09.12.2023 | 12:00

Сирэй тириитин сымнатар мааскалар

Сирэй тириитин сымнатар мааскалар
Ааптар: Розалия Томская
Бөлөххө киир

Таһырдьа хахсаат тыал, дьыбар, тымныы турарыттан уонна дьиэлэрбит иһигэр ититии ситимиттэн сиигэ суох, аһара “кураанах” салгыннаахпытыттан сирэйбит тириитэ хатар. Сирэйбит тириитин сымнатарга араас мааскалары бэйэбит оҥостуохпутун сөп.

Тириибит эрдэ кырдьыбатын, аһара куурбатын-хаппатын туһугар сууккаҕа 1,5-2 лиитирэ ууну иһэрбитин умнубаппыт. Былыргы сахалар тирии хатырарыгар араас кыыл сыатын, үүтү, сүөгэйи, арыыны бистэллэрэ дииллэр. Оттон аныгы үйэ киһитигэр кириэм, лосьон, мааска арааһа атыыга баар. Ол эрэн бэйэ оҥостуу мааската натуральнай уонна туох да хос эбилигэ суох буолан абыраллаах.

Мүөттэн

Мүөт доруобуйаҕа олус туһалаах дьайыылааҕын таһынан, тириини көрүнэргэ эмиэ олус барсар. Тирии уутун тутан хааларыгар көмөлөһөр кыахтаах. Айылҕаттан ылыллар буолан, киһи тириитин үрдүкү хаҕыгар судургутук иҥэн киирэр.

Сымнатар маасканы оҥосторго үүтү уонна мүөтү тэҥ өлүүлээн булкуйабыт. Ыраас уонна кураанах сирэйбитигэр бистэн баран 10-ча мүнүүтэ тутабыт, онтон мүлүркэй уунан суунан кэбиһэбит.

Олус күүскэ хатырбыт, быһыта барбыт тириигэ бу маасканы чаас аҥаара да тутуохха сөп. Сымныар диэри нэдиэлэҕэ 2-3-тэ оҥостуохха сөп.

Банаантан

Аһара сиппит, харааран эрэр банааны быраҕан кэбиспэккэ, тириибитин сымнатар мааска оҥостуохпутун сөп. Банаан элбэх битэмииннээх уонна антиоксиданнаах буолан, кырдьыыны утары үлэлиир кыахтаах.

Банааны биилкэнэн иһиккэ ньыһыйабыт уонна сирэйбитигэр мааска оҥостон, чаас аҥаарын устата тутабыт.

Манна мүөт эбиэххэ сөп. Сирэйгэ эрэ буолбакка, киһи этигэр барытыгар да сотторо барсар. Сылаас уунан сууйан кэбиһэбит.

Сүөгэйтэн

Сүөгэй минньигэһин таһынан, тириини сымнатарга туттуллар саамай натуральнай сириэстибэ. Сирэй тириитин килэркэй, кылабачыгас оҥорор.

Ыраас уонна кураанах сирэйбитигэр бистэн, 30-ча мүнүүтэ тутабыт. Эмиэ маннык үүт үрүмэтинэн соттуохха сөп.

Авокадоттан

Фрукта атыылыыр лааппыларга атыыга наар баар буолбут үүнээйи аһа. Сирэй тириитин харыстанар күүһүн улаатыннарар кыахтаах.

Биилкэнэн иһиккэ ньыһыйабыт уонна тириибитигэр бистэн, 15 мүнүүтэ тутабыт. Маннык маасканы күн аайы да оҥостуохха сөп.

Алоэттан

Дьиэҕэ үүнэр алоэ сибэкки олус туһалааҕа уруккуттан биллэр, косметологияҕа былыр-былыргыттан киэҥник туһаныллар. Тирии кыһыйарын тохтотор, кыра бааһы оһордор, хатырбыт тириини сымнатар кыахтаах.

Алоэ сэбирдэҕин быһан ылан иһинээҕи гель курдук чалахайын баһан ылабыт. Бу чалахайы тириибитигэр 10 мүнүүтэ тутабыт. Маннык маасканы иккилии хоно-хоно оҥостобут.

Маны тэҥэ алоэны кокос арыытын кытта булкуйан, дэлби ытыйан баран мааска оҥостуохха сөп. Хаппахтаах иһиккэ уура сырыттахха,  өр хараллар.

Сонуннар

Ордук ааҕаллар

Истиҥник санаан
Дьон | 05.07.2024 | 20:38
Истиҥник санаан
(Учууталбар Раиса Реасовна Кулаковскаяҕа ананар)
Светлана Дьяконова: «Саҥаттан ыал буолан эрэр курдукпут...»
Дьон | 04.07.2024 | 16:00
Светлана Дьяконова: «Саҥаттан ыал буолан эрэр курдукпут...»
Быйылгы халаан Хатырык нэһилиэнньэлээх пуунун олох үөйбэтэх өттүттэн ылан, олохтоохтору ууга-уокка түһэрбитин ааһан, уйулҕаларыгар да охсуу ыллылар, күн бүгүн ол содулун туоратыыга күүскэ үлэлииллэр, кэлэн ааспыт иэдээни оһоруналлар.   Светлана Васильевна Дьяконова, Хатырык олохтооҕо, биэнсийэлээх, култуура эйгэтигэр 35 сыл үлэлээн, “Култуура туйгуна” бэлиэлээх үлэ бэтэрээнэ, бүгүн ааҕааччыларга халаан иэдээнин туһунан кэпсиир:...
Туймаада ыһыаҕын туһунан дьон санаата
Сонуннар | 04.07.2024 | 14:00
Туймаада ыһыаҕын туһунан дьон санаата
Туймаада ыһыаҕа ыһыллар Үс Хатыҥ сирэ-уота куорат кииниттэн төһө да ыраах турдар, норуот уустук айаны, араас мэһэйдэри аахсыбакка, бииргэ мустар үөрүүтүн билээри, алгыс баһын сыалаары, кэлэр сылга күүс эбинээри, быйыл номнуо үйэ чиэппэриттэн ордук саараабакка дьулуһар. Быйылгы ыһыах тэрээһинин туһунан норуот санаатын билсээри, ыйынньыктарынан сирдэтэн, түһүлгэлэринэн хаамтыбыт.   Бастатан туран, оптуобус....
НВК Саха бырагыраамата от ыйын 1-7 күннэригэр
Сонуннар | 30.06.2024 | 10:00
НВК Саха бырагыраамата от ыйын 1-7 күннэригэр
Понедельник, 1 июля  6:00 Сана кун 6+ 7:00 Международные дневники МСИ "Дети Азии" 6+ 7:05 Сана кун 6+ 8:00 Утро Якутии 6+ 9:00 "Якутия" информационная программа 12+ 9:15 Сана кун 6+ 10:00 Дневник Игр "Дети Азии" 6+ 10:15 Саха сатаабата суох 6+ 10:45 О5о саас ыллыыр 6+ 11:00 VIII  Игры...