Хоту улуустарга 140 туонна кэриҥэ бородуукта тиэйилиннэ
Уһук хоту Анаабыр, Өлөөн, Эбээн Бытантай, Дьааҥы, Муома улуустарга оҕуруот аһын тиэйэр «күөх эриэйсэлэр» салҕаналлар.
Номнуо 44 эриэйсэнэн былааннаммыт 442 туоннаттан 140,8 туонна социальнай суолталаах табаар тиэйилиннэ.
«Дьокуускайтан Ан-26 чартер сөмөлүөттэринэн хоту улуустар кииннэригэр 85,8 туонна таһаҕас тиэрдилиннэ, кытыы нэһилиэктэргэ Ан-2 сөмөлүөтүнэн уонна Ми-8 бөртөлүөтүнэн – 54,8 туонна», – диэн Арктикатааҕы эргиэн-логистика хампаанньатын генеральнай дириэктэрэ Сайдам Степанов иһитиннэрэр.
Эбээн Бытантай оройуонун Дьарҕаалаах нэһилиэгин баһылыга Лев Горохов иһитиннэрбитинэн, бу күннэргэ Ан-2 сөмөлүөтүнэн араас бородуукта, ол иһигэр 1 туонна хортуоппуй кэлбит.
Арктикатааҕы эргиэн-логистика хампаанньатыгар иһитиннэрэллэринэн, сыл бүтүөр диэри дьоҕус авиациянан 301,1 туонна таһаҕас тиэйиллэрэ былааннанар. Манна 97 эриэйсэ сылдьыаҕа. Алтынньы 27 күнүгэр диэри «күөх эриэйсэлэр» Эбээн-Бытантай Баатаҕай Алыыта, Өлөөн Эйик бөһүөлэктэригэр сылдьыахтара, диэн иһитиннэрэр Ил Дархан уонна Бырабыыталыстыба пресс-сулууспата.
Хаартыска: Арктикатааҕы эргиэн-логистика хампаанньата