Ытаабат оҕону эмсэхтээбэттэр

Урут кыһалҕаҕа кыһарыйтарбыт куорат олохтоохторо хара сарсыардаттан дьаһалта дьиэтигэр тоҕуоруһаллара. Бэрт түргэнник да быһаарыллар боппуруостаах эрээри, күнү быһа ойоҕос тостор уочаратыгар тураллара. Билигин олох уларыйан, анал сайтар, порталлар, социальнай ситимнэр, быһа линия төлөпүөннэрэ баар буоланнар, арыый да судургу соҕус буолла диэтэхпинэ, сөбүлэһэргит дуу, суоҕа дуу? Сорох көрдөһүү, омуннаабакка эттэххэ, эҕирийиэх бэтэрээ өттүгэр көрүллэр. Ол эбэтэр балысхан сайдыыны батыһа, олох, үлэ хаамыыта тэтимирдэ диэххэ сөп. Кырдьык, сорох боппуруос өр көрүллэр, үгүс үбү-харчыны эрэйэр, онон тута быһаарыллыбат. Ардыгар кыһалҕалаах дьон бэйэлэрэ уһатан-кэҥэтэн, тустаах тэрилтэлэргэ бара сылдьыбакка, кыаллар да кыахтаах кыайтарбат түгэнэ үгүс. Ытаабат оҕону эмсэхтээбэттэр. Бэйэҥ сүүрдэххинэ-көттөххүнэ, ыйыталастаххына, туоһуластаххына эрэ табыллаҕын. Тыл уҥуоҕа суох. Мөккүөр таҕыстаҕына, ыксал тирээтэҕинэ суругунан да киирсиэххэ сөп. Кумааҕы тугу барытын тулуйар. Кэтээн көрдөххө, сорохтор тустаах тэрилтэлэргэ тиийбэккэ, тута үҥсүүгэ-харсыыга тиэрдэллэрэ эбэтэр кураанах куолуга кубулуталлара баар суол. Ааспыкка Сардаана Авксентьева аккаунуттан куорат олохтоохторун көрдөһүүлэрин, ыйытыыларын таһаарбыппыт. Бүгүн эмиэ кэнники суруктары салгыы бэчээттиибит. Баҕар, ааҕааччыларбытыгар көмө, тирэх буолуоҕа.

Оҕолоохтор, үлэтэ суох хаалбыттар ыйыталлар

Мария: – Биһиги элбэх оҕолоох уонна кыаммат ыалбыт. Оҕобутун “Умка” уһуйааҥҥа икки сааһыттан биэрээри, сайтка сайабылыанньа биэрэ сатыыбыт да, урут биэрбиккит дии турар. Ол оҕом төрөөбүтүгэр 3 сааһыттан диэҥҥэ суруйбутум иһин буолуо дуо? Куорат дьаһалтатыгар бара сырыт дииллэр. @yaguo.ru: – Оҕо уһуйааныгар уочаракка турарга уонна оҕону киллэрэргэ сайабылыанньаҕытын хос биэрбэккит. Аччыгый саастаахтарга диэн туспа бөлөх суох, оҕолор миэстэ баар буоллаҕына уочаратынан ылыллаллар. Үлэ күнүгэр 9.00 ч 13.00 диэри уонна 14.00 ч 18.00 диэри 408-007 төл. эрийэн сиһилии ыйыталаһыаххытын сөп. Александр Филиппов: – Мин кэргэним бу сааскыттан үлэтэ суох олорор. Босуобуйа ылаары, докумуоннарын туттара тиийбитигэр үөрэҕи бүтэрбитин туһунан аттестат көрдөөбүттэр. Ол тоҕо нааданый? Ханнык докумуоннары ирдииллэрий? @goskomzanyatosti: –"Арассыыйаҕа нэһилиэнньэ дьарыктаах буолуутун туһунан" 19.04.1991 сыллаахха тахсыбыт федеральнай сокуон 3-с ыстатыйатыгар суруллубутунан, үлэтэ суохтар учуокка туралларыгар маннык докумуоннар ирдэниллэллэр: пааспар, үлэ киниискэтэ эбэтэр ону солбуйар, идэ ылбытын туоһулуур атын докумуоннар, кэнники үс ыйга орто хамнаһын туһунан ыспыраапка (бүтэһик үлэлээбит сириттэн). Өскөтүн сайабылыанньаны электроннай көрүҥүнэн ыытар буоллаххытына ирдэммэт. Бу иннинэ хаһан да үлэлээбэтэх, анал идэтэ суох дьонтон пааспар, үөрэҕи бүтэрбитин уонна (эбэтэр) идэни ылбытын туоһулуур докумуон ирдэнэр. Галина: – Чкалов уонна Крупская уул. оройуоннарыгар оҕо уһуйаана хаһан тутуллуой? @ykt.city: – Үөрэх управлениета иһитиннэрбитинэн, “Комплексное развитие социальной инфраструктуры ГО “Город Якутск” на 2017-2032 годы с изменениями от 15.08.2019 года” диэн муниципальнай бырагыраамаҕа 37-с кыбаарталга оҕо уһуйаана 2024-2025 сылларга тутуллар диэн киирэ сылдьар.

