Бүлүүлүүр суол переулогын хапытаалынай өрөмүөнэ түмүктэннэ
«Куттала суох уонна хаачыстыбалаах суоллар» национальнай бырайыагынан оҥоһуллубут Бүлүүлүүр суол переулогын Лермонтов уулуссатыттан Объездной суолга диэри кэрчигин хапытаалынай өрөмүөнэ түмүктэннэ.
«Сахатрасстрой» ХЭУо генеральнай бэдэрээтчит күүһүнэн манна аспаал тэлгэннэ, тротуар уурулунна, инженернэй ситимнэр саҥардылыннылар. Учаастак устата – 1,415 м.
«Сахатрасстрой» ХЭУо маны сэргэ бу күннэргэ Винокуров уулуссатын Ильменскэй уулуссатыттан Чайковскай уулуссатыгар диэри кэрчигин саҥардан оҥорууну түмүктээтэ. 1,014 м усталаах сиргэ уу сүүрэр халдьалар уурулуннулар, икки носуос ыстаансыйата турда, уот, сибээс линияларын ситимэ саҥаттан тардылынна, тротуар, уулусса уота баар буоллулар.
Санатар буоллахха, «Куттала суох уонна хаачыстыбалаах суоллар» нацбырайыагынан ааспыт 2023 сылга Дьокуускай куоракка 30 км кэриҥэ усталаах уулусса-суол ситимэ тутуллан, өрөмүөннэнэн турар. Оттон 2019 сылтан чуолаан бу бырайыагынан киин куоракка барыта 133 эбийиэккэ 164 км усталаах суол нуормаҕа хоруйдуур гына оҥоһуллубута.
Быйыл, 2024 сыл түмүгүнэн, куорат суолларын 80% ирдэбилгэ сөп түбэһэр таһымҥа тахсыахтаах, диэн иһитиннэрэр Олохтоох дьаһалта пресс-сулууспата.