Хас биирдии оҕо уратытын учуоттуубут

«Харысхал» аһымал пуондата доруобуйаларыгар хааччахтаах оҕолорго үгүс үлэни ыытар. Бырайыага элбэх, барытын ааҕан сиппэккин. Бүгүн пуонда ураты оҕолору кытта үлэтин кылгастык билиһиннэрэбит.

Нюргуяна Попова, «Харысхал» аһымал пуондата инклюзивнай бырайыактарын салайааччыта:

– Быйыл «Харысхал» аһымал пуондата төрүттэммитэ 10 сыла буолла. Билигин биһиги пуондабыт иһинэн «Чудеса кино» медиа-анимационнай устуудьуйа уонна  «Маленький принц» театр-устуудьуйа үлэлииллэр. Бу куруһуоктар хара маҥнайгыттан тэриллибиттэрэ уонна суолларын-иистэрин номнуо буллулар.  «Чудеса кино» устуудьуйа икки хайысханан үлэлиир. Ол курдук, куруһуок курдук мэлдьи дьарыктанар оҕолордоохпут. Ону таһынан баҕалаах оҕолорго (бөлөхтөргө арааран) маастар-кылаастары ыытабыт.

– Ити икки устуудьуйа туһунан кылгастык кэпсии түһүөҥ дуо? Оҕолор хас саастарыттан дьарыктаналларый? Туох ситиһиилээххитий?

– «Маленький принц» – оҕолор айар дьоҕурдарын арыйар аналлаах куруһуок. Сыл аайы саҥа испиктээкиллэри туруорабыт. Оҕолорбут өрөспүүбүлүкэтээҕи, Арассыыйатааҕы, норуоттар икки ардыларынааҕы куонкурустарга ситиһиилээхтик кытталлар.

«Чудеса кино» устуудьуйаҕа 6-тан 18-гар диэри саастаах оҕолор дьарыктаналлар. Салайааччы саастарынан бэйэтэ көрөн наардыыр, сорудахтары биэрэр. Биллэн турар, хас биирдии оҕо уратытын учуоттуур.

Театрбытыгар 6-тан 14-гэр диэри саастаах оҕолор дьарыктаналлар. Хара бастакыттан сылдьыбыт оҕолор номнуо улааппыттара, бэйэлэрин артыыс курдук сананар буолбуттара. Онон «Алгыс» диэн инклюзивнай театр туспа НКО быһыытынан тэриллибитэ.

Маны таһынан «Дзен» диэн устуудьуйаны кытары иккис сылын үлэлиибит. Салайааччы аҕыйах оҕону бэйэтэ сүүмэрдээн дьарыктыыр. Сороҕор маастар-кылаастары ыытар. Онон биһигини кытта үлэлиэн баҕалаах дьону кытта араас бырайыактары толкуйдаан олоххо киллэрэбит. Уопсайынан, хас биирдии исписэлииспит оҕо уратытын таба көрөн, учуоттаан үлэлиир.

– Быйыл үбүлүөйдээх сылгытын хайдах бэлиэтээтигит, ханнык тэрээһиннэри ыыттыгыт?

– Сыл устата тэрээһиннэрбит үбүлүөйбүт чэрчитинэн ыытылыннылар. Пандемиянан сибээстээн хайдах даҕаны киэҥ далааһыннаахтык бэлиэтиир кыахпыт суох.   

Инбэлиит, доруобуйаларыгар хааччахтаах оҕолору кытта үлэлэһэр педагогтарга семинардары ыытабыт, бэйэбит уопуппутун атастаһабыт, билиибитин үллэстэбит. 

Колл-кииммит нүөмэрэ: 705-887

Пресс-сэкирэтээр Екатерина Винокурова кэпсээбитинэн, бу күннэргэ “Олоҕу таптыыбын” уонна “Харысхал” аһымал пуондалара кыттыһан, киин куорат оскуолаларыгар, үрдүк үөрэх кыһаларыгар, волонтердар кииннэригэр уонна көннөрөр холуонньаларга “Доҕордоһуу уонна Үтүө санаа нэдиэлэтэ” диэн тэрээһини ыыталлар. Онон “Харысхал” үлэтэ үгүс, былаана киэҥ, бырайыага баһаам.