Дьэллик ыттары ... дьэллик сылгылар солбуйаллар

Сэтинньи 14 күнүгэр социальнай ситимнэргэ куорат киинигэр сылгы үөрэ мэнээктии сылдьар хаартыскалара тарҕанна.
Дьэллик дьиэ кыылларын тутааччылар куорат 1 №-дээх поликлиникатын кэнниттэн 9 сылгыны тутан, Дьокуускайдааҕы кыыллары быстах кэмҥэ көрөр-истэр пууҥҥа илдьэн туттардылар, хаһаайын кимэ быһаарыллыбыт, диэн иһитиннэрэр Олохтоох дьаһалта пресс-сулууспата.
Санатар буоллахха, Пуунтан кыылы төттөрү ылыы ороскуотун хаһаайын бэйэтэ уйунар (кыылы тутан аҕалбыт, көрөн-истэн, аһатан туруорбут өҥө барыта төлөбүрдээх).
СӨ Административнай буруйу оҥоруу кодексатын 5.4 ыст.  эппиэтинэскэ тардыллар, ыстараап төлүүр.
Бэлиэтээн эттэххэ, Саха сиригэр дьиэ кыылларын көрүү-истии, харайыы быраабылатынан:
* Дьиэ кыылын иитээччилэр санитарнай-ветеринарнай нуормалар ирдэбиллэрин толоруохтаахтар, дьоҥҥо куттал суоһаабатын ситиһиэхтээхтэр, кыыллара уопсай сирдэри киртиппэтин мэктиэлиэхтээхтэр уонна хааччыйыахтаахтар.
* Дьиэ кыылын дьаарбатарга, босхо ыытарга атын кыылларга, дьон доруобуйатыгар итиэннэ бас билиитигэр туох да куттал суоһуо суохтаах. Дьиэ кыыллара маныаха анаммыт эрэ сирдэргэ дьаарбатыллыахтаахтар.
* Чааһынай бас билэр территориялаах, тиэргэннээх дьон ыттарын тиэргэн эрэ иһигэр көҥүл ыыталлара эбэтэр баайан туруораллара көҥүллэнэр, ыт бэйэтин территориятыттан халбарыйар, суолга сүүрэн тахсар кыаҕа суох буолуохтаах.
* Олорор дьиэттэн ыты уопсай тиэргэҥҥэ уонна уулуссаҕа хайаан да томторуктаах уонна хонтуруолланар усталаах быалаах таһаарыллыахтаах. Бу ирдэбил 35 см намыһах уҥуохтаах ыттарга сыһыана суох.
* Племенной боруода быһыытынан ураты сыаннаһа суох кыылларга, элбэхтик төрөөн-ууһаан, көрүүтэ-истиитэ суох хаалар төрүөҕү биэрбэтиннэр диэн, стерилизациялааһын миэрэтэ хайаан да ылыллыахтаах.
* Сыллата дьиэ кыылын ветеринарнай тэрилтэҕэ илдьэн ииригирии ыарыытын утары быһыы туруортарыллыахтаах.

Оттон бэйдиэ сылдьар, дьон олоҕор кутталы үөскэтэр кыыллар тустарынан иһитиннэриилэри төлөпүөнүнэн ылаллар:
– Биир кэлим диспетчерскэй сулууспа: +7 (4112) 44-42-51, 44-42-29;
– Дьэллик харамайдары тутар бэдэрээтчит: +7 (924) 870-00-67;
– «Дьэллик кыыллары кытта үлэлиир сулууспа» ХЭУо (СРБЖ): +7 (914) 301-65-54.