Куораты киртитээччилэри бохсуохха!
Бөх-сыыс, этэргэ дылы, халлаантан кэлэн түспэт, эмискэ күөрэйэн тахсыбат. Бу үксэ киһи аймах алдьатыылаах үлэтин-хамнаһын содула.
Дьиҥэр, холобура, куораты сыыһырдааччылары, киртитээччилэри, массыынаттан бөҕү быраҕааччылары ким эрэ түбэһэн көрөр.
Куораппыт ыраас буоларыгар хайдах көмөлөһүөххэ сөбүй?
Олорор, төрөөбүт куораппыт ыраас, чэбдик буоларыгар хас биирдии төлөпүөннээх киһи көмөлөһүөн сөп. Суол кытыытыгар, аппаҕа, уу кытылыгар, чааһынай учаастактарга массыынаттан бөҕү сүөкүү турар түгэннэрин бэлиэтии көрдүгүт - сонно тута хаартыскаҕа түһэрэн, видеоҕа устан, быһыы-майгы буолбут аадырыһын, күнүн-дьылын, тиэхиньикэ нүөмэрин ыйан туран, yak_kop@sakha.gov.ru электроннай почтаҕа эбэтэр аадырыска аҕалан биэриэххэ сөп: Дьокуускай к., 202-с түөлбэ, 18/2 куорпус.
Бөҕү үлүбээй тоҕор, сүөкүүр дьону туох накаастабыл күүтэрий?
Биирдиилээн дьоҥҥо таһаҕас тиэйэр массыынаттан бөҕү быраҕыы иһин ыстараап кээмэйэ 40 тыһ. солкуобайтан саҕаланар, тиэхиньикэни бас билэр тэрилтэлэргэ – 100 тыһ. солкуобайтан. Буруйу оҥорууну хатылааһын иһин ыстараап ыйыллыбыт кээмэйтэн хас да бүк үрдүгүн ааһан, бөҕү көҥүлэ суох сиргэ сүөкээбит массыына конфискацияланыан сөп.
Итини таһынан сокуону кэһээччи буруйунан буомурбут сир иэниттэн көрөн мөлүйүөнүнэн суумалаах накаастабыл баарын умнар сатаммат. Ол туһунан айылҕа харыстабылын кэмитиэтигэр иһитиннэрэллэр.
Сонуннар
Ордук ааҕаллар
