«Олоҥхо тылынан оҕо саҥатын сайыннарыы» кинигэ сүрэхтэннэ

Ааспыт нэдиэлэҕэ Дьокуускай куорат Хатас нэһилиэгин «Кэрэчээнэ» уһуйаанын төрүт култуураҕа уһуйааччыта В.Н. Старкова «Олоҥхо тылынан оҕо саҥатын сайыннарыы» кинигэтин сүрэхтэниитэ киин куорат 24 уһуйааныттан уонна Горнай улууһуттан барыта 50 истээччи кыттыылаах буолан ааста.

Тэрээһин алгыстаах алаадьынан, мустубут ыалдьыттарга уһуйаан ис тутулун, «Айыы ыллыга» барыл хайысхаларын, ол хайысхаларынан иитээччилэр үлэлэрин билиһиннэрииттэн саҕаланна. Иитээччилэр, «Кулунчук» улахан бөлөх оҕолоро кырыымпа, хомус тыаһын доҕуһуолугар олоҥхо аахтылар. Бэлэмнэнии бөлөх иитиллээччилэрэ Амелия Максимова, Надина Андреева, Таня Михайлова уонна Таня Павлова түмэли, Хатас историятын, сахалыы иһиттэри, олоҥхо куукулаларын кэпсээтилэр, иитээччилэр үлэлэрин көрдөрдүлэр. Манна эти-хааны эрчийиигэ сахалыы хамсаныылар, сахалыы дорҕоону туруорарга логопед сүбэтэ, Айыы оҕотун тоҕус сиэрин уйулҕаһыттар билиһиннэриилэрэ, сахалыы остуол оонньуулара, алгыһы оҕо күннүгэр туттуу, саха ыалын ытык маллара курдук сонун үлэлэр көһүннүлэр.

Оҕону сахалыы иитиигэ дэгиттэр таһаарыыларынан мэлдьи күүс-көмө буолар С.А. Новгородов аатынан «Айар» үөрэх уонна оҕо кинигэтин киинин методист эрэдээктэрэ, «Олоҥхо тылынан оҕо саҥатын сайыннарыы» кинигэ эрэдээктэрэ Саргылана Константинова, «Чуораанчык» сурунаал эрэдээктэр-консультана Николай Андреев санааларын үллэһиннилэр. Оҕону сахалыы иитиигэ олоҥхо суолтатын бастакынан эппит, СЭДИП - саха олох олорор үөрэҕин технология оҥорбут, «Арылы Кустук» ситим научнай салайааччыта, педагогика наукатын хандьыдаата Екатерина Чехордуна, СӨ национальнай оскуолаларын чинчийиигэ наука өттүттэн үгүс үлэни ыыппыт Диана Ефимова саҥа кинигэҕэ үрдүк сыанабылы биэрдилэр.

Олоҥхо - өй-санаа сайдыытын, саха тылын кылаан кэрэтин тутар айымньы. Ол да иһин бу тэрээһиҥҥэ кыттыбыт оҕолор саҥалара-иҥэлэрэ чуолкай, тугу кэпсииллэрин ис хоһоонун истэриттэн ылынан туран толороллор: олоҥхолууллар, кэпсииллэр, оонньууллар, көрдөрөллөр. Харахтарыгар үөрүү кыымнаах, уостарыгар мичээрдээх бэрт сэргэх дьон.