Дьиэ-уот боппуруостара

Анна: – Дьокуускай куоракка хаарбах дьиэлэртэн көһөрүү бырагыраамата билиҥҥи туругунан туолбакка турар диэн кырдьык дуо? Күһүҥҥэ диэри быһаарыллыбатаҕына, көрүллүбүт үбү-харчыны өрөспүүбүлүкэ атын улуустарыгар үллэрэллэр дуо? @ykt_meriya_online: – Дьокуускай куоракка бу бырагырааманан үлэҕэ 2025 сылга диэри өрөспүүбүлүкэттэн уопсайа 6,3 млрд. солкуобай көрүллүбүтэ. Чуолкайдаан эттэххэ, 2020 сылга 549 мөлүйүөн 674 тыһыынча солкуобай тыырыллыбыта. Ол 2021 сыл ахсынньы 31 күнүгэр диэри туһаныллыахтаах. Эппиэтинэстээх тэрилтэ – СӨ дьиэни-уоту тутууга дирекцията. Лена: – Софронов уул., 27, олоробут. Биһиги дьиэбит оннугар тутуу былааҥҥа баар дуо? Эрдэ оскуола тутуута диэн баара. Хантан билиэххэ сөбүй? Чугас саҥа дьиэлэр тутулуннулар. Көһөрүү буолуо, генеральнай былаан уларыйыа дуо? Эрдэттэн махтал. @archyakutsk: – map.yakadm.ru диэн Дьокуускай куорат геопорталыгар киирэн көрүөххүтүн сөп. Надежда: – Павлик Морозов уулуссатыгар, стадион таһыгар икки этээстээх дьиэлэр бааллар. Күһүн, саас олохтоохтор эрэйдэнэллэр, хараҥаҕа харбыалаһаллар. Баһаалыста, биир эмит банаары туруораргыт буоллар диэн көрдөһүүлээхпит. @ykt.city: – Уулуссаларга уот линияларын тардыы үлэтэ “Сырдык киин куорат” диэн муниципальнай бырагырааманан ыытыллар. Онно киирбит эбийиэктэр испииһэктэригэр бу аадырыс 209-с нүөмэринэн сылдьар. – “Палладиум” утары турар ситэ тутуллубатах дьиэ хаһан көтүрүллүөй? @ykt.city: – Дьокуускай куорат архитектураҕа уонна куораты тутууга политикатын управлениета иһитиннэрбитинэн, сир учаастагын туһуттан мөккүөр, сууттаһыы буола турар. Марк: – Почта дьааһыктарын ким уларытыахтааҕый? Халтурин уул., 6, дьааһыктарбыт 50 сыл турдулар. Барыта эргэрэн, алдьанан бүттэ. Ааннара аһыллыбаттар да, сабыллыбаттар да. @ykt.city: – “ЖКХ Строительное” салайар хампаанньаҕытыгар этиэххитин наада. Өскөтүн салайар хампаанньаҕыт үлэтин сөбүлээбэт буоллаххытына, СӨ судаарыстыбаннай тутууга уонна дьиэҕэ-уокка надзорун управлениетыгар 8(4112) 34-22-49 эрийиэххитин сөп.

Оптуобустар сүгүн сылдьыбаттар!

