруохха сөп, установкаҕа харчы бараммат.

Итэҕэстэрэ: Тыастаах, кыамтата ортотунан 3 кВт.

Сыаната: 20 м2 – 20 000 солк. саҕалаан.

Мобильнай кондиционеры ким баҕарар туруорар кыахтаах, туттарга олус судургу. Үксүлэрэ 20-30 м2 иэннээх дьоҕус кээмэйдээх сирдэргэ табыгастаахтар.

Илииттэн атыылаһар наада дуо?

Социальнай ситимнэргэ тахсар биллэриилэри көрдөххө, истиэнэҕэ иилиллэр кондиционердары ким даҕаны атыылаабат эбит. Ол оннугар мини-кондиционер, вентилятор атыыга элбэх. Оттон сыана маҕаһыын киэнин кытта тэҥ кэриэтэ буолан биэрдэ. Холобура, сплит-система сыаната 17000 солк. саҕаланар. Көһө сылдьар көлүөһэлээх кондиционер 5000 солк. саҕалаан 19000 солк. тиийэ баар. Онон маҕаһыынтан мэктиэлээх уонна саҥа табаары атыыласпыт ордук буолан тахсар.

«Киин куорат» хаһыат кондиционер доруобуйаҕа дьайыытын туһунан суруйуутун манна ааҕыахха сөп: https://kiinkuorat.ru/articles/kondicioner-tuohha-naadanyy