Анал байыаннай дьайыы кыттыылаахтарын кэргэттэрэ суоппар быраабын ылар ороскуоттарын компенсациялыахтара

Суоппар быраабын ылар ороскуот компенсациятынан 2025 сыл тохсунньу 1 күнүттэн анал байыаннай дьайыыга сырдык тыыннара быстыбыт уонна бааһырыыттан инбэлиит буолбут буойуттар кэргэттэрэ туһаныахтара.
Ол туһунан алтынньы 21 күнүгэр Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы Георгий Степанов иһитиннэрдэ.
Ил Дархан Айсен Николаев ыйааҕынан уонна атын нуорма-быраап докумуоннарынан Саха Өрөспүүбүлүкэтигэр анал байыаннай дьайыы кыттыылаахтарыгар уонна кинилэр дьиэ кэргэттэригэр аадырыстаах көмө тиһигин быспакка ыытыллар. Ол курдук, 143 ыал дьиэҕэ гаас киллэртиигэ материальнай көмөнөн туһанна, 479 төрөппүт санаторнай-курортнай эмтэниини ааста, 349 киһи байыаннай сулууспалаах эмтэнэр сиригэр баран кэллэ, 856 байыас уонна 1583 кинилэр чугас дьонноро реабилитацияны аастылар, 292 киһи дьиэтигэр уонна стационарга атын хабааннаах социальнай өҥөнөн туһанна. 144 киһи үөрэххэ киирэргэ направление ылла, 353 киһи үлэ миэстэтинэн хааччылынна, диэн иһитиннэрэр Ил Дархан уонна Бырабыыталыстыба пресс-сулууспата.