14.08.2021 | 18:14

Атырдьах ыйыгар сокуоҥҥа уларыйыылар

Сайын бүтэһик ыйыгар сокуоҥҥа сүрүн уларыйыылар күүтэллэр:
Атырдьах ыйыгар сокуоҥҥа уларыйыылар
Ааптар: Киин Куорат
Бөлөххө киир

Пенсиялаах үлэһиттэргэ
Атырдьах ыйын 1 күнэ — үлэлиир пенсиялаахтарга харчыларын үгэс буолбут уларытан ааҕыы. Ханнык да сайабылыанньа суруйар наадата суох, икки усулуобуйаны тутуһуохтааххын — үлэлиэхтээххин уонна пенсионнай фондаҕа усунуос төлүөхтээххин (маны үлэ биэрээччи толоруохтаах).

Өскөтүн пенсия 2021 сыл тохсунньу 1 күнүн кэнниттэн оҥоһуллубут буоллаҕына, үлэлиир пенсионардар быйыл атырдьах ыйыгар эбии харчыны ылыахтара суоҕа — ааспыт сыллаахха пенсия коэффициена ааҕыллыбыт. Маннык түгэҥҥэ эбии харчыны 2022 сыллаахха ылаҕыт.
 Ол эбилик хас биирдиигитигэр араас, саамай үрдээбитэ — 296 солкуобай.

Төрөппүттэргэ – 10 тыһыынча
Атырдьах ыйын 2 күнүттэн үөрэнээччилэр төрөппүттэрэ биир кэмнээх 10 тыһыынча кээмэйдээх босуобуйа ылыахтара. Ити туһунан муус устарга президент эппитэ, оттон Арассыыйа цифровой сайдыыга, сибээскэ уонна маассабай коммуникацияларга Министиэристибэтэ от ыйыгар төрөппүттэргэ ити үбү ыларга сайабылыанньалары ыыппыта. 6-тан 18-гар диэри саастаах оҕолордоох (сорох түгэннэргэ —23-гэр диэри) төрөппүттэр ыыппатах буоллахтарына «Госуслугаҕа» тиийиэхтэрин сөп. 

Чөл олоҕу талбыттарга туспа ааҕыылар 
Атырдьах ыйыттан спордунан дьарыктанааччыларга нолуоктан көҕүрэтии сокуона киириэхтээх. Депутаттар ылыммыт, президент илии баттаабыт докумуоннарыттан өйдөнөрө ити. Сурукка ханнык өҥөҕө, хаһан төлөнөрүн туһунан туох да чопчу быһаарыы суох. Биллэринэн, ити 2022 сыллааҕы дохуоккуттан көрүллүөхтээх. Фитнес-кулууп абонемена сөп буолара — өйдөммөт. Спорт министиэристибэтэ ханнык тэрилтэ итинник ыспараапканы биэрэр испииһэгин өссө оҥорбокко сылдьар. 

Спордунан дьарыктаныы социальнай нолуоктан  көҕүрэтии иһигэр киирсэр, онно эмтэниигэ, үөрэҕи ыларга уо.д.а. буолуон сөп. Муҥутаан улааппыта — 120 тыһ.солкуобай, туттубут харчыгыттан 13%-нын туталлар. Төһө ороскуоттаммыккын барытын төннөрбөттөр, ити эрдэ төлөөбүт нолуогуҥ суумматыгар сөп түбэһиэхтээх.  Ол аата, өскөтүн нолуогу аҕыйаҕы төлөөтөххө, харчыҥ сороҕун төннөрүөхтэрэ. Оттон нолуоккун төлөөбөтөххүнэ, ааҕыллыбат.  
Биирдэ спортан кэлэр харчыны ааҕа сатаабыппыт да, чуолкайдаабатахпыт. Онон саҥа инструкция туһунан ити боппуруостар дьэҥкэрдэхтэринэ хайаан да суруйуохпут. 

Сынньаныы быраабылата кытаатта
Краснодарскай кыраай курортарыгар вакцина ылбыт сертификаккын илдьэ барар ордук. 
Кубань сынньана кэлэр дьоҥҥо быраабыланы эмиэ кытаатыннаран биэрдэ. Билигин санаторийга, гостиницаҕа, кемпиҥҥэ быһыы ылбыт эрэ дьону киллэриэхтэрэ. Быһыыҥ суох буоллаҕына — кэлбитиҥ кэнниттэн үс суукка иһигэр туруортарыахтааххын. 

Атырдьах ыйын 9 күнүттэн Арассыыйа Египет курортарыгар — Хургада уонна Шарм-эш-Шейх сөмөлүөт сырыытын сөргүттэ. Бастаан Москваттан нэдиэлэҕэ биэстэ рейстэр көтүөхтэрэ. Көтүүлэр ахсааннарын элбэтии быһаарыыта кэлин биллиэ. Биллэринэн, Арассыыйа тоҕус авиахампаанньалара  көҥүлгэ хабыстылар, олор истэригэр  «Уральские авиалинии», S7, «Аэрофлот», «Победа», Nordwind бааллар.

ОСАГО техническэй көрүүтэ суох
Атырдьах ыйын 22 күнүттэн массыыналаах дьон ОСАГО полиһын ыларга техосмотр барартан босхолонуохтара. 

Уулуссаҕа тыастаах-уустаах реклама тохтотуллар 
Итинник сокуону ылыныы тыаһы-ууһу элбэхтик истэр дьоннор олохторо ыарахан диэн билинэллэр.   

