06.03.2020 | 08:45

Худуоһунньук Линда минньигэс ырысыаптара

Худуоһунньук Линда минньигэс ырысыаптара
Ааптар: Киин Куорат
Бөлөххө киир

Мин Линда Собакина диэммин, Тааттаттан сылдьабын. Бэйэм биир кыыс оҕолоохпун. Ийэм модельер, аҕам худуоһунньук. Кинилэри удьуордааан худуоһунньук үөрэхтээхпин. Таҥас дизайнын, моделлааһыны сөбүлүүбүн, дьоҥҥо сакааһынан таҥас тигэбин. Билигин оҕолору уруһуйга үөрэтэбит. Хамсаабат баайы-дуолу атыылыыр агентствоҕа салайааччынан үлэлии сылдьабын.

Дьарыгым, интэриэһим олус элбэх. Ас астыырбын эмиэ олус сөбүлүүбүн. Бүгүн ааҕааччылары кытта судургу ырысыаптарбын үллэстэбин.

Билигин астаммыт аһы аҕалан биэрэр сулууспаларынан дьон сөбүлээн туһанар. Оттон мин оннук астары бэйэм астыыбын. Сайын дойдубар тиийдэхпинэ, балтыбынаан интэриниэттэн көрө-көрө астааччыбыт.  Ону таһынан эбэбититтэн кэлбит саамай сөбүлээн астыыр бүлүүдэлэрдээхпин дьаабылыка повидлолаах бөрүөк уонна чараас тиэстэлээх чебурек.

Дьаабылыка повидлолаах бөрүөк

Тиэстэтигэр: 300 мл сылаас үүт, 1 ост.нь. доруоһа, 2 сымыыт (дьиэ температуратынан), 1/2 ч.нь. туус, 6 ост.нь. сахар, 8 ост.нь. уулларыллыбыт ынах арыыта, бурдук (төһө ыларынан). 

Начыыммытыгар: 1 баанка хойуу дьаабылыка повидлота, 1 сымыыт.   

Бу бөрүөгу ийэм олох кыра эрдэхпиттэн астыыр, минньигэс сыта дьиэ иһин бүтүннүү ылааччы, наһаа да үөрээччибит. Эбэбиттэн ийэм тиэрдибит ырысыабынан билигин бэйэм элбэхтик астыыбын.

Бастатан туран, аһытыыбытын онорорбутугар 150 мл сылаас үүккэ доруоһабытын, тууспутун уонна 2 ост.нь. саахарбытын кутан баран, сэрэнэн буккуйабыт. Аһытыыбыт тиэстэтигэр блины тиэстэтин курдук буолуор диэри бурдугу кутабыт. Уонна сылаас сиргэ сабан баран, 30 мүн. уурабыт.

Ол кэннэ сымыыттарбытын, ордубут 150 мл сылаас үүппүтүн, хаалбыт 4 ост.нь. саахарбытын кутабыт уонна аргыый буккуйабыт. Буккуйа туран ууллубут ынах арыыбытын кутабыт. Кыра-кыралаан бурдук кутан, бэрэски тиэстэтигэр тэҥнээх буолуор диэри мэһийэбит. Тиэстэбит иһиппитигэр сыстыбат буолуохтаах.

Мэһиллибит тиэстэбитин 1 чаас устата сылаас сиргэ сабан уурабыт. Тиэстэ тахсыбытын кэннэ 4/1 быһан туора уурабыт. 4/3 ылан арыылаах илиискэ күрүөлээх гына тэнитэн уурабыт уонна ол үрдүгэр повидлобытын халыҥ соҕустук сыбыыбыт. Тиэстэбит ордугун синньигэс гына бысталаан, бөрүөкпүт үрдүгэр кириэстии киэргэтэн уурабыт. Уонна сылаас оһоххо угуохпут иннинэ 15 мүн. сылаас сиргэ туруоран таһаара түһэбит. Сиикэй сымыыт уоһаҕынан бөрүөкпүтүн сотоот, сылаас оһохпутугар (200 кыраадыска) 30 мүн. устата буһарабыт.

Пицца

Тиэстэтигэр: 1 ыст.  үүт, 1/2 ч.нь. туус, 1 ост.нь. мас арыыта, 1/2 ч.нь. сода, 2 сымыыт, 500 мл бурдук.   

Начыыныгар: полукопченай халбаһы, 2-3 помидор, 1 болгарскай биэрэс, 3 ост.нь. майонез, 4 ост.нь. кетчуп ол эбэтэр томатнай паста, орто кээмэйдээх эриэппэ луук, 200 г. сыыр.       

