«Үтүө киэһэнэн, доктор!»

Атырдьах ыйын 9 күнүттэн Дьокуускай куоракка «Үтүө киэһэнэн, доктор!» аахсыйа үлэлии турар, диэн иһитиннэрэр СӨ Доруобуйа харыстабылын министиэристибэтин пресс-сулууспата.

Ол курдук, киин куорат олохтоохторо бэнидиэнньиктэн субуотаҕа диэри үлэ чааһын кэнниттэн киэһэ 18.00 чаастан 22.00 чааска диэри медосмотр барар, быраас консультациятын ылар, анаалыс туттарар, онкоскрининг ааһар, дерматологка көрдөрүнэр, ВИЧка уонна гепатикка бэрэбиэркэлэнэр, диспансеризацияны ааһар кыахтаахтар. Аахсыйа балаҕан ыйын 15 күнүгэр диэри салҕанар.

КамАЗ массыына базатыгар тэриллибит ФЛГ уонна маммограф аппарааттаах көһө сылдьар комплекстар үлэлиир аадырыстара:

1 №-дээх поликлиника – Доҕордоһуу болуоссата;

2 №-дээх балыыһа – «Оригинал» маҕаһыын, Можайскай уул., 27; 

3 №-дээх балыыһа – 45 №-дээх «Земляничка» оҕо саада, Автодорожнай уул., 40/4;

Дьокуускай куорат Медкиинэ – «Хоттей» маҕаһыын, Федор Попов уул., 8/1;

СӨ Уопсастыбаннай доруобуйа уонна медицинскэй профилактика киинэ – «Елочка» маҕаһыын, Кеша Алексеев уул., 7.