03.08.2021 | 12:30

Кланура: «Олоҕум суола бэйэм илиибэр»

Кланура: «Олоҕум суола бэйэм илиибэр»
Ааптар: Киин Куорат
Бөлөххө киир

Өрдөөҕүтэ «Куйаар дуораана» диэн ааттаах наһаа даҕаны тэтимнээх, өрө көтөҕүллүүлээх араадьыйа долгуна сэргэх кэми бэлэхтээн ааспыта. Хомойуох иһин, араадьыйаны илин эҥэрдэргэ киэһээ 11 чааска арааран кэбиһэллэрэ, дьиҥэ саамай интэриэһинэйэ түүн этэ ээ. Саамай бастыҥ ырыалар, хит ырыалар, “звездалар” түүн кэлэн эфиирдыыр буолаллара. Ол саҕана өрөспүүбүлүкэҕэ сибээс соччо-бачча сайда илигэ, арыый кыахтаах улуустар баһылыктара саҥардыы суотабай сибээһи олохтуу сатыы сылдьаллара. Дьэ, ити кэмҥэ хас иккис саха ыала тапталлаах араадьыйаны доҕор оҥостор буолара. «Куйаар дуораана» долгунугар ыччакка аналлаах наһаа элбэх интэриэһинэй биэрии баара, манна даҕатан эттэххэ, ыытааччыттан элбэх тутулуктаах буолара. Мин ордук Индираны, романтика куттаах Мичили,  Айаалы сөбүлээн истэрим уонна өссө Кланураны.
Кланура диэн ааттаах ыытааччы сүрдээх нарын куоластаах, оҕолуу ыраас саҥалаах кыыс этэ. Истээччи бу кыыһы хайдах эрэ ырыаһыт буолуох куолаастаах диэн ылынар буолара. Сотору буолаат бэрт чуумпу олохпун күлүм гынан ыллаппыт араадьыйам сабыллар аакка түспүтэ, онтон ыла Кланура диэн ааттаах кыыс аата иһиллибэт буолбута. Билигин кини ханна баарый? Араадьыйаҕа хас сыл буолан баран кэллэ? Ырыаһыт буолла дуо? диэн ыйытыктары элбэх киһи сураһар.

- Кланура, дорообо! Эн бу дьиҥнээх аатын дуо?

- Мин докуменнарбынан аатым Кланура диэн, үгүстэр псевдоним дии саныыллар, ол эрэн эриэккэс дьикти ааттаахпын. Бу ааппын эбээм биэрбитэ. Өрөспүүбүлүкэ үрдүнэн соҕотох итинник ааттаахпын дии саныыбын, амыдайдарым билиҥҥитэ суохтар.

- Хайа улуустан төрүттээххин? Дьиэ кэргэнин туһунан кэпсии түс эрэ.

- Бэйэбин икки дойдуну миэннэрэ диэн аатыыбын. Төрөөбүт улууһум – Усуйаана, улааппыт улууһум – Амма сирэ-уота. Оскуолаҕа үөрэнэрбэр икки улууһунан үөрэммитим.

Бииргэ төрөөбүт иккиэбит, эмиэ бэйэм курдук экэнэмиис идэлээх бырааттаахпын. Төрөппүттэрим иккиэн оҕону иитиигэ, үөрэҕириигэ үлэлээбит учууталлар.

- Бэйэҥ туох идэлээххиний? Ханнык идэни баһылаатыҥ?

- Икки идэлээхпин: экэнэмиис-менеджер уонна баспытаатал. Билиҥҥи туругунан, Дьокуускайга иккис идэбинэн чааһынай оҕо уһуйааныгар үлэлиибин. Кырачаан оҕолору кытта үлэлээбитим номнуо 7-с сыла буолла.

- Айар үлэҥ хаһааҥҥыттан саҕаламмытай?

- Син балай да буолла эрээри, киэҥ эйгэҕэ «ырыаhыт» быһыытынан биллибитим былырыын, 2020 сыллаахха «Саха» национальнай көрдөрөр-иһитиннэрэр хампаанньа ыытар музыкальнай «Үрдэл» бириэмийэтигэр кыттан. Ол иннинэ Клим Фёдоров тэрийбит «Ыллыыр Мыраан» лааҕырыгар сылдьан, аан маҥнай ырыа эйгэтигэр үктэммитим.

- Бэрт кылгас бириэмэҕэ «Куйаар дуораана» араадьыйа сулуһа буолан ылбытыҥ, төһө өр үлэлээтиҥ этэй? Онтон тоҕо баран хаалбыккыный?

