Юрий Трутнев: «Үспүкүлээннэри кытта хонтуруоллуур уорганнар быһаарсыахтара»

Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрбитинэн, Саха сирэ үс ыйтан ордук кэмҥэ тиийэр аһынан-үөлүнэн хааччылынна. Кэккэ бородууктанан – биир сылга. Бу туһунан өрөспүүбүлүкэ Ил Дархана Айсен Николаев потребительскэй ырыынакка үөскээбит быһыы-майгы туһунан мунньахха иһитиннэрдэ. РФ Бырабыыталыстыбатын Бэрэссэдээтэлин солбуйааччы, РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев бэлиэтээбитинэн, Саха сиригэр сыана үрдээһинэ дойду үрдүнэн курдук, бородуукта тиийбэт буолуута аймалҕантан тахсыбыт. 
«Сыана үрдээһинэ үгүстүк дьон айманан туран атыылаһарыттан уонна үспүкүлээннээһинтэн тутулуктаах. «Антимонопольнай» сокуон, хонтуруоллуур уорганнар бааллар, кинилэр Саха сиригэр уонна Арассыыйа Федерациятын атын да субъектарыгар күүскэ үлэлииллэр», - диэтэ Юрий Трутнев.
Саха сиригэр, Арассыыйа атын регионнарыгар курдук, сыана ордук саахарга уонна гречкаҕа үрдээбит. 
«Билиҥҥи туругунан биһиэхэ сөп буолар аһылык саппааһа баар, социальнай суолталаах табаардарга олунньу ый саҥатыгар сыана ортотунан 1-26% үрдээтэ», – диэн бэлиэтээтэ Айсен Николаев.
Атын табаардарга уонна эмпкэ сыана үрдээһинэ РФ субъектарын кытта тэҥ таһымҥа сылдьар, регион саппааһынан хааччыллыбыт. 
Тыын суолталаах табаардарга сыананы оннунан тутар курдук регион Баһылыга 2022 сылга Уһук Илиҥҥи федеральнай уокурук субъектарыгар кредитнай тэрилтэлэртэн ылыллыбыт заемнары 8% диэри уйунар субсидия көрүллэрин туһугар этии киллэрдэ. 
Дьоҕус уонна орто предпринимательство ороскуота үрдүүрүнэн сибээстээн, үлэ миэстэлэрин хаалларар, өйүүр сыаллаах УСН анал эрэсиимин лимитын 400 мөлүйүөн солкуобайга диэри уонна ПСН 120 мөлүйүөн солкуобайга диэри улаатыннарар этии киирдэ.