24.04.2022 | 10:00

Учуутал дьоло — үөрэнээччитигэр

Учуутал дьоло — үөрэнээччитигэр
Ааптар: Наталья РУФОВА
Бөлөххө киир

Муус устар 14 күнүгэр Хатастааҕы оҕо искусствотын оскуолатыгар кэрэ-бэлиэ, күүтүүлээх түгэн буолла. Олох кэрэ тыытыгар олорсон, классическай музыка эйгэтигэр бигэннибит.

Ол курдук, Марк Жирков аатынан музыкальнай колледж уһуйааччылара, устудьуоннара кэлэн ыалдьыттаан, кэрэ, үтүө, сырдык сылаас сыдьаайыгар сыламнаттылар. Тыыннаах дорҕоону суохтаабыт көрөөччүлэр (оскуола үөрэнээччилэрэ, уһуйааччылара) сахсырҕа да көтөрө иһиллэр уу чуумпуга олорон иһиттилэр, көрдүлэр. Бэл диэтэр, орой мэник кырачааннар музыканнар турукка киирэн олорон оонньуулларын көрөн иһийдилэр, улуу дьон айымньыларын алыптаах муоратын долгунугар бигэннилэр.

Бу кэпсээммит төрүөтэ, сэһэргээһин биричиинэтэ – тэрээһин сүрүн дьоруойа, Хатастааҕы оҕо искусствотын оскуолатын выпускнига, күн бүгүн  М. Жирков аатынан музыкальнай колледж устудьуона Саша Белолюбскай. Саша быйыл бу үөрэх кыһатын бүтэрэр. Ордук кэрэхсэбиллээҕэ диэн, кини ханна үлэлии барарын номнуо быһаарыммыт. Сэрэйбиккит курдук, Саша аны күһүн күндүтүк саныыр оскуолатын аанын учуутал диэн үрдүк аатынан атыллыахтаах. Эһиилги үөрэх дьыла Хатастааҕы  оҕо искусствотын оскуолатын 45 сылын кытта ситимнээх буолуоҕа. Ол сыллар тухары норуодунай үнүстүрүмүөннэргэ бу маннык түгэн аан бастаан. Биһиги билэрбитинэн, араас салааларга Анастасия Охлопкова, Екатерина Егорова үлэлии сылдьаллар.

Саша бу кэнсиэригэр сүрдээх уустук, өй-санаа, күүс-кыах хомуллуутун, бүүс-бүтүннүү бэриниини эрэйэр дьоһун айымньылары талбыт. Балалайка үс эрэ струнатыгар итинник элбэх араас дорҕоон саһа сытара киһи өйүгэр киирбэт. Кэнсиэр тухары балалайка барахсан дохсун дуолан да буолан ылла, дьэҥкир чараас муустуу дьикти нарын да куоластанна, нууччалыы эттэххэ, «эх, удаль молодецкая» диэн сэниэлэнэн-күүстэнэн, күлүү-үөрүү долгунугар олордон, ырыых-ыраах оҕо саас мэник-тэник да күннэригэр илдьэ сырытта. Сашаҕа көмө буолан кэлэн оонньообут М. Жирков аатынан музыкальнай колледж уһуйааччыларыгар, норуоттар икки ардыларынааҕы таһымҥа тиийэ күрэхтэр, көрүүлэр уо.д.а. кыайыылааҕа Эдуард Анатольевичка махтанныбыт. Махтал улахана буоллун Анастасия Васильевна Каженкинаҕа – Саша колледжка  үөрэнэр сылларыгар төрөппүт ийэтиттэн итэҕэһэ суох күндү уонна убаастыыр киһитигэр. Анастасия Васильевна Хатас музыкальнай оскуолатыгар кэккэ сылларга бэрт таһаарыылаахтык үлэлээбитэ.

Сашаны музыка алыптаах эйгэтигэр киллэрбит учуутала – Анна Титовна Семенова. Соторутааҕыта эрэ атаҕа сиргэ тиийбэккэ, эбилик кыра олоппостонор уолчаан буһан-хатан, араас мэһэйдэри-моһоллору туораан, номнуо иитиллибит кыһатыгар үлэлии кэлээри сылдьар. Дьиҥ-чахчы баҕалаах, туппутун ыһыктыбат, ылсыбытын ыпсарар сахалыы майгылаах буолан, үөрэҕин биэтэгэр тиийдэҕэ! Ол тухары Анна Титовна сүбэлээн-амалаан, көмө-тирэх буолан сырыттаҕа.

