08.03.2022 | 18:00

Таптыыр кэргэммин куруук саныыбын...

Таптыыр кэргэммин  куруук саныыбын...
Ааптар: Киин Куорат
Бөлөххө киир

Антонина:

– Мин олоҕум киһи ымсыырбат олоҕо да буоллар, билигин дьоллоохпун дии саныыбын.

Оскуолаҕа киирэн баран, өссө кыра кылаастарга үөрэнэ сылдьан бирээмэ сэттэ-аҕыс сыл аҕа киһини таптаабытым. Тапталым, биллэн турар, миигин хантан көрүөй, оскуола кэнниттэн сопхуоска үлэлии сылдьан аармыйаҕа барбыта. Онтон кэлэн тырахтарыыстыы сылдьан бэйэтин саастыыта кыыһы кытта ыал буолбута.

Мин улаатан, дьон этэринэн, тупсаҕай көрүҥнээх кэрэ кыыска кубулуйбутум. Уолаттар сүгүн хаамтарбат да этилэр, ол курдук табаарыс, таптыыр уолаттар баар буолан испиттэрэ. Оччолорго суругунан, саҥа дьыллааҕы баҕа санаа альбомугар тапталы билинэр этилэр. Сорох ардыгар кыргыттар күнүүлүөхтэригэр диэри уол арай барыта миигин сөбүлүүр, таптыыр курдуга. Бэйэм сытыы-хотуу кыыс буолбатах этим, оскуолаҕа сылдьан биир уолу кытта ыкса доҕордоспутум.

Үөрэхпин бүтэрээт, кырдьаҕас төрөппүттэрдээх буолан, кинилэри көрөөрү, ханна да туттарса барбатаҕым, дойдубар ыанньыксыттыы хаалбытым. Дьэ ити кэмҥэ бастакы тапталым тырахтарыыстыыр этэ, сайынын үүт массыынатыгар үлэлиирэ, сайылыкпытыгар элбэхтэ тиэстэр буолбута. Онно урукку тапталым күөдьүйэн кэлбитэ, киһи хайдах да кистээбэт туругар киирбитим. Сэмэним эмиэ сэрэйбитэ, миэхэ “иирэн” кэргэнин, оҕолорун быраҕан, көһөн кэлбитэ. Мин саҕа дьоллоох дьахтар суох буолбута. Бырахпыт кэргэнин, оҕолорун харахтарын уута, миигин дэриэбинэ аҥаара үөҕүүтэ таах хаалбатаҕа быһыылааҕа. Дьиэ-уот туттан, быр-бааччы олорон, икки оҕолонон, бэйэ-бэйэбитин олуһун диэн өйдөһөн, таптаһан олордохпутуна, биир үтүө сарсыарда кэргэним барахсан хотонугар тахсан баран киирбэтэҕэ. Ол курдук кэлиргэтин аттыгар охтубутунан сүрэҕэ тохтоон тута барбыт этэ.

Хараҥа күннэр ааҥнаан кэлбиттэрэ, аньыым-харам арааһа иэстэстэҕэ буолуо дии санаатарбын да, оҕолорум тустарыгар олохпун салгыырга быһаарыммытым. Аны аҕыйах ый буолан билбитим, хат хаалбыт эбиппин. Үгүс уруута-аймаҕа суох, кырдьаҕас, көрүүгэ хаалбыт төрөппүттэрдээх сир-халлаан икки ардыгар туран хаалбытым. Арай өйдөөбүтүм, уот киниискэтин да сатаан толорбот эбиппин, хотоҥҥо ынахтарым ааттарын, ахсааннарын билбэт эбиппин. Барытын кини, барытын кэргэним, барытын аҕабыт толорон, оҥорон кэлбит. Миигин ытыс үрдүгэр илдьэ сылдьара, кыра оҕолуу биэбэйдиирэ, атаахтатара, күннээххэ көрдөрбөккө, былыттаахха быктарбакка, харааннаан илдьэ сылдьыбытын дьэ билбитим.

Хайыамый, барар сирим баҕана үүтэ, кэлэр сирим кэлии үүтэ да буоллар, бэйэ бодобун тардынан, кэргэним кэриэһигэр үһүс оҕобун күнү көрдөрөн син олох олорон кэллим.