Үүккэ сымыыттарбытын, тууспутун, арыыбытын, суодабытын кутан баран, буккуйабыт. Онтон бурдукпутун кытта кытаанах гына илиибитинэн мэһийэбит. Ол мэһийэн баран инчэҕэй тирээпкэҕэ суулаан, холодильникка 15 мүнүүтэҕэ туруорабыт.

Ол бириэмэҕэ начыыммыт састаабын чараас гына кырбыыбыт. Сыырбытын түөркэлиибит. Соуспутугар майонезтаах кетчубу туспа иһиккэ холбоон буккуйабыт (бэйэҕит баҕаҕытынан приправа эбиэххитин сөп).

Бэлэм тиэстэбитин 2 тэҥ чааска араарабыт. Икки лиискэ чараас гына тэнитэбит, кытыыларын күрүөлээн баран соуспутун иккиэннэригэр тарҕата сыбыыбыт. Ол кэннэ бастакынан промидорбутун, иккиһинэн халбаһыбытын, үсүһүнэн луукпутун, онтон биэрэспитин ууран баран,  200 кыраадыска 25 мүн. устата буһарабыт (буһара 5 мүн. хаалбытын кэннэ таһааран сыырбытын кутабыт).

Бэлэм буолбут пиццаҕа үрдүгэр укроп, петрушка эбиэххэ сөп.

Удон

450 г хаптаҕай уһун лапса, 400 г  эт (сибиинньэ, ынах этэ ордук барсаллар), 1 обургу луук, 1 кыһыл болгарскай биэрэс, 1 моркуоп, 1 сибиэһэй оҕурсу, 1 хаа фунчезаҕа анаммыт Японскай соус, 1 хаа кунжут сиэмэтэ, 100 мл соевай соус.      

Бастатан туран лапсабытын туспа ууга буһарабыт. Эппитин уонна оҕуруоппут астарын барытын соломолуу кырбаан бэлэмниибит, дьэ ол кэннэ маҥнай луугу арыыга ыһаарылыыбыт, онно моркуоппутун кутабыт, онтон –   биэрэспитин. Ол кэннэ эппитин кутан баран, эппит буһуор диэри ыһаарылыыбыт, онтон тууһуубут. Бүтэһиккэ оҕурсубутун уонна соевай соуспутун кутан баран, оҕурсу сымныар диэри буккуйа-буккуйа ыһаарылыыбыт. Бэлэм буолбутун кэннэ лапсабытын кытта холбуубут. Сойута түһэн баран фунчезаҕа анаммыт японскай соуспутун кутан, сэрэнэн үчүгэйдик буккуйабыт, 5 тэриэлкэҕэ түҥэтэн баран кунжуппутун таммалатабыт.

Япония аһа - "Гёдза"

Тиэстэтигэр: 1 ыст. итии уу, 1 ч.нь. туус, 1 ост.нь. мас арыыта, 350 г бурдук.

Начыыныгар: 300 г эриллибит эт (сибиинньэ эбэтэр ынах этэ), 1,5  пекинскай хаппыыста, 0,5 кыһыл аһыы биэрэс, күөх луук, 2 ост. нь. соевай соус, 1 ост.нь. мас арыыта, 2 ост.нь. уу, 1,5 ч.нь. туус, хара биэрэс, улахан тарбах саҕа сибиэһэй имбирь.

Соуспутугар: 5 ост.нь. соевай соус, 1 ост.нь. мас арыыта, 2 чеснок өлүүскэтэ, 0,5 кыһыл аһыы биэрэс, сибиэһэй имбирь (чеснок өлүүскэтин саҕа).

Сылаас ууга тууспутун суурайабыт. Бурдукпутун дириҥ миискэҕэ барытын кутан баран ортотун хаһан, ол иһигэр итии уу кутан тиэстэ мэһийэбит. 20-чэ мүн. пакекка уган, туора уура түһэбит.

Ол кэмҥэ начыыҥкабыт ингредиеннарын барытын бытархай гына кырбаан холбуубут. Онтон мас арыытын, имбирь, соус кутабыт. Бу фаршпыт эмиэ 20-чэ мүнүүтэ сынньаныахтаах.

Тиэстэбит сынньаммытын кэннэ 2 тэҥ чааска араарабыт. Биир аҥаарыттан 20 устууга таһаарааччыбын. Кыра гына төкүнүтэн баран, скалканан тэниччи хаптатыахха сөп. Эбэтэр биир улахан пласт хаптатан баран, 19 см диаметрдаах төгүрүктүү быһыахха сөп.

