Саха киинэтэ саҥа рекорду үктээтэ

Режиссер Михаил Лукачевскай саҥа «Триумф» спортивнай драмата өрөспүүбүлүкэ киинэ саалаларыгар бастакы көрдөрүллүбүт күнүгэр 2,15 мөлүйүөн солкуобайы киллэрдэ уонна саха киинэтигэр рекорду олохтоото.
Киинэ улуу тренер Дмитрий Коркин иитиллээччилэрэ Олимп чыпчаалын дабайыыларын туһунан сэһэргиир. 1976 сыллаахха XXI-с сайыҥҥы Олимпийскай оонньууларга Монреальга Павел Пинигин кыһыл көмүс мэтээли ылары ситиһэр, XX-с олимпиала кыайыылааҕа Роман Дмитриев уонна Александр Иванов үрүҥ көмүс призер буолаллар. 

Саҥа киинэ ааптардарын кытта көрсүһүүгэ Ил Дархан Айсен Николаев бэлиэтээбитин курдук, бу киинэ соруга – улуу спортсменнар холобурдарын сэһэргээһин эрэ буолбатах, ону таһынан үүнэр көлүөнэҕэ биир дойдулаахтарынан киэн туттуу тыынын иитии уонна кыайыыларга кынаттааһын.
Артыыстар Семен Лукин – Роман Дмитриев, Гаврил Менкяров
– Павел Пинигин, Дьулусхан Андросов – Александр Иванов уонна норуодунай артыыс Иннокентий Луковцев улуу тренер Дмитрий Петрович Коркин оруолларын итэҕэтиилээхтик оонньууллар.
Санатар буоллахха, 2019 сыллаахха Ил Дархан саха киинэтин сайыннарыыга сыл аайы өрөспүүбүлүкэ бүддьүөтүттэн үп көрөргө уурааҕа тахсан, билигин сыллата 8-тан 15-кэ тиийэ бырайыак олоххо киирэр, диэн иһитиннэрэр Ил Дархан уонна Бырабыыталыстыба пресс-сулууспата.