Социальнай хантараак диэн тугуй?

Социальнай хантараак диэн судаарыстыба кыаммат араҥаны, аччыгый дохуоттаах дьиэ кэргэни уонна гражданнары өйүүр миэрэтэ. Олох охсууларыттан, ыарахан балаһыанньаттан тахсарга көмө буолар сыаллаах. 

Кыаммат араҥа (дохуоттара олох таһымын алын кээмэйиттэн кыра дьон) Социальнай харысхал управлениетыгар тиийэн социальнай хантараак түһэрсэллэр уонна харчынан көмө ылаллар. Сайаапканы судаарыстыбаннай уонна муниципальнай өҥөлөр порталларын көмөтүнэн онлайн ыытыахха эмиэ сөп.

Көмө харчы кыаммат араҥа социальнай адаптациятыгар, ол аата олоҕун тупсарарыгар ананар. Холобур, хаһаайыстыба тэринэригэр, бэйэ дьыалатын саҕалыырыгар, идэтийбит үөрэхтээһини ыларыгар, о.д.а. Бэл дьиэни өрөмүөннэниэххэ, оскуола форматын атыылаһыахха, оҕолор уһуйааннарын төлүөххэ сөп.  Сорох регионнарга өссө ОДьКХ өҥөтүгэр иэстэн төлөрүйэргэ көмөлөһөллөр.

Харчынан көмө кээмэйэ хас биирдии түгэҥҥэ туһунан көрүллэр. Холобур, хаһаайыстыба тэринэргэ 187 тыһ. солк. диэри ылыахха сөп. Олох очуруттан тахсарга 14 тыһ. солк. көмө бэриллиэн сөп. Барытын Социальнай харысхал управлениетыттан чуолкайдаһаҕыт.

Социальнай хантараагы хаһан түһэрсиэххэ сөбүй:

Ыарахан балаһыанньаттан тахсар сыаллаах.

Дьиэни-уоту, хаһаайыстыбаннай тутуулары өрөмүөннүүргэ.

Кыстыкка, оттук сезонугар бэлэмнэнэргэ.

Эбии үөрэнэргэ, идэни баһылыырга.

Оҕону уһуйаанынан хааччыйарга.

Арыгыттан, наркотиктан эмтэнэргэ.

Онтон да атын түгэннэргэ (таҥас-сап, оскуола тээбиринин, эмп-томп атыылаһарга, о.д.а.)

Хаһаайыстыба тэринэргэ

Сүөһүнү атыылаһарга уонна тутарга.

Тыа хаһаайыстыбатын тиэхиньикэтин атыылаһарга.

Үүнээйини үүннэрэргэ ороскуоту сабынарга.

Бэйэ дьыалатын саҕалыырга. Манна саамай сүрүнэ – ИП хантараак болдьоҕо бүтүөр диэри сабыллыа суохтаах.

Саха сирин олохтооҕо социальнай хантараак түһэрсэригэр:

Бэйэтэ уонна дьиэ кэргэнин чилиэннэрэ Саха өрөспүүбүлүкэтин олохтоохторо буолуохтаахтар.

Сайаапка түһэрээччини кытта сокуоннай саастарын сиппит дьиэ кэргэн чилиэннэрэ бары социальнай хантараакка сөбүлэһэллэрин биллэриэхтээхтэр.

Сайаапка түһэрээччи уонна дьиэ кэргэн чилиэннэрэ ИП, бааһынай хаһаайыстыба учредителлэрэ буолуо суохтаахтар.

Дохуоттара олох таһымын алын кээмэйиттэн кыра буолуохтаах.

Дохуоттарын, баайдарын-дуолларын, дьиэ кэргэннэрин састаабын туһунан кырдьыктаах информацияны биэриэхтээхтэр.

Социальнай хантараак 3 ыйтан 1 сылга диэри оҥоһуллар. Тирэҕирэр сокуона – 2017 с. от ыйын 3 к. 207 нүөмэрдээх СӨ Бырабыыталыстыбатын Уурааҕа