Атаах майгыта мэһэйдээбитэ

Олус маанытык иитиллибит дьон олохторугар эрэйдэнэллэр дииллэрэ оруннаах.

Дария Ивановна (аата уларыйда):

– Бииргэ төрөөбүттэр сэттиэ этибит. Билигин бары сааһырдыбыт. Кыра балтыбыт мэлдьи биһиги бэлэммитигэр сылдьар. Оҕо эрдэҕиттэн атаахтык иитиллибитэ.  Төрөппүттэрбит оһоҕос түгэҕинээҕи оҕолорун, мурун бүөтэ кыыстарын сиэри таһынан маанылаабыттара. Дьыссаакка бары уочаратынан таһарбыт. Дьиэ иһигэр даҕаны кыра хотуммут тула илин-кэлин түһэрбит. Ас амтаннааҕа, минньигэһэ, таҥас-сап сиэдэрэйэ – барыта киниэхэ тиксэрэ.

Үлэ буолла да, Машабытын кыттыһыннарбат этибит. Дьиэ иһигэр-таһыгар улахаттар бэйэбит хачыгырыйарбыт. “Оҕону көлүйүмэҥ” диэн буолара, өрүү кини кырата, хачаайыта уонна доруобуйата мөлтөҕө ахтыллара. Оннук улааппыппыт.

Ити курдук Маша куруук далбарга сылдьарга үөрэнэн хаалбыта. Онто тус олоҕор мэһэйдиир курдуга. Дьону кытта дэбигис сатаспата, хаппырыыһынан аатырбыта, атаах майгытын сөбүлээбэттэрэ.

Мааны балтыбыт эдьиийдэр, убайдар көмөлөрүнэн орто үөрэҕи бүтэрбитэ. Уопсайга киириэн баҕарбатаҕа, онон улахан эдьиийбит бэлэмигэр олорбута. Устудьуоннуур сылларыгар оҕобут дьонтон итэҕэс таҥныбатын диэн бары уочаратынан харчы ыытарбыт. Үс сыл иһигэр колледжын хаста да быраҕа сатаан, ол айдаана этэ. Син муҥнаан-сордоон бүтэрбитэ.

Аны туран, үлэҕэ ананан тиийбит сиригэр уһаабатаҕа, биир кэллиэгэтин кытта тапсыбакка, төттөрү кэлбитэ. Онтон орто убайбыт кэпсэтэн киллэрбит тэрилтэтин сөбүлээбэтэх аатырбыта. Аҕабыт ырааҕынан аймаҕын чааһынай маҕаһыыныгар сыл курдук үлэлээт, уурайбыта. Итинник сааһын тухары чугас дьонун көрүүтүгэр-харайыытыгар сырытта. Дьэ, накаас.

Ыал буолбутун да кэннэ балтыбыт куруук биһиги көмөбүтүгэр наадыйара. Оҕолоро кыра эрдэхтэринэ көрсө тиийэрбит, элбэх оҕолоох ийэни анаан-минээн сынньатарбыт. Ийэбит хара өлүөр диэри сиэннэрин харайсыбыта, аҕабыт эмиэ кинилэри кытта олорсубута. Элбэх оҕолоох ыалга куруук көмөлөһөрбүт. Билигин даҕаны балтыбытын баарбытынан-суохпутунан өйүүбүт. Куоракка көспүттэрэ ыраатта, онон билиҥҥэ диэри этинэн, арыынан, отонунан хааччыйа олоробут.

Ол эрээри балтыбыт биирдэ да махтаммытын бу диэн өйдөөбөппүн. Арааһа, буолуохтааҕын курдук саныыр. Хара төрүөҕүттэн куруук оннук сырыттаҕа. Испитигэр хомойбуппут иһин, хайыахпытый, кыра балтыбыт буоллаҕа.