Болҕойуҥ! «Сандал саас» хаартысканан куонкурус!

Бүгүҥҥү нүөмэрбитигэр бастакы кыттааччыларбытын билиһиннэрэбит. Кырачаан ааҕааччыларбыт сааскы ылааҥы күннэрин айылҕаҕа атааралларын ордороллор. Альберт, Эдик, Ярик Атласовтарга дьоллоох оҕо сааһы баҕарабыт!

Кыттыҥ уонна кыайыҥ!

Сандал сааспыт күлүм-чаҕыл оонньоон тиийэн кэлбитэ үчүгэйин! Сырылыырга, хаҥкылыырга, салааскалыырга бэртээхэй күннэри мүччү тутумаҥ! Дьиэ кэргэнинэн сынньалаҥҥытын, оонньуу-көрүлүү сылдьаргытын хаартыскаҕа түһэрэн ыытыҥ, биһиги күрэхпитигэр кыттыҥ! 
Усулуобуйата бэрт судургу. Дьиэ кэргэнинэн, кылааһынан, баҕар, түөрт атахтаах доҕотторгутунуун түһүөххүтүн сөп. Дьиэ таһыгар, болуоссакка, пааркаҕа, катокка, тыаҕа, өрүскэ – ханна баҕарар! Сүрүнэ – сааскы кэрэ көстүү баар буолуохтаах.  
Хаартыскалары кулун тутар 10 күнүттэн ыам ыйын 27 күнүгэр диэри kiin-kuorat99@mail.ru электроннай почтаҕа тутабыт. Толору ааккытын-суолгутун, олорор сиргитин, оҕо уһуйаанын (оскуолатын), төлөпүөҥҥүт нүөмэрин, электроннай почтаҕытын ыйаҕыт. Хаартыскаларгытын kiin-kuorat99@mail.ru электроннай почтаҕа “Куонкуруска” диэн бэлиэтээн ыытаҕыт. 
Күрэххэ киирбит хаартыскалар хаһыакка уонна сайтка тахсыахтара.   Кыттааччыларга барыларыгар туоһу сурук ыытыллар. Кыайыылаахха өйдөбүнньүк бириис уонна грамота туттарыллар.    

Өрөбүл күннэрбитин “Үрдэл” уонна Төхтүр пааркаҕа атаарарбытын сөбүлүүбүт. Альберт Атласов, 2 “в” кылаас, Саха политехническай лицей.

Халлаан сылыйан, уу-хаар элбээн, оонньуурга бэртээхэй буолбут!  Эдик, Ярик Атласовтар, “Ивушка” уһуйаан иитиллээччилэрэ, Дьокуускай куорат.