Атырдьах ыйын 25 күнүттэн тас эркиннэргэ, дьиэ үрдүнээҕи тутууларга тыаһы улаатыннарар колонкаларынан арыалланар рекламаны тарҕатыы бобуллар. 
Тыастаах реклама наһаа киһини сылатар уонна дьон үлэлииригэр, сынньанарыгар куһаҕаннык дьайар диэн быһаардылар. Ити нэһилиэнньэ ортотугар тыҥааһыны үөскэтэр, киһи күнү быһа биир хос-хос хатыланар рекламаны тохтоло суох истэргэ күһэллэр. 

Тас дойду олохтоохторугар виза чэпчиэҕэ
Атырдьах ыйын бүтэһик күннэригэр тас дойду олохтоохторугар туристыыр виза биэриитэ чэпчиэҕэ. Урут биир ыйга тиийэр кэмҥэ ылар буоллахтарына, дойдулар икки ардыларыгар сөбүлэһии түһэрсибиттэр сыл аҥарынааҕы визаны ылыахтара. РФ иһигэр олорууга бигэргэммит бронь ирдэниллэр. 

Лааҕырдарга кешбэк программата түмүктэннэ
Атырдьах ыйын бүтүүтэ Ростуризм сайыҥҥы лааҕырдарга сынньаныы харчытын төннөрүүнү тохтотор. 
Программа ыам ыйын бүтүүтүттэн саҕаламмыта, ол быһыытынан путевка 50%-нын төннөрүөххэ сөбө, ол эрээри 20 тыһыынчаттан ордубат. Өскөтүн путевка чэпчэтиилээх буоллаҕына, төрөппүт бэйэтэ төлөөбүт харчытын аҥара төннөр. 
Ити программа атырдьах ыйын бүтүүтүгэр диэри салҕанар. Алтынньы 1 күнүттэн ахсынньы 24 күнүгэр диэри  ханнык баҕарар региоҥҥа барыахха сөп. Ол иһигэр балаҕан ыйын биириттэн навигация бүтүөр диэри уунан айанныахха син. Программаҕа айан уонна икки хонукка диэри хонуу киирэллэр. Айан төлөбүрүн 20% -ын төннөрөргө (20 тыһыынчаттан ордуга суох) «Мир» карта уонна программаҕа регистрация наада. 

Сонуннар

Ордук ааҕаллар

Былатыан Эверстов:  «Элбэх дьоҥҥо сонуну кэпсиир кыахтаах буолар — дьол»
Дьон | 06.06.2024 | 10:00
Былатыан Эверстов: «Элбэх дьоҥҥо сонуну кэпсиир кыахтаах буолар — дьол»
Хас сир аайы ураты дьон баар буолар. Кинилэр олохторун хара маҥнайгыттан атыннык олоро сатыыллар. Барыларыгар баар курдук нус-хас дьылҕаҕа дураһыйбаттар. Оннук дьикти киһинэн Дьааҥы улууһугар олорор эрээри, өрөспүүбүлүкэ, дойду, аан дойду үгүс бэлиэ спортивнай түгэннэрин көтүппэккэ хамнаһа суох сырдатар суруналыыс, киэҥ сырыылаах айанньыт, коллекционер, фотограф, спортсмен, норуот тапталын ылбыт Платон...
Татьяна Гоголева:  «Төрөөбүт тылын билбэт ыччат ханна да сыаналаммат»
Дьон | 13.06.2024 | 10:00
Татьяна Гоголева: «Төрөөбүт тылын билбэт ыччат ханна да сыаналаммат»
«Хотугу сулус» оҕо телерадиоакадемиятын төрүттээбит, үгүс көлүөнэ талааннаах ыччаты көччөх гынан көтүппүт Татьяна Гоголева, чахчы, Саха сиригэр тыыннаах номох буолбут киһи. СӨ култууратын үтүөлээх үлэһитэ, СӨ култууратын, социальнай эйгэтин туйгуна, «Гражданскай килбиэн» бэлиэ хаһаайына олоҕун тухары оҥорбута, айбыта-туппута, үйэтиппитэ үгүс.   Кини туһунан бу иннинэ сурулунна ини, суруллубата ини. Ол эрээри...
Элбэх оҕолоохторго — ураты болҕомто
Сонуннар | 06.06.2024 | 16:00
Элбэх оҕолоохторго — ураты болҕомто
2024 сыл ыам ыйын 28 күнүгэр ыытыллыбыт Ил Түмэн сэттис (уочараты таһынан) пленарнай мунньаҕар норуот дьокутааттара «Саха Өрөспүүбүлүкэтигэр элбэх оҕолоох ыал статуһун туһунан» өрөспүүбүлүкэ сокуонугар уларытыылары киллэриини өйөөтүлэр.   Санатан эттэххэ, дойду баһылыга Владимир Путин 2024 сыл тохсунньу ыйыгар элбэх оҕолоох дьиэ кэргэттэр статустарын болдьоҕо суох оҥорбута. Ол эбэтэр үс уонна...
Арыгы атыытын бобуутун полиция үлэһиттэрэ хонтуруоллуохтара
Сонуннар | 08.06.2024 | 11:51
Арыгы атыытын бобуутун полиция үлэһиттэрэ хонтуруоллуохтара
Куорат баһылыга Евгений Григорьев дьаһалынан VIII-с «Азия оҕолоро» Оонньуулар ыытыллар кэмнэригэр бэс ыйын 25 күнүттэн  от ыйын 8 күнүгэр диэри Дьокуускай куоракка арыгылаах утах атыыта бобуллар. Ол эбэтэр бу күннэргэ арыгылаах утах атыытыгар идэтийэр эргиэн туочукалара сабыллаллар, атын маҕаһыыннарга арыгы атыылыыр отделлар үлэлээбэттэр.  Бу хаарчах арыгынан эргинэр кафе, ресторан, бар...