Куруук саныыбын таптыыр киһибин, суохтуубун, алыһын диэн ахтабын, айманабын. Оҕолорум үөрэхтэнэн, үлэһит буолан, сиэн бэлэхтээтилэр, күнүм кинилэринэн тахсар, олоҕум салҕанар. Ол да буоллар кэргэммин олох умнубаппын, оҕолор аҕаларын төһө да кылгастык көрдөллөр, биллэллэр, куруук умуннарбакка кэпсиибин, киэн тутта сырыттыннар диэн олоҕун, үлэтин, бултаабытын-алтаабытын, буларын-таларын сэһэргиибин.

Кэлин бастакы кэргэнин оҕолоро улаатан, атын сиргэ да көһөн бардаллар, мин оҕолорбун булан, билсэн көрсөр, кэпсэтэр буолбуттара. Мин онно мэһэйдэспэппин, ыалдьыттыы кэлэллэригэр ыҥырабын, бэйэ-бэйэлэригэр көмөлөсүһэ, сүбэ-ама буола туруохтарыгар баҕарабын. Ол аата анараа бастакы кэргэнэ, оҕолоро миигин бырастыы гыммыт буоллахтара диэн суобаһым чэпчиэхчэ, туохтан эрэ ыар санааттан ыраастаммыт курдук сананан, билигин салгыы олоробун, мин олохпор көрсүбүт ыарахаттарбын, санаабын-онообун, хараҕым уутун ким да көрсүбэтигэр баҕарабын.

Сонуннар

Ордук ааҕаллар

Полина Победа:  «Дьоллоох буолуҥ олоххутугар, түүлгүтүгэр»
Дьон | 29.02.2024 | 10:00
Полина Победа: «Дьоллоох буолуҥ олоххутугар, түүлгүтүгэр»
Бүгүҥҥү ыалдьыппын улаханнык билиһиннэрэр да наадата суох буолуо. Кинини, өрөспүүбүлүкэ сахалыы тыллаах олохтоохторо ПОЛИНА ПОБЕДА диэн ааттаах хоһоонньуту, социальнай ситим устун билбиттэрэ ыраатта. Полина Пантелеймоновна Находкина хомоҕой тыллаах хоһоонноро элбэх киһи кутун туталлар, махталын ылаллар. Кини ону таһынан имигэс үҥкүүһүт, шпагат түһэр, араас эрчиллиилэри холкутук оҥорор, төбөтүн оройугар турар –...
Волонтер эр дьон. Кинилэр кимнээҕий?
Дьон | 22.02.2024 | 11:20
Волонтер эр дьон. Кинилэр кимнээҕий?
Биһиги волонтердар тустарынан ордук пандемия кэмигэр истибиппит. Кинилэр ыалдьыбыт, кыаммат дьоҥҥо астарын, эмтэрин босхо тиэрдэн биэриигэ, араас соруктарга сылдьыбыттара. Волонтердар ойуур баһаардарыгар эмиэ күүстэрин харыстаабакка үлэлээбиттэрэ.
«Үрүҥ илгэ»: эдэр худуоһунньук Семен Нучеканов быыстапката
Сынньалаңңа | 18.02.2024 | 12:00
«Үрүҥ илгэ»: эдэр худуоһунньук Семен Нучеканов быыстапката
Олунньу 8 күнүттэн “Худуоһунньук дьиэтэ” галереяҕа эдэр худуоһунньук Семен Нучеканов “Үрүҥ илгэ” ааптарыскай быыстапката арылынна.
Дьахтар араастаах буолар эбит
Сынньалаңңа | 23.02.2024 | 14:00
Дьахтар араастаах буолар эбит
Сиимэ уол сааһа ыраатта, Саҥа дьыл саҕана отут биэһин туолбута. Бииргэ үөрэммит доҕотторо оҕо-уруу, дьиэ-уот тэринэн ырааппыттара. Онуоха эбии аҕата, биирдэ эмэ холуочуйдаҕына, чаал курдугунан көрөн олорон, ыал буолбакка сылдьарынан сирэй-харах анньара. Кырдьар сааска кэргэнэ суох соҕотох сылдьыы куһаҕанын өйдөтө сатыыра, ол кэннэ устунан ытаан барара. Ийэлэрэ барахсан ыалдьан, Сиимэ...