Биир хонук хаалла!

Судаарыстыбаннай өҥөлөр порталларыгар сайабылыанньаны эрдэттэн суруйан (черновик) бэлэмниэххэ сөп. Оччоҕуна муус устар 1-кы күнүгэр үлэ чааһа саҕаланаатын кытта Госуслугабытыгар киирэн “отправить” эрэ диэн баттыахпытын наада буолар.

Муус устар 1 күнүгэр оскуолаҕа киирии бастакы түһүмэҕэ саҕаланар – прописканан эрэ ылыы. Былдьаһыгынан барар миэстэлээх оскуолаларга ким бастаан кнопканы баттаабыт эрэ тиксэр. Пропискалаахпыт эрэ диэн эрэх-турах сананан кэбиһэр эмиэ сыыһа.

Дьокуускайга быйыл 51 оскуола маҥнайгы кылааска киирээччилэртэн сайаапка тутар. Муниципальнай оскуолалары сэргэ киин куораппытыгар 5 чааһынай оскуола баар:

- ИП Карамзина Т.И., «Гран» начаалынай оскуола;

- ИП Бурнашев А.А., "САХАТ" чааһынай оскуола (Манна сахалыы эрэ үөрэтэллэр, гендернэй кылаастардаахтар);

- Дьокуускай куорат гуманитарнай лицейэ АОНО;

- "Восточно-Сибирский лицей" НОУ;

- «Точка развития» чааһынай оскуола.

Бары лицензиялаахтар, орто үөрэхтээһининэн дьарыктанар көҥүллээхтэр.

Маны таһынан судаарыстыбаннай үөрэх тэрилтэлэрэ бааллар:

- Дьокуускайдааҕы педколледж начаалынай оскуолата (манна эмиэ прописканан ылаллар, эбии тургутан көрүүлээхтэр).

- 4 коррекционнай оскуола-интэринээт үлэлиир.

Дьокуускайга ким да оскуолата суох хаалбат. Арассыыйа гражданнара бары орто оскуола үөрэҕин босхо ылар бырааптаахтар – ол бырааптара хаһан да күөмчүлэммэт. Оскуолаҕа киирии иккис түһүмэҕэ бэс ыйыгар саҕаланар – онно пропискаларынан сатаан баппатахтар, пропискаларыттан ураты атын сиргэ баар оскуолаҕа киириэн баҕалаахтар сайабылыанньаларын көрөллөр.