05.06.2024 | 10:14

«Азия оҕолоро» оонньууларга бэлэмнэнии хаамыыта

Репортаж
«Азия оҕолоро» оонньууларга бэлэмнэнии хаамыыта
Ааптар: Айталина СОФРОНОВА
Бөлөххө киир

Саха сирин Бырабыыталыстыбатын бэрэссэдээтэлэ Кирилл Бычков уонна Дьокуускай куорат баһылыга Евгений Григорьев VIlI-с “Азия оҕолоро”  Оонньууларга Дьокуускай куораты бэлэмнээһин боппуруостарыгар мунньаҕы тэрийэн ыыттылар. 
Кирилл Бычков Ленин проспегар, Орджоникидзе болуоссатыгар уонна Петр Алексеев уулусса дьиэлэрин эркиннэрин саҥардыы үлэтин бэрэбиэркэлээтэ.

Орджоникидзе болуоссата

Орджоникидзе болуоссата куораппыт биир саамай дьон тоҕуоруһа мустар сирэ. Бу эбийиэккэ аспаал хайа барыыта, абырах үлэтэ барыта түмүктэммит, тротуар билиитэтин тэлгэтии уонна кыра өрөмүөн ситэриллибэккэ турар. Маны таһынан 12 тыһыынча сибэкки олордуулаах көҕөрдүү оҥоһуллуоҕа.

Кырдьаҕас куорат

Кырдьаҕас куорат искибиэригэр мас уонна бетон билиитэлэр таҥыллан оҥоһуллубуттар, тротуары көтүрүү үлэтэ ыытыллар. Бүгүҥҥү күҥҥэ бэдэрээтчиттэр суол ньуурун тэҥнииллэр, саҥа билиитэлэри тэлгииллэр.

Сайсары күөлэ

Сайсары эбэҕэ бу күннэргэ үлэ күөстүү оргуйар. Күөл кытыытыгар күүлэйдиир зонаттан ураты «Триумф» спорт уораҕайын аттыгар оҕо спортивнай балаһааккаларын, бэлисипиэт суолун уо.д.а. эбийиэктэри тутуохтара.

«Триумф» спортивнай бэлэмнэнии киинин фасада, хоруобуйаны саҥардыы үлэтэ, эрчиллэр саалалары өрөмүөннээһин, уларыттар сирдэр уонна тэхиньиичэскэй хааччыйыыны тупсарыы үлэлэрэ түмүктэннилэр.

Манна даҕатан эттэххэ, Сайсары уокуругар Макаренко уулуссатын хапытаалынай өрөмүөнэ күүскэ ыытыллар. Итини таһынан уокуругу көҕөрдүүгэ улахан болҕомто ууруллар. Муниципальнай хантараагынан манна 800-тэн тахса күөх үүнээйи олордуллуоҕа.

“Зеленый рай” экологическай тэрилтэ дириэктэрэ Анна Тихонова иһитиннэрбитинэн, үүнээйилэр бары кинилэр питомниктарыттан кэлэллэр. Хайыы үйэ миэтэрэҕэ тиийэ үрдүктээх үүнээйилэр бу күннэргэ олохтоох миэстэлэрин буолуохтара.

Уулусса-суол ситимэ

Манна даҕатан эттэххэ, Олохтоох дьаһалта тырааныспарга уонна суол хаһаайыстыбатыгар управлениетын салайааччыта Василий Амбросов иһитиннэрэринэн, «Азия оҕолоро» Оонньуулары көрсө куорат суолларыгар эмиэ баараҕай өрөмүөн барар турар. Ол курдук, бэс ыйын 3 күнүнээҕи туругунан, дьаама өрөмүөнэ 61% туолбутун бэлиэтээн турар. Бу күннэргэ уулусса-суол ситимигэр дьаама абыраҕын үлэтэ Сэбиэскэй Аармыйа 50 сыла, Лермонтов, Каландаришвили уонна Ярославскай уулуссаларыгар, Ленин проспегар бара турар. Бэдэрээтчиттэр сүктэриллибит соруктарын бэс ыйын 19 күнүгэр диэри толорор эбээһинэстээхтэр.

«Туймаада» стадион

«Туймаада» стадиоҥҥа үлэ улахана түмүктэммит. Саҥа газон тэлгэнэн, сүүрэр суол сөргүтүллэ сылдьар. Стадион иһигэр Кирилл Бычков баһаарынай сигнализацияны уонна спортсменнар таҥнар сирдэрин бэрэбиэркэлээтэ.

«Үлэ таһаарыылаахтык бара турар. Сорох эбийиэктэргэ спортсменнар эрчиллиини ааһыахтара, ол аата оонньуулар сүрүн тэрээһиннэрэ саҕалыан иннинэ. Билигин бытархай итэҕэстэри туоратыы бара турар, сүрүнэ бүттэ. Норуоттар икки ардыларынааҕы күрэхтэһиилэргэ сертификацияламмыт, үрдүк хаачыстыбалаах матырыйааллар ирдэнэллэр. Төһө даҕаны санкция хааччахтара баалларын үрдүнэн, ирдэниллэр матырыйааллары барытын аҕаллыбыт. Манна даҕатан эттэххэ, Олимпийскай стандартарга эппиэттир сүүрэр суоллар, бөрүөһүннэр оҥоһулуннулар», - диэн Кирилл Бычков бэлиэтээтэ.

