Дьиэтээҕи эмтиэкэ

Лавровай сэбирдэх дьиктилэрэ

Айаҕыҥ иһэ сыттанар эбэтэр бааһырар буоллаҕына, күҥҥэ хаста да лавровай сэбирдэҕи ыстаа. Ол кэнниттэн биир чаас кэриҥэ аһыыртан, ууну иһэртэн туттун.

Оҕоҥ кыраттан өрүкүнүйэр итиэннэ кыайан утуйбат буоллаҕына, сыттыгар лавровай сэбирдэҕи тигэн кэбис. Бу үүнээйи сыта валериана силиһинээҕэр ордук уоскутар.

Дьаҥ-дьаһах турбут кэмигэр лавровай сэбирдэҕи ылан оргуйа турар ууга уган, 15 мүнүүтэ оргут. Нэлэгэр тэлиэркэҕэ кутан остуолга уур. Өр-өтөр буолуо суоҕа, дьиэҥ иһэ лавровай сытынан дыргыйыа, ону кытары салгыҥҥа тарҕаммыт ыарыы бактыарыйата өлбүтүнэн барыа.

Атаҕыҥ сыттанар буоллаҕына, 30 устуука сэбирдэҕи биир ыстакаан оргуйбут ууга уган, 3 чаас устата туруор. Онтон таастаах ууга кут уонна атаххын 10 мүнүүтэ устата тутан олор. Атаҕыҥ ууланара, сыттанара аматыйыа.

Биэс сэбирдэҕи үлтүрүтэн, 200 мл 40% этиловай испииргэ хас да күн көйүөр. Маны сиидэлээн, сирэйи сотто сырыттахха, хатаал сыыйа сүтэр.

Харахха кэлтэһэ таҕыстаҕына үс сэбирдэҕи 200 мл оргуйбут ууга 20 мүнүүнэ көөнньөрөн, күҥҥэ алтата кыра-кыратык иһиллэр. Сарсыныгар кэлтэһэ суох буолуо.

Дьиэҕэ-уокка, сүөһүгэ-сылгыга сыһыаннаах сүбэлэртэн

Кыа отун уматан, ол буруотунан тэллэйдэнэр дьиэлэри, умуһаҕы ыһаарыҥ. Күлүн муоста анныгар сииктээх сиргэ кутуҥ. Уута, сиигэ тардыа.

Туос иһиттэри эмиэ кыа от буруотунан ыыһааҥ, оччотугар кутуллубут үүт аһыйбат.

Тэтиҥ хатырыгын оргутан, ынах, сылгы, дьиэ кыылларын тириилэрин сууйан, иһэрдэн үөннэрин өлөрүҥ.

Сүөһү модьууна собо балык өлүн сиикэйдии, тэҥ-тэҥэ тууска булкуйан маас оҥорон, сотон-сыбаан эмтэнэр.

Кутуйах сылдьар сиригэр сугун абаҕатын уматан, буруолатан уураллар. Кутуйах мэлийэр, суох буолар, сытын абааһы көрөн чугаһаабат.

«Отунан-маһынан эмтэнии” бөлөхтөн