«Сыл маастара» куонкурус түмүктэннэ

Тула куоракка «Сыл маастара» Бүтүн Арассыыйатааҕы куонкурус түмүктэннэ. Бастакы түһүмэххэ, 15 хамаандаҕа арахсан, үөрэҕирии «кейстарын» быһаарбыттара. Кыттааччылар сорудах кэллиэгэлэрин билиилэрин, сатабылларын сыаналыырга көмөлөспүтүн бэлиэтээбиттэрэ.

Иккис түһүмэххэ Арассыыйа Федерациятын 89 субъегын кыайыылаахтара устудьуоннарга аналлаах аһаҕас дьарыгы ыыппыттара. Кыттааччылар үөрэтиигэ ураты ньымаларын уонна устудьуоннары практическай өттүнэн бэлэмниир технологиялары баһылаабыттарын көрдөрбүттэрэ.

Саха сирин аатыттан Дьокуускайдааҕы Ю.А.Готовцев аатынан сервис технологическэй техникумун производственнай үөрэтиигэ маастара Зоя Готовцева кытынна. Аһаҕас уруокка Зоя Ивановна Тула устудьуоннарыгар эрэстэрээн  молекулярнай куукунатын туһунан кэпсээтэ. Хомойуох иһин, кини бириистээх миэстэҕэ тиксибэтэ.

Орто профессиональнай үөрэхтээһин күнүгэр Бүтүн Арассыыйатааҕы «Сыл маастара» куонкурус түмүгэ билиннэ. Ол курдук, кыайыылааҕынан Тюмень куорат Тутуу индустриятыгар уонна куорат хаһаайыстыбатыгар техникумун преподавателэ Иван Зарубин буолла. Эрдэ этиллибитинэн, кыайыылаах 200 тыһыынча суумалаах бирииһинэн наҕараадаланыаҕа.