«Созидай» Дьокуускай ыччатын түмтэ

Сүлүөт биир сүрүн тэрээһининэн «Ыччат уонна кэскил» диэн тиэмэҕэ стратегическай сиэссийэ буолла. Манна ыччаттар Дьокуускай куорат 2032 сыллааҕы маастар-былаанын тула кэпсэттилэр.

«Эдэр дьон араас эйгэҕэ бэйэлэрин талааннарын, дьоҕурдарын көрдөрдүлэр. Кинилэргэ экспертэр – «Мин спорду кытта үүнэбин» уопсастыбаннай тэрилтэ бэрэссэдээтэлэ, «Федком» ХЭТ дириэктэрин солбуйааччы Кирилл Соболев уонна ыччат бырайыактарын Бүтүн Арассыыйатааҕы федеральнай эксперэ Дмитрий Куприянов көмөлөстүлэр», – диэн Дьокуускай куорат Олохтоох дьаһалтатын Уопсастыбаннай сибээскэ уонна ыччат политикатыгар салаатын салайааччыта Андрей Михайлов кэпсиир.

Кыттааччылар араас хабааннаах тиэмэлэргэ сытыы кыһалҕалары дьүүллэстилэр, бэйэлэрин идиэйэлэрин уонна этиилэрин үллэһиннилэр.

Ону сэргэ, Олохтоох дьаһалта Уопсастыбаннай сибээскэ уонна ыччат политикатыгар салаатын уйулҕаһыттара билсиһиигэ уонна хамаанданан үлэҕэ трениннэри ыыттылар.

«Созидай» кыттыылаахтарын бырайыактарын Ыччат дьыалатыгар уонна социальнай коммуникацияларга миниистири солбуйааччы Андрей Сосновскай, «Мин спорду кытта үүнэбин» уопсастыбаннай тэрилтэ бэрэссэдээтэлэ Кирилл Соболев, «Уйгу-быйаҥ» тэрилтэ генеральнай дириэктэрэ Раиса Контоева уонна ыччат бырайыактарын Бүтүн Арассыыйатааҕы федеральнай эксперэ Дмитрий Куприянов сыаналаатылар.

Сүлүөт кэмигэр киин куорат көхтөөх ыччатын махтал суруктарынан наҕараадалаатылар.

Түмүккэ Андрей Михайлов сүлүөт саҥа интэриэһинэй бырайыактары уонна дьаһаллары саҕалаабытын бэлиэтээтэ.