Иммунитеты күүһүрдэр утахтар

Сааскы кэмҥэ киһи тумуулуура, үрдэрэрэ, сыыстарара элбиир. Маныаха иммунитет күүһэ элбэҕи быһаарар. Иммунитеты күүһүрдэр биэс утах арааһын таһаарабыт. Балары ыарыыны сэрэтэр сыалтан эбэтэр ыалдьан баран түргэнник үтүөрэр туһугар оҥостон иһиэххитин сөп.

1. Моркуоп утаҕа
Минньигэс амтаннаах, сыаната чэпчэки. В, С битэмииннээх, натрий, калий,  фосфор уонна железо элбэх. Организм кислотнай-щелочной балансын тупсарар, быар үлэтин өйүүр, суон оһоҕоһу бөҕөргөтөр, ньиэрбэни уоскутар. 

2.Дөлүһүөн уута

С битэмиининэн баай, тумууну аһардарга көмөлөөх, иммунитеты бөҕөргөтөр. Дөлүһүөн отонугар аскорбиновай кислота элбэх –  моонньоҕоннооҕор 10 төгүл, лимоннааҕар 50 төгүл элбэх С битэмииннээх.

3. Облепиха чэйэ
100 г облепиха отонугар киһи сууккаҕа наадыйар иҥэмтиэлээх эттиктэрэ бааллар. Иммунитеты күүһүрдэр, мүөтү кытта истэххэ, сөтөлү эмтиир кыахтаах. Тыынар уорганнар ыарыыларыгар олус туһалаах чэй.

4. Кофе
Биир чааскы кофеҕа 1000 мг антиоксидант баар, антиоксиданнар киһи доруобай килиэккэлэрин харыстыыр күүстээхтэр. Кофе иммуннай систиэмэҕэ, аһы буһарар уорганнарга үтүө дьайыылаах. Куртах уутун элбэтэр буолан, аһы буһарарга көмөлөһөр. 

5. Брокколи сүмэһинэ

Уунан убатан иһиллэр. Сера, кальций, калий, В1 уонна С битэмиин баар – иммунитеты үлэлэтэр сүрүн эттиктэр. Маны таһынан брокколи сүмэһинэ элбэх белоктаах.