Уһун өрөбүллэр түгэннэриттэн

Куорат хаһаайыстыбаларыгар, быраабы араҥаччылыыр уорганнарга, санитарнай миэрэлэри тутуһууну бэрэбиэркэлиир хамыыһыйаларга, өрүү да буоларын курдук, үлэ күөстүү оргуйда.

Сылаас тохтобуллар

Киин куоракка сорох сылаас тохтобуллар арылла иликтэр диэн олохтоохтор иһитиннэриилэринэн чуолкайдыстыбыт. Ахсынньы ыйга сакаасчыт «Главстрой» МХТ иһитиннэриитинэн, 2021 сыл ахсынньы ыйа бүтүөр диэри 14 сылаас тохтобул бары «Якутскэнерго»  ПАУо ситимнэригэр холбонор уонна үлэҕэ киирэр диэн буолбута. Эмиэ ити ыйга «Воинскай», «Дьиэ-уот департамена», «Тыа хаһаайыстыбатын техникума», «Кыайыы болуоссата», «Силуэт», Хабаров уулуссатыгар «Алмазэргиэнбанк» сылаас тохтобуллар арыллан, «ЯПАК» МУТ үлэлэтэригэр бэриллибиттэрэ.

Ахсынньы 23 күнүгэр диэри Мерзлотнай уул., «Институт мерзлотоведения», Кальвица уул., «Школа №10», Стадухин уул., «Областная больница», Советскай Армия 50 сыла уул., «Авиагруппа», Маҕан сэлиэнньэтин Алымов уул., «Магазин» уонна Маҕанныыр тракка «Аэропорт», Хатас сэлиэнньэтин Центральнай уул., «Агрогородок» уонна Каландаришвили уул., «Больница», оттон ахсынньы 31 күнүгэр диэри Можайскай уул., «Сквер Гагарина», Дзержинскай уул., «Спорт оскуолата», Семен Данилов уул., «Новинка», Можайскай уул., «Новопортовской», Курнатовскай уул., «Курнатовского», Кулаковскай уул., «Аммосов скверэ» сылаас тохтобуллар арыллыахтара диэн буолбута.

Бүгүҥҥү балаһыанньаны билсээри, туһааннаах тэрилтэлэр салалталарыттан ыйыталаһыы түмүгэ маннык буолла:

Иннокентий Лазаревич Сергучев, ЯПАК МУТ генеральнай дириэктэрин эбээһинэһин толорооччу:

— Биһиги 20 сылаас тохтобулу көрөбүт-истэбит, бүгүҥҥү туругунан бары үлэлииллэр. Ити эппит 20 эбийиэктэн иккитин арендаҕа ылбыт предпринимателлэр бэйэлэрэ көрөллөр. Сарсыарда 4 чаастан дьуһуурунай суоппардар ити күн үлэлиир сменаны баран хомуйаллар. Онтон дьуһуурунай смена сарсыарда 5 чаастан линияҕа тахсар уонна сылаас тохтобуллары арыйар. Онон сарсыарда 6 чааска диэри тохтобулларбыт бары арыллан, киэһэ 23 чааска диэри үлэлииллэр, түүҥҥү кэмҥэ хатаналлар. Биһиги балансабытыгар сылдьар сылаас тохтобуллар куорат араас муннуктарыгар бааллар. Холобур, Маҕан сэлиэнньэтигэр – икки, Хатаска – икки, ДСК оройуонугар Воинскай уулуссаҕа – биир, Портовской оройуоҥҥа – үс, Авиагруппаҕа – биир, Кальвица уулуссатыгар биир сылаас тохтобуллар бааллар. Кыһалҕалаах тохтобулунан «Воинскай» буола сырытта, итиннэ ахсынньы 23 күнүгэр тыа хаһаайыстыбатын бородууксуйатынан эргинэр предприниматель киириэхтээҕин, ыалдьан хаалан, этиллибит болдьоххо арыйбатаҕа. Онуоха эбии сэтинньи бүтэһик күннэригэр вандаллар ити тохтобулу алдьатаннар, чөлүгэр түһэрии үлэтэ ыытыллыахтаах этэ. Предприниматель үтүөрэн баран саҥа дьыл өрөбүллэрин кэнниттэн өрөмүөннээн арыйда. Бүгүҥҥү күҥҥэ ити тохтобул үлэлии турар.

Андрей Леонидович Владимиров, Олохтоох дьаһалта тас сибээскэ уонна инвестиционнай сайдыыга Департаменын салайааччытын солбуйааччы:

— Концессия схематынан, биһиги Департамеммыт 4 сылаас тохтобулу 2017 сыллаахха олоххо киллэрбитэ. Итинтэн биир тохтобул Ленин проспегар суол саҥардыллан оҥоһулларынан сибээстээн кылгас болдьоххо үлэлээбэккэ турар. Атын тохтобуллары 2020 сылга диэри уокуруктар управалара атыы (торги) ыытан олоххо киирбиттэрэ.

Александр Николаевич Андросов, «Организация пассажирских перевозок» МХТ салайааччыта:

— Бүгүҥҥү күҥҥэ куорат үрдүнэн 41 тохтобул баар. Сылаас тохтобуллар биһиги тыйыс усулуобуйабытыгар – олох ирдэбилэ. Хомойуох иһин, сорох дьон итини сыаналаабаттар. Урут эппитим курдук, алдьаталлар, туалет да оҥостооччулар бааллар.

