Спорт сонуннара

Мэҥэ Хаҥалас боксаҕа оскуолатын иитиллээччитэ, спорт үтүөлээх маастара Василий Егоров Хоту Африка Марокко Королевствотыгар буолан ааспыт норуоттар икки ардыларынааҕы турнир кыайыылааҕа буолла. Василий Арассыыйа сүүмэрдэммит хамаандатын чиэһин 51 кг чаҕылхайдык көмүскээтэ. Рингэҕэ үс төгүл таҕыста. Эквадор уонна Марокко боксердарын кыайталаан баран финалга Европа былырыыҥҥы чөмпүйүөнэ испанец Мартин Молины 5:0 итэҕэтиилээхтик хотон, кыһыл көмүс кур, кыһыл көмүс мэтээл хаһаайына буолла уонна 4000 долларынан наҕараадаланна. Василий Егоров тренерэ бииргэ төрөөбүт убайа, боксаҕа спорт маастара Николай Егоров.

Сахабыт сирин адаптивнай спорка спортсменнара Арассыыйа күрэхтэһиилэригэр ситиһиилэринэн үөрдэллэр. Амма Болугуруттан төрүттээх-уустаах Виктория Петрова Арассыыйа Кубогар дьаадыраны 10 м 04 см ыраахха анньан, Арассыыйа рекордун олохтоото уонна норуоттар икки ардыларынааҕы кылаастаах маастар нуорматын толордо. Мэҥэ Хаҥалас ыччата Айаал Сивцев Арассыыйа Кубогар дьаадыраны анньыыга эмиэ Арассыыйа рекордун олохтоото, маастар нуорматын толордо. Виктория Петрованы уонна Айаал Сивцеви тренердэр Василий Оленов уонна Петр Давыдов эрчийэллэр.

Өймөкөөн Томторугар үтүө үгэскэ кубулутуллан сыллата ыытыллар “Тымныы эргимтэтин” 42 км 95 м уһуннаах классическай марафонугар Саха сириттэн, Удмуртияттан, Владимирскай уонна Тверь уобаластарыттан кэлэн кытыннылар. Эр дьоҥҥо Өлүөхүмэ уҥмат тыҥалаах быһыйа Александр Моедо биэтэккэ бастакынан кэллэ, көрдөрүүтэ 3 чаас 02 мүнүүтэ. Өймөкөөн марафонун икки төгүллээх кыайыылааҕа, быйылгы сүүрүү үрүҥ көмүс призера, Чурапчытааҕы спорт институтун научнай үлэһитэ Василий Лукин ситиһиитин быйыл 100 сааһа бэлиэтэнэр, кинини оҕо эрдэҕиттэн бүөбэйдээн улаатыннарбыт эһэтэ М.М. Мартьяновка анаабыта күрэхтэһии биир бэлиэ түгэнэ буолла. 
Дьахталларга Уус Алдантан Изабелла Борисова кыайыыны ситистэ, көрдөрүүтэ 3 чаас 35 мүн. 21 км полумарафоҥҥа Леонид Зыков, Полина Слободчикова бастаатылар. 10 км Василий Филиппов, Капиталина Харайданова, 5 км 74 саастаах Степан Лыткин, 30 саастаах Сардаана Федорова бастыҥ көрдөрүүлэннилэр. Аан туманынан оргуйар тымныыга барыта 91 быһый тиийэн сүүрдэ. 70 саастарын лаппа ааспыт Егор Абрамов, Ион Васильев, Мындыр Куйаар, Степан Лыткин, Мария Неустроева, Варвара Макарова, Анастасия Колесова, 80 сааһын ааспыт Филипп Гуляев сааһырыыны киэр кыйдааннар сүүрэ сылдьаллара кэрэхсэбиллээх.

“Успех каждого ребенка” (“Хас биирдии оҕо ситиһиитэ”) федеральнай бырайыак чэрчитинэн өрөспүүбүлүкэ бүддьүөтүттэн тыа сирин оскуолаларын спортивнай саалаларын саҥардыыга 24,6 мөл. солк. көрүлүннэ. Өрөспүүбүлүкэ бырабыыталыстыбатын уурааҕынан Алдан оройуонун Томмот бөһүөлэгин, Үөһээ Халыма Зырянкатын, Бүлүү Халбаакытын, Өлүөхүмэ 2 №-дээх  уонна Уус Алдан Тулунатын оскуолаларын спортивнай саалалара өрөмүөннэниэхтэрэ. Чурапчыга Төлөй оскуолатыгар үөрэнэр кылаастар спортивнай саалаҕа кубулутуллан оҥоһуллуохтара. Бу саҥа үүммүт 2023 сылга 36 оскуола спортивнай инбэнтээринэн уонна оборудованиенан хааччыллыаҕа, спортивнай балаһаакка 10 оскуолаҕа оҥоһуллуоҕа. Физкултууранан дьарыктанар материальнай-техническэй баазаны сайыннарыыга өрөспүүбүлүкэ үрдүнэн 37,5 мөл.солк. көмө оҥоһуллуоҕа.

Кемерово куоракка буолар Норуоттар икки ардыларынааҕы “Азия оҕолорун” 2-с кыһыҥҥы Спортивнай оонньуулар саҕаланаллара икки нэдиэлэ хаалла. Оонньуу Бэрэсидьиэнэ Владимир Максимов хайыһар уонна керлинг күрэхтэһиилэрэ ыытыллыахтаах “Локомотив” уонна “Сосновай” спорт эбийиэктэрин, Междуреченск куоракка хайаттан хайыһарынан түһүү комплексын тиийэн көрдө-иһиттэ. Оҕолор кыһыҥҥы Спортивнай оонньууларыгар Азия дойдуларыттан, Белоруссияттан уонна Арассыыйа регионнарыттан 1000 кэриҥэ спортсмен кыттыаҕа. Күрэхтэһиилэр бырагыраамаларыгар хайыһарынан сүүрүү, хаҥкылааһын, ол иһигэр шорт-трек, керлинг, фигурнай хаҥкылааһын, хоккей, тармплинтан хайыһарынан ыстаныы, фристайл, сноуборд, хайа спорда уонна хаарга волейболлааһын бааллар. Оонньуулар историяларыгар аан бастаан киберспорт, хаарга волейболлааһын уонна компьютернай спорт киллэрилиннилэр.

“Азия оҕолорун” 2-с кыһыҥҥы Оонньуулара олунньу 23 күнүттэн кулун тутар 5 күнүгэр диэри Кемеровоҕа, таас чоҕунан аатырар Кузбасска буолуохтара.