Төрүт норуоттар күннэрин көрсө – сэргэх тэрээһиннэр

Аһаҕас сурук (открытка) тас өттүгэр хоту дойдуну араҥаччылыыр Кындыкаан  дьүһүнэ уруһуйдаммыт, итиэннэ хорсун эбээн кыысчаанын туһунан мультипликационнай киинэ тизерын көрүөххэ сөп.

Үс күн тухары «Туймаада» эргиэн киинигэр Арассыыйа почтатын сотрудниктара аһаҕас суругу сөпкө толорон ыытарга көмөлөһүөхтэрэ. Арассыыйа үрдүнэн барыта 2000 аһаҕас сурук тарҕатыллыаҕа. Суругу тутааччылар ортолоругар СӨ хоту уонна арктическай улуустарын үөрэнээччилэрэ бааллар.

Итини сэргэ, сыл саҥатыгар  «Кындыкан» айар холбоһук көҕүлээбит «100 хартыына» аахсыйата салҕанар. Аахсыйа сүрүн сыалынан салгыны ыраастыыр фотокаталитическай кыраасканан уруһуйдаммыт хартыыналары наардаан мунньуу буолар. Түмүккэ хотугу тиэмэлээх туһалаах хартыыналар өрөспүүбүлүкэ медицинскэй тэрилтэлэригэр бэлэхтэниэхтэрэ.  

 Аахсыйаҕа кыттан аһаҕас суругу ыытыан баҕалаахтары атырдьах ыйын  8-10 күннэригэр «Туймаада» эргиэн киинин 1-кы этээһигэр 11:00 чаастан 17:00 чааска диэри күүтэллэр.  

Дьокуускай олохтоохторун уонна ыалдьыттарын көхтөөх кыттыыны ыларгытыгар ыҥырабыт!