Тус бэйэм бүгүҥҥү итии-истиҥ иэйиилээх, киһи дууһатын кылын таарыйар үтүөкэн түгэн туоһута буолбуппунан киэн тутта санаатым. Маннык ыччаттардаахпыт, уһуйааччылардаахпыт диэн эһиги эмиэ киэн туттуҥ, салгыы кэпсээҥ, сэһэргээҥ уонна сахалыы сэмэйдик оҕобут этэҥҥэ сылдьарыгар баҕарыаҕыҥ.

Сонуннар

Ордук ааҕаллар

Дьоҕур-талаан арыллыыта
Спорт | 26.01.2023 | 18:00
Дьоҕур-талаан арыллыыта
Дьиҥинэн, Орто дойдуга кэлбит киһи барыта туохха эрэ дьоҕурдаах, талааннаах. Дьэ, ол арыллара, туттуллара дэбигис кыаллыбат. Ону үрдүк үөһээ айыыларбыт бэйэлэрэ быһааран эрдэхтэрэ. Биллэн турар, улаханнык сыраластахха, күнү-дьылы бараатахха, сүрэхтээх-бэлэстээх, туруу үлэһит, айылҕаттан айдарыылаах буоллахха эрэ дьоҕур, талаан кэлиэн сөп. Дьөгүөр Картузов, дьэ, кырдьык, айылҕаттан хатаҕаламмыт киһи. Тыа киһитин сиэринэн...
Сардаана Токоемова:  «Иистэн дуоһуйууну ылабын...»
Дьон | 28.01.2023 | 16:00
Сардаана Токоемова: «Иистэн дуоһуйууну ылабын...»
Иис сахаларга урут-уруккуттан хааммытыгар баар. Билигин биһиги ортобутугар талааннаах иистэнньэҥнэр, норуот маастардара аҕыйаҕа суохтар. Кустуктуу субуллар оһуор быысапкалары, сахалыы тыынынан илгийэр кылтан, сиэлтэн оҥоһуктары, туостан көбүөрдэри, сэлээппэлэри, халадаай былаачыйалары, оноолоох соннору, хаһыаччыктары о.д.а. саха дьахталлара ис сүрэхтэриттэн тигэллэр. Бу тигиилэргэ төһөлөөх дууһа сылааһа ууруллубута буолуой диэн киһи сөҕө эрэ саныыр....
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Куорат олоҕо | 01.02.2023 | 17:00
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Дьокуускай куорат историятыгар аан бастаан 990 миэстэлээх улахан оскуола аны күһүн үлэҕэ киириэхтээх.  990 миэстэ диэн бырайыактаммытынан уйунар кыаҕа буоларын өйдүөххэ наада. Киин куораппытыгар миэстэ тиийбэт кыһалҕата баарын тухары оскуолаларбыт 2-3 төгүл ноҕоруускалаах, иккилии симиэнэнэн үлэлии олоруохтара турдаҕа. Онон бу саҥа оскуолаҕа балтараа тыһыынчаҕа тиийэ оҕо үөрэнэрэ буолуо диэн барыллаан...
Көмө мүнүүтэ да тохтообот
Дьон | 03.02.2023 | 12:00
Көмө мүнүүтэ да тохтообот
Аҕа дойду Улуу сэриитин кэмигэр Саха сирин дьоно-сэргэтэ төһө да тыһыынчанан килэмиэтиринэн ыраах олордоллор, өйдөрө-санаалара Кыайыы эрэ туһугар сытара. Биир дойдулаахтарбыт харчынан, облигациянан, үрүҥ көмүһүнэн, кыһыл көмүһүнэн, балыгынан, күндү түүлээҕинэн о.д.а. көмөнү хара көлөһүннэрин тоҕон туран фроҥҥа ыыппыттара. Ийэлэрбит, эбэлэрбит ыарахан үлэлэрин быыһыгар төһөлөөх кээнчэни, үтүлүгү тигэн ыыппыттарай! Дэлэҕэ сэрии...