Туойтан оҥоһуктары сөбүлүүбүн

Мин үөрэх сыла саҕаланыаҕыттан элбэх куруһуокка сылдьан саҕалаабытым. Олортон биирдэстэринэн Ф.И. Авдеева аатынан Оҕо айымньытын дыбарыаһыгар ыытыллар «Туой Артс» диэн туойунан оҥоһуктары оҥоруу дьарыга буолар.

Салайааччыбыт Лена Васильевна Пинигина буоларын билэммин, наһаа үөрбүтүм. Тоҕо диэтэххэ кыра эрдэхпинэ «Тугутчаан» диэн уһуйааҥҥа иитээччим этэ. Ол кэмтэн номнуо сэттэ сыл ааспыт эбит.

Куруһуокпутугар 18 оҕо сөбүлээн сылдьабыт. Аан бастаан пластилинтан оҥоһуктары оҥорор этибит. Илиибитин дьарыктаан эҥин баран, туойга көспүппүт. Лена Васильевна оҥоһуктарбытын оһоххо буһаран хатарар. Оччоҕуна кэлэр дьарыкпытыгар кырааскалаан тупсаран биэрэбит. Билигин  иһит-хомуос оҥорон саҕалаатыбыт.

Бу куруһуок, мин санаабар, биһиги, оҕолор, сайдарбытыгар улаханнык көмөлөһөр. Оҕо айар дьоҕура арыллан, үөрэҕэр кытта ситиһиилээх буолар.  Ол эрэ буолбакка, холобур, мин элбэх саҥа доҕоттордоннум.