Биир эрэ өттүн бүк тутан, хаартыскаҕа көстөрүн курдук кырыһыабайдык суулуубут. Аннын арыыга ыһаарылыы түһэн баран, уу кутан биэрэн буһарабыт. Пельмень улахан аҥаарыгар диэри уунан кутабыт, хаппахтаан 5-7 мүн буһарабыт. Онтон хаппаҕын ылан, уута көтүөр диэри туруорабыт.

Соуспутун оҥорорбутугар састаабын барытын холбуубут. Гедзаларбытын тэриэлэкэҕэ ууран остуолга биэрэрбитигэр, үрдүгэр кунжут таммалатабыт.

Пончик

300 г бурдук, 80 г саахар, 1 бакыат доруоһа, 1 ч.нь. туус, 1 сымыыт, 250 г үүт, 40 г ынах арыыта, лимон эбэтэр апельсин цедрата, 1 ч.нь. ванилин, 1 ч.нь. мас арыыта.

Бурдугу, саахары, доруоһаны кураанахтыы холбуубут. Онтон үүт, сымыыт, арыы эбэбит. Тиэстэ мэһийэн баран, 1 чаас туруорабыт. Оччоҕуна тиэстэбит икки бүк эбиллиэхтээх.

1 см халыҥнаах гына хаптатан баран, ыстакаанынан төгүрүктүү быһан арыыга ыһаарылыыбыт.

Сонуннар

Ордук ааҕаллар

Дьоҕур-талаан арыллыыта
Спорт | 26.01.2023 | 18:00
Дьоҕур-талаан арыллыыта
Дьиҥинэн, Орто дойдуга кэлбит киһи барыта туохха эрэ дьоҕурдаах, талааннаах. Дьэ, ол арыллара, туттуллара дэбигис кыаллыбат. Ону үрдүк үөһээ айыыларбыт бэйэлэрэ быһааран эрдэхтэрэ. Биллэн турар, улаханнык сыраластахха, күнү-дьылы бараатахха, сүрэхтээх-бэлэстээх, туруу үлэһит, айылҕаттан айдарыылаах буоллахха эрэ дьоҕур, талаан кэлиэн сөп. Дьөгүөр Картузов, дьэ, кырдьык, айылҕаттан хатаҕаламмыт киһи. Тыа киһитин сиэринэн...
Сардаана Токоемова:  «Иистэн дуоһуйууну ылабын...»
Дьон | 28.01.2023 | 16:00
Сардаана Токоемова: «Иистэн дуоһуйууну ылабын...»
Иис сахаларга урут-уруккуттан хааммытыгар баар. Билигин биһиги ортобутугар талааннаах иистэнньэҥнэр, норуот маастардара аҕыйаҕа суохтар. Кустуктуу субуллар оһуор быысапкалары, сахалыы тыынынан илгийэр кылтан, сиэлтэн оҥоһуктары, туостан көбүөрдэри, сэлээппэлэри, халадаай былаачыйалары, оноолоох соннору, хаһыаччыктары о.д.а. саха дьахталлара ис сүрэхтэриттэн тигэллэр. Бу тигиилэргэ төһөлөөх дууһа сылааһа ууруллубута буолуой диэн киһи сөҕө эрэ саныыр....
Мөлүйүөҥҥэ тиийэ иликпит
Сонуннар | 21.01.2023 | 17:00
Мөлүйүөҥҥэ тиийэ иликпит
Сахастат 2022 сыл түмүгэр 2021 сыллаахха ыытыллыбыт (2020 сыллаахха ковид ыарыынан сибээстээн көспүтэ) нэһилиэнньэ биэрэпиһин барыллааһын түмүгүн таһаарбыта.  Саха сирин нэһилиэнньэтин ахсаана: 995,7 тыһ. киһи  (2022 сыл тохсунньу 1 күнүгэр 992 115 киһи этэ)
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Куорат олоҕо | 01.02.2023 | 17:00
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Дьокуускай куорат историятыгар аан бастаан 990 миэстэлээх улахан оскуола аны күһүн үлэҕэ киириэхтээх.  990 миэстэ диэн бырайыактаммытынан уйунар кыаҕа буоларын өйдүөххэ наада. Киин куораппытыгар миэстэ тиийбэт кыһалҕата баарын тухары оскуолаларбыт 2-3 төгүл ноҕоруускалаах, иккилии симиэнэнэн үлэлии олоруохтара турдаҕа. Онон бу саҥа оскуолаҕа балтараа тыһыынчаҕа тиийэ оҕо үөрэнэрэ буолуо диэн барыллаан...