Дмитрий Петров: «Дьарык тохтообот!»

“Дыгын оонньууларын” күрэҕин кэтэһэн-кэтэһэн баран, дьэ, икки күн устата күөх экрантан арахпакка олорон көрдүбүт. Бары билэрбит курдук, ыраас кыайыыны Хаҥалас хотойо Егор Филиппов ылла.

Хас биирдии көрөөччү, бэйэтин фаворитыгар күүс-көмө, тирэх буолла. Бу сырыыга спорт саҥа сулустарын, кинилэр кимнээхтэрин туһунан сырдатабыт.

- Бүлүү улууһун Тааһаҕар нэһилиэгэр төрөөбүтүм. Бииргэ төрөөбүттэр алтыабыт, ыал улахан оҕото буолабын.

Спортка уруккуттан сыстыгас соҕуспун. Сүрүннээн баскетболунан, волейболунан дьарыктанарым. Ыһыахтарынан хас сайын ахсын ыстаныыга, сүүрүгэ, хапсаҕайга куоталаһан көрөөччүм. Алтыс кылааска оҕо спортивнай оскуолатыгар үөрэнэ сылдьаммын, буоксанан дьарыктаммытым.

- Дмитрий, туох идэлээххин, ханна үлэлиигин?

- Өктөмнөөҕү тыа хаһаайыстыбатын академиятын филиалыгар агроном идэтин ылбытым. Идэбинэн Хаҥалас улууһун Хачыкаат нэһилиэгэр үлэлии сылдьыбытым, билигин Дьокуускайга “Хозмаркет” атыы-эргиэн киинигэр үлэлии сылдьабын.

- Син биллибитиҥ ыраатта, “Боотур” кулуубка хайдах кэллиҥ этэй?

- Алҕас кэлбитим. Бииргэ үлэлиир кэллиэгэм Ариан Слепцов “Боотур” кулууб салайааччыта Уйбаан Белолюбскай саҥа, эдэр уолаттарга күрэхтэһии оҥороору сылдьар диэбитэ. Ариан эмиэ бэйэтин холонон, күрэхтэһээри сылдьар этэ. Хайдах эрэ, бэйэбин тургутан көрүөхпүн баҕарбытым. Сотору буолаат Иван Прокопьевич ыҥырбыта. Биллэн турар, улахан дьарыгым да суох, формам да суох. Күрэхпит саҕаланан, мин сүүрбэ хаһыс эрэ миэстэ буолбутум. Дьарыктанар баҕаттан Уйбааҥҥа бэйэтигэр тиийэммин, тылланан дьарыктаныахпын баҕарабын диэн эппитим, оннук курдук кыахтаах, күүстээх эр бэрдэрин кытта биир саалаҕа эрчиллэн дьарыкпын саҕалаабытым. Номнуо, быйыл үһүс сыла буолар.

Чөл олоххо сыстан, доруобуйа көннөрүнэн, өй-санаа өттүнэн улаатан бэйэбин атын суолга таһаардым дии саныыбын. Иван Прокопьевич дьарыктанар уолаттарын спордунан эрэ угуттаабакка,  олох ханнык баҕарар боппуруоһугар, көстүүтүгэр үөрэтэр, сүбэлиир-амалыыр, аҕабыт кэриэтэ киһибит. Дьарыктаныам иннигэр 105 киилэлээх этим, билигин 84-85 буолан оннубар сылдьабын диэхпин сөп.

- Спорт эйиэхэ ханнык хаачыстыбаны иҥэрдэ?

- Инники сылларбын кытта, билиҥҥи кэми тэҥнии туттахпына билигин барытын сааһыланабын, туспа режимнээхпин, аспын-үөлбүн барытын көрүнэбин. Спорт хаачыстыбата элбэх буоллаҕа. Холобура, ыараханы тулуйуу, бэрээдэк, чөл турук, чэгиэн буолуу, уйулҕа да өттүнэн киһини уларыта тутара элбэх.

- Быйылгы күрэҕи хайдах сыаналыыгын?

- Быйылгы сезоҥҥа бэйэм көрдөрүүлэрбин куһаҕана суох дии санаатым. Былырыыҥҥыттан лаппа үчүгэй. Дыгын оонньуутугар ситэ аһыллыбатым быһыылаах, күрэххэ арааһынай туох барыта буолар, ону киһи туох да диэбэт.

- Эдэр киһи буоллаҕыҥ, бэйэҥ саастыылаахтаргар эйигин холобур оҥостор уолаттарга тугу баҕараҕын?

- Бэйэҕит олоххутугар сыаллаах-соруктаах, чөл өйдөөх, былааннаах олоруҥ. Хараахтардаах уонна тулуурдаах  буолуҥ. Бэйэҕит итэҕэлгитин, төрүт дьарыккытын, дьоҥҥутун-сэргэҕитин ытыктааҥ. Эйэ дэмнээх буолуҥ, куһаҕан дьаллыкка ылларымаҥ, арыгыны уонна табааҕы эккирэтимэҥ. Чөл туруктаах сылдьаргытыгар уонна спортка сыстаргытыгар баҕарабын.

- Билигин туох былааннааххын?

- Дойдубар тахсан бултуом, балыктыам, сэниэ ылыам. Уонна онтон эһиилги Дыгыммар бэлэмнэнэн саҕалыыбын. Куруук дьарыкка сылдьар буоламмын, этим-хааным бэйэтэ ирдиир буолбут, тохтотон кэбиһэрим кыаллыбат.