Эбэн эттэххэ, бу күннэргэ Дьокуускай куорат 9 ДЮСШ хапытаалынай өрөмүөн түмүктэнэн эрэр (№1а, 1б, №2, №3, №5, №8, №4а, №4б, № 6).

Хапыталааныай өрөмүөн биир бастакынан В.П. Керемясов аатынан 3№-дээх ДЮСШ түмүктэннэ. Дьиэ иһэ, үрдэ кырааскаланан, уота, баһаарынай сигнализацията уларытыллан, сауна, душ кабиналара, санузеллар өрөмүөннэнэн, ааннар саҥардылланнар, пандус оҥоһуллан, эбийиэк аҕыйах хонугунан эдэр спортсменнары көрсөргө бэлэм.

Спорт эбийиэктэриттэн быйыл өссө Хатаска уонна Сайсары уокуругун Ильменскэй уулуссатыгар икки сабыс-саҥа тутуу үлэҕэ киирдэ. Маны таһынан куорат маастар-былаанынан Губин уулуссатыгар дзюдо саалата уонна «Звезднай» түөлбэҕэ сабыылаах каток тутуллаллар.

Санатар буоллахха, «Спортивнай» түөлбэҕэ эмиэ саҥа спорт саалатын тутуу былааннанар. Онон сыл бүтүүтэ үс саҥа спорт эбийиэгэ эбиллээри турар.

Спортсменнар ханна олороллор?

Хас спортивнай тэрээһин ахсын спортсменнары М.К.Аммосов аатынан ХИФУ уопсай дьиэлэригэр олордоллор. Билигин манна өрөмүөн ыытылла турар.

«Азия оҕолоро» норуоттар икки ардыларынааҕы спортивнай оонньуулар бэс ыйын 25 күнүттэн от ыйын 7 күнүгэр диэри Дьокуускай куоракка ыытыллыахтара. Арассыыйа Аҕа Баһылыга Владимир Путин эрдэ «Азия оҕолоро» Оонньуулары оҕо-ыччат спордун эйгэтигэр биир саамай интэриэһинэй уонна ситиһиилээх бырайыагынан билиммитэ. Оттон  өрөспүүбүлүкэ Ил Дархана Айсен Николаев «Азия оҕолоро» Норуоттар икки ардыларынааҕы спортивнай оонньуу өрөспүүбүлүкэ биир улахан күрэхтэһиитэ буоларын уонна саамай үрдүк таһымҥа ыытыллыхтааҕын бэлиэтээбитэ.

 

Мария Васильева хаартыскаҕа түһэриилэрэ (СИА)

Сонуннар

Ордук ааҕаллар

Дьикти түбэлтэ
Сынньалаңңа | 01.06.2024 | 17:00
Дьикти түбэлтэ
Уйбаан Уйбаанабыс сураҕа суох сүппүтүн туһунан сурах нэһилиэги биир гына тилийдэ. Сарсыарда олус хойуу сиик түспүт этэ. Ойоҕо халдьаайыттан көрөн турдаҕына, эр киһи алааһы бүтүннүү тарҕаммыт күдэрик тумаҥҥа ынахтарын көрдүү киирбитэ уонна ол кэнниттэн ууга тааһы бырахпыттыы мэлийбитэ... Дьахтар бу киһи туман түспүтүн туһанан арыгыһыт доҕотторун диэки сүүрбүт дии санаан,...
Умнуллубут аспытын сөргүтүөххэ
Тускар туһан | 01.06.2024 | 18:00
Умнуллубут аспытын сөргүтүөххэ
Оскуолалар, уһуйааннар ыһыахтара үгэннээн тураллар. Сотору улахан ыһыахтар кэлиэхтэрэ. Ону кытта сахалыы сандалыбытыгар тугу астыырбытын былаанныыбыт. Үгэс буолбут бүлүүдэлэртэн хал буолбут буоллаххытына, өбүгэлэрбит умнулла быһыытыйбыт астарын сөргүтэргэ ыҥырабыт.   Искэхтээх эбэтэр хааннаах алаадьыэ Алаадьы тиэстэтигэр ханнык баҕарар бөдөҥ балык искэҕин кутан буһардахха, ураты уонна тотоойу бүлүүдэ буоларын билэбит. Оттон сорох хотугу...
Былатыан Эверстов:  «Элбэх дьоҥҥо сонуну кэпсиир кыахтаах буолар — дьол»
Дьон | 06.06.2024 | 10:00
Былатыан Эверстов: «Элбэх дьоҥҥо сонуну кэпсиир кыахтаах буолар — дьол»
Хас сир аайы ураты дьон баар буолар. Кинилэр олохторун хара маҥнайгыттан атыннык олоро сатыыллар. Барыларыгар баар курдук нус-хас дьылҕаҕа дураһыйбаттар. Оннук дьикти киһинэн Дьааҥы улууһугар олорор эрээри, өрөспүүбүлүкэ, дойду, аан дойду үгүс бэлиэ спортивнай түгэннэрин көтүппэккэ хамнаһа суох сырдатар суруналыыс, киэҥ сырыылаах айанньыт, коллекционер, фотограф, спортсмен, норуот тапталын ылбыт Платон...