- Урут, кырдьык даҕаны «Куйаар дуораана» диэн араадьыйаҕа үлэлии сылдьыбытым, үс сыл үлэлээн баран, араадьыйабыт улэтэ тохтообута. Ити кэмнэргэ устудьуоннуур сылларым этэ, араадьыйа эйгэтигэр бэйэм баҕаран туран тиийбитим. Наһаа даҕаны эйэлээхтик, өрө көтөҕүллүүлээхтик эдэр саас үтүө күннэрэ, устудьуон кэмнэрэ сэргэхтик ааспыттара. Мин Геяны, Айдыны, Айаалы, Индираны кытта үлэлиирим. Билиҥҥи кэми кытта тэҥнээтэххэ, оччолорго быдан атын эбит. Истээччи да элбэҕэ сүрдээх этэ, наһаа интэриэһинэй буолара. Кэмнэр ааспыттарын кэннэ, арыыдьыйаҕа эргиллэн кэлэр күннээх эбиппин. Билигин “Тэтим” араадьыйаҕа ыытааччы быһыытынан үлэлии сылдьабын.

- Араадьыйа, эн санааҕар инники дьылҕата хайдаҕа буолла?

- Истээччи баарын тухары араадьыйа үлэтэ ситимин быспакка бара туруо. Миэхэ биир үөрүүм уонна эппиэтинэһим диэн билигин, бүтүн өрөспүүбүлүкэ араадьыйатыгар үлэлиирбиттэн, истээччилэргэ үөрүү аҕаларбыттан киэн туттабын эрэ.

Билигин даҕаны «Куйаар дуораанын» истиҥник, чугастык саныыбын, дьылҕабар махтанабын хаһан эрэ ити араадьыйаҕа үлэлии сылдьыбыппыттан. Ол курдук коллегаларбытын кытары, билигин да ситиммитин быспакка өрүүтүн көрсөбүт, билсэ олоробут.

- Дьэ, эрэллээх истээччилэриҥ эйиигин артыыс, ырыаһыт быһыытынан ылынабыт, бу идэлэри эн хайдах ылынаҕын?

- Артыыс идэтэ, олоҕо биллэн турар судургу буолбатах, куруук дьон хараҕын далыгар, истиитигэр сылдьаҕын эрээри мин боростуой, көнө майгылаах киһибин.

- Холобур оҥостор ырыаһыттардааххын дуо?

- Оҕо эрдэхтэн Джастин Бибер  буолар, мин эмиэ кини курдук кыра эрдэхпиттэн ыллыахпын-туойуохпун баҕарар этим, туох да иһин инним эрэ диэки баран иһэбин. Саха эстрадатыттан киэн туттар ырыаһыттарым Виталий Очиров, Далаана, Сиэйэ уола, Байбал Сэмэнэп.

- Кланура, эйигин өссө тамада быһыытынан элбэх киһи билэр эбит ээ...

- Быыс-арыт аттарынан иллэҥ кэммэр тамадалыыбын, бу аата хоббим курдук буолар. Ыытааччы быһыытынан 10-тан тахса сыл дьарыгырдым. Уруу киэһээлэрин, үбүлүөйдэри, дьоро күннэри удамыр сыанаҕа иилээн-саҕалаан ыытабын. Улуустарга да, киин сиргэ да элбэхтик ыҥыраллар, айанныырбын ордоробун. Уопсайынан, бырааhынньыктарга сылдьарбын сөбүлүүбүн, өссө ордорорум диэн дьон үөрүүтүн бииргэ үллэстии. 

Тамадалааһын чэпчэки үлэ диэбэккин. Ол эрээри «буруйдаахтар” эрэнэн туран эйиигин таланнар тэрээһиннэрин ыыттараллар, ол инниттэн туох-баар күүскүн-уоххун, сатабылгын ууран туран  кыһамньылаахтык үлэлиигин.

- Киһи оҕо сылдьан туох  киһи буоларын ыраланан көрөр буолар дииллэр... Эн туох буолуоххун баҕарар этигиний?

- Биир тылынан эттэххэ – ырыаhыт. Оҕо эрдэхпиттэн ырыаны интэриэһиргиир этим, араас музыкальнай биэриилэри көрөрбүн сөбүлүүрүм, сулустар туһунан сурунааллары мунньар этим.

- Эн санааҕар, билиҥҥи кэмҥэ талааннаах киһини төһө өйүүллэрий, сыаналыылларый?

