Дьиэ кыылларын көрүү-харайыы быраабылата булгуччу тутуһуллуохтаах

Олохтоох дьаһалта Территориялары кытта үлэҕэ департамена иһитиннэрэринэн, Саха Өрөспүүбүлүкэтин ветеринарияҕа управлениетын кытта дьиэ кыыллара бэйдиэ сылдьалларын бэрэбиэркэлиир эриэйдэлэр тиһигин быспакка ыытыллаллар.
Ол курдук, ааспыт нэдиэлэҕэ куорат Автодорожнай, Строительнай, Сайсары, Октябрьскай, Гагаринскай уокуруктарынан уонна Марха, Маҕан, Хатас, Тулагы нэһилиэктэринэн ыытыллыбыт эриэйдэ түмүгүнэн боротокуоллар толоруллубуттар, нэһилиэнньэни кытта өйдөтөр, быһаарар, сэрэтэр үлэ ыытыллыбыт.
Сыл саҕаланыаҕыттан маннык 260 эриэйдэ ыытыллан, СӨ Административнай буруйу оҥоруу кодексатын 5.4 ыст. 1 ч. 148 боротокуол толоруллубут; бу ыстатыйа 2-с чааһынан - 43 000 солк. суумалаах 11 боротокуол. СӨ Административнай буруйу оҥоруу кодексатын 8.52 ыстатыйатын 3 чааһынан - 110 000 солк. суумалаах 11 боротокуол (ыт дьону ытырыыта) оҥоһуллубут.
Санатар буоллахха, СӨ Бырабыыталыстыбатын 01.08.2014 с. 237 №-дээх уурааҕыгар олоҕуран “Саха Өрөспүүбүлүкэтин сиригэр-уотугар дьиэ кыылын иитии быраабылалара” олохтоммуттара.
 
Быраабылар дьиэ кыылын иитиигэ, дьаарбатыыга кэккэ ирдэбиллэри олохтууллар:
* Дьиэ кыылын иитээччилэр санитарнай-ветеринарнай нуормалар ирдэбиллэрин толоруохтаахтар, дьоҥҥо куттал суоһаабатын ситиһиэхтээхтэр, кыыллара уопсай сирдэри киртиппэтин мэктиэлиэхтээхтэр уонна хааччыйыахтаахтар.
* Дьиэ кыылын дьаарбатарга, босхо ыытарга атын кыылларга, дьон доруобуйатыгар итиэннэ бас билиитигэр туох да куттал суоһуо суохтаах. Дьиэ кыыллара маныаха анаммыт эрэ сирдэргэ дьаарбатыллыахтаахтар.
* Чааһынай бас билэр территориялаах, тиэргэннээх дьон ыттарын тиэргэн эрэ иһигэр көҥүл ыыталлара эбэтэр баайан туруораллара көҥүллэнэр, ыт бэйэтин территориятыттан халбарыйар, суолга сүүрэн тахсар кыаҕа суох буолуохтаах.
* Олорор дьиэттэн ыты уопсай тиэргэҥҥэ уонна уулуссаҕа хайаан да томторуктаах уонна хонтуруолланар усталаах быалаах таһаарыллыахтаах. Бу ирдэбил 35 см намыһах уҥуохтаах ыттарга сыһыана суох.
* Племенной боруода быһыытынан ураты сыаннаһа суох кыылларга, элбэхтик төрөөн-ууһаан, көрүүтэ-истиитэ суох хаалар төрүөҕү биэрбэтиннэр диэн, стерилизациялааһын миэрэтэ хайаан да ылыллыахтаах.
* Сыллата дьиэ кыылын ветеринарнай тэрилтэҕэ илдьэн ииригирии ыарыытын утары быһыы туруортарыллыахтаах.
* Бэйдиэ сылдьар ыттар (моойторуктаах даҕаны буоллуннар) Дьокуускайдааҕы кыыллары быстах кэмҥэ көрөр-истэр пууҥҥа анал сулууспаларынан илдьэн туттарыллаллар. Пуунтан кыылы төттөрү ылыы ороскуотун хаһаайын бэйэтэ уйунар (кыылы тутан аҕалбыт, көрөн-истэн, аһатан туруорбут өҥө барыта төлөбүрдээх).
Бу ыйыллыбыт быраабылалары кэһии иһин СӨ Административнай буруйу оҥоруу кодексатын 5.4 ыст.  эппиэтинэскэ тардыллаҕыт, ыстараап төлүүгүт.
Бэйдиэ сылдьар, дьон олоҕор кутталы үөскэтэр кыыллар тустарынан иһитиннэриилэри төлөпүөнүнэн ылаллар:
– Биир кэлим диспетчерскэй сулууспа: +7 (4112) 44-42-51, 44-42-29;
– Дьэллик харамайдары тутар бэдэрээтчит: +7 (924) 870-00-67;
– «Дьэллик кыыллары кытта үлэлиир сулууспа» ХЭУо (СРБЖ): +7 (914) 301-65-54.