«Бииргэбит» аһымал дьаарбаҥка
![«Бииргэбит» аһымал дьаарбаҥка](https://kiinkuorat.ru/wp-content/uploads/2024/02/3kXwr4nBFR.jpg)
Аһымал дьаарбаҥка “Саллаакка сурук” диэн биир сүрүн аахсыйатыгар ким баҕалаах кыттан, анал байыаннай дьайыыга сылдьар саллаакка сурук суруйан, волонтердар көмөлөрүнэн өйөбүл тылларын тиэрдиэн сөп. Манна Дьокуускайдааҕы 26-с №-дээх оскуола үөрэнээччилэрэ көхтөөх кыттыыны ыллылар. Оҕолор саллааттарга сурук ыытары таһынан, Аҕа дойду Улуу сэриитин кыттыылаахтарын суруктарын туһунан дакылааттарын интэриэһиргээбит ыалдьыттарга кэпсээтилэр.
Христина Чусовская, 26 №-дээх оскуола түмэлин уонна “Кыһыл следопыт” көрдүүр-чинчийэр кулууп салайааччыта:
— Кулууппутугар оҕолор бэһис кылаастан саҕалаан сылдьаллар уонна сэрии кыттыылаахтарын туһунан сибидиэнньэлэри хомуйаллар. Бүгүн биһиги 3 уонна 5 кылаас оҕолоро суруйбут 50 суругу туттара кэллибит уонна 1941-1944 сс. сержант Гавриил Дербасов сэрии толоонуттан ыыппыт суруктарын туһунан кэпсээтибит. Биһиги үөрэнээччилэрбит араас научнай-практическай кэмпириэнсийэлэргэ ситиһиилээхтик кытталлар. Холобура, бу чинчийиибитинэн Бүтүн Арассыыйатааҕы “Биллибэт саллаат” куонкуруска кыттан грант сүүйбүппүт.
Дьаарбаҥка кэмигэр ыалдьыттар «Саллаакка сурук» аахсыйаны таһынан маскировочнай сетканы, сылгы сиэлиттэн харысхал оҥорууга уо.д.а. маастар-кылаастарга кытыннылар. Тэрээһин кыттааччыларыгар анаан ырыаһыттар уонна үҥкүү бөлөхтөрө кэнсиэр көрдөрдүлэр.
«Бииргэбит» аһымал аахсыйаны Дьокуускай куорат Уопсастыбаннай палаатата уонна “Саха-волонтер” уопсастыбаннай тэрилтэ ыыттылар. Ону таһынан “Боевые шелкопряды Якутии”, “Дьокуускай куорат дьахталларын лигата”, “Волонтер медиктэр”, “Аҕа сэбиэтэ” хамсааһыннар кыттыыны ыллылар. Байыастарга көмөлөһүөн баҕарар куорат олохтоохторо ас-үөл, таҥас-сап, туттар мал-сал эгэлгэтин атыылаатылар. Атыыттан киирбит харчы барыта анал байыаннай дьайыы кыттыылаахтарыгар өйөбүл буолуоҕа.
Сонуннар
Ордук ааҕаллар
![Мария Мигалкина: «Кэлии сиэмэлэринэн үлүһүйүмэҥ»](/thumbnails/600/300/wp-content/uploads/2024/07/zgV1bKwtkp.jpg)
![Изабелла Попова: Сүрэхпэр сөҥөрбүт дьүөгэлэрим](/thumbnails/600/300/wp-content/uploads/2024/07/08bzwt1DHL.jpg)
![Баһаар буруйдааҕын тыллыаҥ — наҕараада ылыаҥ](/thumbnails/600/300/wp-content/uploads/2024/07/FtpkFiKGrd.jpg)
![Саха сиригэр мелиорация үлэтэ саҕаламмыта 75 сылын туолла](/thumbnails/600/300/wp-content/uploads/2024/07/6LP5o124wA.jpg)