Ийэ үүтэ – доруобай олох төрдө

Бастакы Бэрэсидьиэн Михаил Николаев көҕүлээһининэн Саха сиригэр алтынньы үһүс өрөбүлүгэр Арассыыйаҕа бастакынан Ийэ күнэ олохтоммута.

Дьокуускай куоракка Ийэ үрдүк аатыгар сүгүрүйүүнү бэлиэтиир пааматынньыктартан биирдэстэринэн 2021 сыллаахха Перинатальнай балыыһа тиэргэнигэр туруоруллубут Оҕону эмиийдиир ийэҕэ аналлаах скульптура буолар.

Композиция биллиилээх оҕо бырааһа, ССРС доруобуйатын харыстабылын туйгуна, Саха АССР үтүөлээх бырааһа, «Гражданскай килбиэн» анал бэлиэ хаһаайката, Саха Өрөспүүбүлүкэтин бочуоттаах мецената, Томпо уонна Мэҥэ Хаҥалас оройуоннарын бочуоттаах гражданина, оҕону ийэ үүтүнэн аһатыы тыын суолтатын тарҕатыыга сүҥкэн үлэни ыыппыт Александра Кычкина уобараһыгар ананар уонна кини ийэ илгэтин туһунан этиитэ үс тылынан суруллар: 1. «Ийэ үүтэ – доруобай олох төрдө» 2. «Материнское молоко – основа здоровой жизни» 3. «Mother’s milk is the basis of health and life».

Бу пааматынньыкка Ийэ күнүнэн сыллата тыыннаах сибэкки дьөрбөтүн ууруу үтүө үгэскэ кубулуйда. Быйылгы чиэстээһиҥҥэ СӨ доруобуйа харыстабылын миниистирин солбуйааччы Татьяна Павлова, «Арассыыйа ийэлэрэ» Бүтүн Арассыыйатааҕы уопсастыбаннай хамсааһын Саха сиригэр салаатын бэрэссэдээтэлэ Прасковья Борисова, СӨ доруобуйа харыстабылын министиэристибэтин кылаабынай диетолога, м.н.к., М.К. Аммосов аатынан ХИФУ Мединститутун Научнай-чинчийэр киинин аһылыкка киинин салайааччыта, «Оҕону эмиийдэтэр ийэ» пааматынньыгы оҥорууну көҕүлээччи Ульяна Лебедева, дьокутаат Николай Бугаев, Дьокуускай куорат Олохтоох дьаһалтатын баһылыгын социальнай боппуруостарга солбуйааччы Владимир Дорожкин, Куорат дууматын дьокутааттара, уопсастыбаннас кыттыыны ыллылар, диэн иһитиннэрэр Олохтоох дьаһалта пресс-сулууспата.