Сири атыылаһарбытыгар тугу бэрэбиэркэлиэхтээхпитий?

Тутуу сезона саҕаланна. Дьон дьиэ туттар сирин атыылаһарыгар бастаан туохха болҕомто ууруохтааҕый, тугу бэрэбиэркэлиэхтээҕий? Бу туһунан кылгастык уонна өйдөнүмтүөтүк сир боппуруостарыгар үлэлиир юрист Александра Портнягина (@aleksandra_portnyagina) кэпсиир:

– Сир кимиэнэ буоларын туоһулуур докумуоннары таһынан, бастатан туран, ЕГРН-тан сиһилии выписка сакаастыыгыт. Манна, баар буоллаҕына, хааччахтар уонна толук, солуок ууруллуу туһунан информация барыта киирэ сылдьар буолар.

www.spv.kadastr.ru сервиһинэн туһанар табыгастаах. Выписка тута кэлэр.

ЕГРН-тан выписка ылан баран, онно ыйылла сылдьар сири туһаныы ураты зонатыгар болҕомтобутун ууруохтаахпыт. Маны тэҥэ хамсаабат баай-дуол (учаастакка баар дьиэ) туһунан информацияны үөрэтэбит. Ону өссө публичнай кадастровай каартаҕа бэрэбиэркэлиэххэ сөп. Каартаны көрөрбүтүгэр сөп түбэһэр дьапталҕаны холбуурбутун умнубаппыт.

Куорат тутуутун докумуоннарын бэрэбиэркэлииргэ “Геопортал Якутск” сайты туһанабыт.  Билиҥҥи версията соччото суох, үгүс туһалаах өттүн ылан кэбиспиттэр. Ол да буоллар бу сайт нөҥүө сир учаастага ханнык территория зонатыгар киирэрин уонна сири араарыы бырайыагар төһө сөп түбэһэрин билэбит.

Сир анала докумуоҥҥа ыйыллыбыта суолтата кыра. Оннооҕор улахан суолтаны сир ханнык зонаҕа киирэрэ ылар. Сир учаастагын эрэсиимэ ханнык зонаҕа киирэриттэн быһаччы тутулуктаах. Холобур, бу зонаҕа ханнык тутуу көҥүллэнэрэ, о.д.а.

Сир аналыгар территориятааҕы зонатын анала сөп түбэһиэхтээх. Холобур, чааһынай дьиэни туттарга ылбыт сиргит (ИЖС) зоната Ж-2А эбэтэр Ж-1 буолуохтаах.

Дьиэ туттарга анаан ылар сиргит туһата суох буолан хаалыан сөп. Ол иһин бу этиллибит дааннайдары бэрэбиэркэлииргитин сүрэҕэлдьээмэҥ диэн сүбэлиибин.