Сыл бүтэһигэр «Главстрой» МХТ отчуоттаабытынан, бары сылаас тохтобуллар уот ситимнэригэр холбоммуттара уонна арендаҕа бэриллибит тохтобуллар үлэлиир эрэсиимнэрин, санитарнай туруктарын иһин дуогабардаспыт предпринимателлэр эппиэтинэһи сүгэллэрэ этилиннэ. Бэлиэтээн эттэххэ, куорат баһылыга Евгений Григорьев саҥа сылаас тохтобуллары туруорар туһунан быһаарыыны ылынан, былырыын олунньу ыйга тутуу блогар 20 тохтобулу Дьокуускай уулусса-суол ситимин саҥардан тутуу былааныгар киллэрэллэригэр сорудахтаабыта. Сылаас тохтобуллар киин куорат үлэтин толорууга анаан өрөспүүбүлүкэ бүддьүөтүттэн бэриллибит үбүнэн тутуллаллар.

Киин куорат былааһа оптуобус тохтобулларыгар сылаас павильоннары үс сыл устата сүүс ахсааҥҥа тиэрдэр соруктаах. Итини тэҥэ, чугаһынааҕы сылларга куорат оптуобуһун пааркатын саҥардыы уонна уопсастыбаннай тырааныспар аныгы систиэмэтин олоххо киллэрии былааннанар.

Тымныыны, бырааһынньыгы аахсыбакка

Уһун өрөбүллэргэ киин куорат хомунаалынай сулууспалара былааннаммыт эрэсииминэн үлэлээтилэр. Сүрүн соруктара – тыын суолталаах эбийиэктэри, олорор дьиэлэр систиэмэлэрин эҥкилэ суох үлэлэтии. Итинэн сибээстээн Олохтоох дьаһалта салалтата уонна эппиэттээх үлэһиттэрэ төгүрүк суукканан дьуһуурустубаны тэрийдилэр.

Тохсунньу 3 күнүттэн саҕалаан куорат хаһаайыстыбатын үлэлэтэр Сулууспа исписэлиистэрэ «Жилкомсервис» МУТ уонна «Якутскэкосети» ХЭТ үлэһиттэрин кытта куорат уокуруктарыгар санитарнай туругу, инженернэй ситимнэргэ ханан тэстии баарын бэрэбиэркэлиир үлэлэри ыыттылар. Ол курдук, тохсунньу 5 күнүгэр Строительнай, Гагаринскай уокуруктарга уонна Мархаҕа санитарнай туочукалары хомуйууну уонна дьаамалары бэрэбиэркэлээбиттэр.

Строительнай уокурукка толору хааччыллыылаах дьиэ аҕыйах буолан, «Жилкомсервис» МУТ үлэһиттэрэ тиэргэн территорияларыгар убаҕас бөххө, кирдээх ууга анаан «шайба» диэннэри туруораллар. «Куорат хаһаайыстыбатын үлэлэтэр Сулууспа» МХТ иһитиннэрбитинэн, уһун өрөбүллэргэ 210 «шайбаттан» 150 устууката оҥоһуллубут.

Станислав Новиков, «Куорат хаһаайыстыбатын үлэлэтэр Сулууспа» МХТ салайааччытын солбуйааччы:

— «Жилкомсервис» МУТ тимир «шайбалары» туруорууну саҕалаата, хаһыллыбыт дьаамалар улахан тымныыларга тоҥон хаалаллар. Итинник «шайбалар» туоллулар да, хомуллан иһэллэр, тоҥмуту погрузчик уонна самосвал көмөтүнэн хоҥнороллор, территорияны ыраастыыллар.

Бырааһынньык күннэригэр кытаанах бөҕү хомуйууга икки сменанан «Якутскэкосети» ХЭТ 26 бөҕү таһар тиэхиньикэтэ үлэлээбит. Региональнай оператор барыта  32 тиэхиньикэлээх.

Гагаринскай уокурук санитарнай туочукаларын күн ахсын управа дьуһуурунай исписэлиистэрэ бэрэбиэркэлээбиттэр. Можайскай уулуссатын 19/3, 23 нүөмэрдэрдээх дьиэлэрин бөх кутар сирдэрин көрбүттэр. Уокурук салайааччыта Евгений Сидоренко бэлиэтээбитинэн, саҥа дьыл өрөбүллэрин бастакы күннэригэр бөх кутар баахтара хомуйалларынааҕар түргэнник туола сылдьыбыт.

Евгений Сидоренко, Гагаринскай уокурук салайааччыта:

— «Якутскэкосети» ХЭТ үлэһиттэрин кытта суһаллык үлэлээн, барыта ыраас. Тиэргэн ыраастааччылар күн аайы хомуйаллар, биһиги өттүбүтүттэн хонтуруол эмиэ күн ахсын оҥоһуллар. Хомуллубатах, мууһурбут баар буоллаҕына, тута аактаны толоробут, эппиэтинэстээх сирэйдэргэ ыйыы биэрэбит, барыта хомуллар, таһыллар. Кыаллыбат, быһаарыллыбат боппуруос суох.

Евгений Сидоренко салайар хампаанньаларга уонна ресурсанан хааччыйар тэрилтэлэргэ бырааһынньыктары, тымныыны аахсыбакка көхтөөх уонна түргэн үлэлэрин иһин махталын тиэрдэр.

Олохтоох былаас дьаһалынан экономика эбийиэктэрин күн ахсын хонтуруоллуур курдук төгүрүк суукканан дьуһуурустуба 2021 сыл ахсынньы 23 күнүттэн 2022 сыл тохсунньу 11 күнүгэр диэри ыытылынна.