Анна: – Кулун тутар 16 күнүгэр икки ый туһанар “проездной” ылыммытым. 18 чыыһылаттан дьиэбитигэр олорон үлэлиир буолбуппут. Ол аата атыыласпытым таах хаалар дуо? @ykt.city: –Айан каартатын быраҕымаҥ. Бэйэ изоляциятын эрэсиимэ бүттэҕинэ туһаныаххыт. Туһамматах сырыыгыт ахсаана оннунан хаалар. Леля: – ЯПАК үлэтин хонтуруоллуургут, бэрэбиэркэлииргит буоллар. Кыыһым Банковская тохтобулга турдаҕына, 104 №-дээх оптуобус тохтообокко, ааһа турбут. Оҕом сүүрэ сатаабыт, суоппар уонна кондуктор көрбүттэр эрээри, аахайбатахтар. Саатар бүгүн күннээххэ бүтэһик оптуобус. Арай куоракка ханна да барар, хонор сирим суох буоллаҕына, хайыыбыный? Бүгүн от ыйын 3 күнэ, оптуобус 21.00 чааска ааспыт. Баһаалыста, бу боппуруоһу быһаарыҥ. Виталий Слепцов: – 105 №-дээх оптуобус сороҕор быһа барар. Холобур, ыксаатаҕына, Петровскай уулуссатыгар таарыйбакка, вокзалтан тута циркэҕэ барар. 102 №-дээх оптуобус вокзалга барарыгар сороҕор Киров уул. тохтообокко, Ленин уул. барар. 102 №-дээх оптуобус тоҕо Универсамынан эргийэрий? Кондуктордар эмиэ муҥатыйаллар. @mup_yapak: – Эһиги көрдөһүүгүтүн ылынныбыт, бэрэбиэркэлиэхпит. Быһаарсыахпыт, сөптөөх миэрэни ылыахпыт. Эһиги тус аккауҥҥутугар суруйуохпут.

Этии элбэх, баҕа санаа баһаам

Баһылык аккаунугар аҥаардас көрдөһөн, үҥсэн эрэ суруйбаттар. Килбэйэр киин куораппыт сарсыҥҥыта сайдарын, саргылаахтык салалларын, кэскилэ кэҥиирин туһугар долгуйааччылар бааллара үөрдэр. Ол курдук баҕа санаа баһаам, этиилээх элбэх. Баҕар, сороҕо куорат тупсарыгар олук буолуо диэн таһаарабыт. Төһө кэскиллээҕин, быһаарыллар кыахтааҕын дьаһалта көрүө диэн эрэнэбит.

Тимир көлөлөөх дьон аатыттан маннык этиилээхпин. Куораппытыгар күөх уокка төһө сөкүүндэ хаалбыты көрдөрөр светофордар элбииллэрэ буоллар, суоппардар хаалан хаалбакка, эмискэ тохтообокко, ыраахтан көрөн суоттаныа этилэр. Чуолаан “стоп линияны” кэһэр түгэннэри уһулар камералаах сирдэргэ туруордаххытына, быраабыланы кэһии аччыа. Оччоҕуна суоппардар абыраныахтара, сатыы да дьон суолга сэрэхтээх буолуохтара.        

Лия

Ытыктабыллаах Сардаана Владимировна! 202-с микрооройуоҥҥа баар пляж даамбатын сабан кэбистэххэ, массыыналары киллэрбэккэ, сатыы дьон сылдьарын курдук оҥордоххо, эн санааҕар, хайдах буолуой? Сорох дьон бөхтөрүн массыынанан тиэйэн аҕалан, Күөх Хочоҕо уонна биэрэккэ тоҕоллор. Баҕар, сатыы дьон эрэ сылдьар буоллаҕына, бөҕү тоҕуу арыый да аччыа этэ дии саныыбын.

@pwr_mg

Наадалаах аккауннар уонна төлөпүөннэр

Эһиэхэ, ааҕааччыларбытыгар, туһалаах буолуо диэн наадалаах аккауннары уонна төлөпүөннэри таһаарабыт.

@ykt_meriya_online

@ykt.city – Дьокуускай куорат уокуруктааҕы дьаһалтата.

@mku_segh – Куорат хаһаайыстыбатын үлэлэтэр сулууспа. 32-53-75.

@upravaoktia – Октябрьскай уокурук управата. Төл. 35-07-08.

@yakutsk_centralokrug –  Киин уокурук управата.Төл. 34-44-21.

@prom_okrug_ykt – Промышленнай уокурук управата. Төл. 44-93-38. Бассаап – 89248772101.

@gagarin.okrug – Гагаринскай уокурук управата. Төл. 40-27-17 (приемнай). 40-27-13 (ОДьКХ, социальнай отдел).

@stroitelnyokrug – Строительнай уокурук управата. Төл. 439531 (приемнай), 43-94-26 (ОДьКХ отдела), 43-90-96 (социальнай блок).

@admin_mkr_markha – Марха микрооройуонун дьаһалтата.

@azo_ykt  – Сир сыһыаннаһыыларын агентствота. 42-81-50. 8914-269-50-58.

@dorogi.ykt – Дьокуускай куорат олохтоох дьаһалтатын суолга-иискэ управлениета.

14.rospotrebnadzor.ru – Роспотребнадзор сулууспата.

@mup_yapak – ЯПАК тэрилтэ.