- Талаан баар буоллаҕына, ырыаһыт инникилээх, кэскиллээх буолар. Дьоҕура өссө сайдар. Биллэн турар сыаналыыллар, үчүгэй куолас көһүннэҕинэ, киһи өйүгэр хаалар, умнуллубат.

- Айар куттаах киһиэхэ муза диэн баар буолар. Оннук кэм эйиэхэ хаһан кэлээччиний?

- Иэйиим киирдэҕинэ ырыа айааччыбын, бэйэм айбыт икки ырыалаахпын, ол онтон биирдэстэрин ийэбэр анаабытым. Кыра эрдэхпиттэн холобур оҥостор, киэн туттар киһим – күн күбэй ийэм буолар.

- Эн санааҕар дьол диэн тугуй?

- Дьол диэн мин саныахпар киһи доруобуйата уонна күүстээх санаата, ону тэҥэ саамай чугас дьонноро аттыгар бааллара. Уонна биллэн турар, таптал.

- Арааһа элбэх киһи сэҥээрэрэ буолуо, хаһан ыал буолаҕын?

- Барыта көстөн иһиэ, ыксаабаппын, өрүү үлэҕэ охтубут киһибин. Түгэнинэн туһанан махтаныахпын баҕарабын истээччилэрбэр, сүгүрүйээччилэрбэр, эһиги эрэ баар буолан мин айабын, ыллыы-туойа, үлэлии-хамныы сылдьабын, өссө да саҥа ырыаларбын бэлэх ууна туруом! «Киин Куорат» хаһыат ааҕааччыларыгар баҕарыам этэ чөл туругу, доруобай эрэ буолуҥ, олоххут мэлдьи сырдыгынан эрэ сыдьаайдын! Хаһыат редакциятын үлэһиттэригэр улахан махталбын тиэрдэбин! Өрүү бу курдук ааҕааччыларгытын саҥа сонуннарынан үөрдэ туруҥ! Өссө да элбэх сурутааччылары! Махтанабын!

- Кэпсэтииҥ иһин махтал! Аартыгыҥ арыллан истин, айар үлэҥ таһаарыылаах буоллун.

Сонуннар

Ордук ааҕаллар

Сыана үрдээһинэ
Сонуннар | 22.03.2024 | 18:00
Сыана үрдээһинэ
(2024 сыл олунньу ыйдааҕы көрдөрүүтүнэн)
Сергей:  «Уолаттар санаалара-оноолоро харахтарыгар көстөр»
Дьон | 21.03.2024 | 18:00
Сергей: «Уолаттар санаалара-оноолоро харахтарыгар көстөр»
Оҕо сылдьан разведчиктаах киинэлэри умсугуйан көрөрбүт, кинилэр курдук буолуохпутун баҕаран, сэриилээх оонньуурбут, саһа, сыбдыйа, сыылла сылдьан өстөөхтөрбүтүн самнарарбыт.  Разведчик диэн тылы иһиттэхпинэ, тута харахпар Штирлиц уобараһа көстөр. Кини өстөөхтөр уйаларыгар тиийэн, былааннарын, дьайыыларын биһиги дьоммутугар тиэрдэн, кыайыыны ситиһэргэ улахан кылаатын киллэрсэр.   Ол аата дьиҥнээх разведчик хайдах буолуохтааҕый? Кини боростуой саллаат...
Социальнай биэнсийэ эбиллэр
Сонуннар | 16.03.2024 | 18:00
Социальнай биэнсийэ эбиллэр
Муус устар 1 күнүттэн социальнай биэнсийэ 7,5 бырыһыан үрдүүр. Бу туhунан 262 N-дээх уурааҕы кулун тутар 5 күнүгэр Арассыыыйа Бырабыыталыстыбата бигэргэттэ. Индексация кээмэйэ ааспыт сылга биэнсийэлээхтэргэ олох таһымын алын кээмэйин улаатыытынан ааҕыллар. Бу төлөбүргэ анаан социальнай пуонда бүддьүөтүгэр 37,5 млрд солк. көрүлүннэ. Статитстика көрдөрөрүнэн, Арассыыйаҕа 4 мөлүйүөнтэн тахса киһи социальнай...
Рулет арааһын астыахха
Тускар туһан | 23.03.2024 | 10:00
Рулет арааһын астыахха
Бүгүн ааҕааччыларбытыгар астыырга чэпчэки уонна судургу, ол эрээри олус минньигэс уонна тотоойу сокуускалар ырысыаптарын бэчээттиибит. Бырааһынньыктааҕы сандалыгытын киэргэтиэхтэрэ, өрөбүллэргэ сонун бүлүүдэ буолуохтара.