Спорт сонуннара

Белоруссия көҥүл уонна греко-римскэй тустууларга чемпионаттарыгар түөрт саха бөҕөһө чаҕылхайдык кытынна. Ньургун Скрябин 65 кг – Белоруссия түөрт төгүллээх, Арыйаан Тютрин 57 кг – икки төгүллээх, Андрей Бекренев 61 кг үс төгүллээх чөмпүйүөн буолары ситистилэр. Амма ыччата Александр Гурьев Белоруссия чемпионатыгар греко-римскэй тустууга аан бастаан кытынна уонна 55 кг кыһыл көмүс мэтээл хаһаайына буолла. 

“Модун” спорткомплекска 16-17 саастаах уолаттарга Тарскай көҥүл тустууга биирдиилээн уонна хамаанданан бастыыр иһин чемпионатыгар уоннуу мэтээллээх, ол иһигэр үстүү кыһыл көмүс, иккилии үрүҥ көмүс уонна биэстии боруонса мэтээллэрдээх Дьокуускай хамаандата бастаата; чурапчылар – иккис, сунтаардар тоҕус, ол иһигэр биир кыһыл көмүс, икки үрүҥ көмүс, алта боруонса мэтээллээх үһүс буоллулар. Чемпионат бастыҥ бөҕөстөрүн ааттарын Владимир Басов (Чурапчы), Константин Слепцов (Мэҥэ Хаҥалас), Сергей Петухов (Уус Алдан), “Кыраһыабай хапсыһыы иһин” Роман Кириллин ( Сунтаар) уонна Михаил Осипов (Ньурба), “Кыайыыга дьулуурун иһин” Семен Сивцев (Уус Алдан) ыллылар.

Үөһээ Бүлүүгэ буолан ааспыт Выбор Быкалыров кэриэһигэр өрөспүүбүлүкэ хапсаҕайга турнирыгар абсолютнай чөмпүйүөн үрдүк аатын Бүлүү күүстээх маастара Николай Николаев ылла уонна 55 тыһ. солк. наҕараадаланна.

Чурапчыга Александр Федотов аатынан спорт комплекска ыытыллыбыт Николай Петрович Федоров кэриэһигэр өрөспүүбүлүкэ үөрэнээччилэрин волейболга турнирыгар 20 хамаанда түмсэн күрэхтэстэ. Уолаттарга чурапчылар бастаатылар, Таатта – иккис, Амма – үһүс, кыргыттарга эмиэ Чурапчы хамаандата кыайда, Өлүөхүмэ – иккис, Амма үһүс бириистээх миэстэлэргэ тигистилэр. Кыайыылаах Чурапчы хамаандаларын тренердэр Саргылаана Оконешникова, Альберт Федоров бэлэмнээтилэр.

Дьокуускайга “Триумф” спорт уораҕайыгар буолан ааспыт өрөспүүбүлүкэ чэпчэки атлетикаҕа кыһыҥҥы чемпионатыгар 60 м сүүрүүгэ дьахталларга Ленскэйтэн Ольга Белова уонна Дьокуускайтан Ольга Храмова 8,2 сөкүүндэ тэҥ көрдөрүүлээх иккиэн кыһыл көмүс мэтээлинэн наҕараадаланнылар. Эр дьоҥҥо Ленскэйтэн төрүттээх-уустаах Уус Алдан аатыттан кыттар Валентин Иванов 60 уонна 200 м иннигэр кими да түһэрбэтэ. Дьокуускайтан Диана Адасько 200 м уонна 400 м бастаталаата. 800 м сиргэ сүүрүүгэ Нерюнгриттан Роман Щетников кыайда. Мииринэйтэн Регина Кулагина 800 м уонна 1500 м  Мэҥэ Хаҥаластан кыттар Чурапчы ыччата Константин Драгунов 1500 м уонна 3000 м бастаталаатылар.  Ыстаныы көрүҥнэригэр Мэҥэ Хаҥаластан Игорь Скрябин, Хаҥаластан Валерия Олесова, үрдүгү ойууга Алдантан Владислав Дербенев өрөспүүбүлүкэ чөмпүйүөннэринэн ааттаннылар. Мас тардыһыытыгар аан дойду үс төгүллээх чөмпүйүөнэ Уус Алдантан Дмитрий Попов дьаадыраны саамай ыраахха анньан кыыратта.

Классическай тустууга Амматтан бастакы ССРС спордун маастара Дмитрий Максимов кэриэһигэр греко-римскэй тустууга оҕолорго өрөспүүбүлүкэҕэ бастыыр иһин турнирга 13 улуустан уонна куораттартан 32-н 120 кг диэри ыйааһыннаах 200-кэ кыттааччы күөн көрүстэ. Хамаанданан түмүккэ бастакы маастар Дмитрий Максимов биир дойдулаахтара аммалар бастаатылар, иккис – Мэҥэ Хаҥалас, үһүс – Дьокуускай.