24.06.2022 | 12:00

Саха сирин ТОП-10 ыччата

Саха сирин ТОП-10 ыччата
Ааптар: Айталина Софронова
Бөлөххө киир

Хас биирдии көлүөнэ бэйэтэ күөн туттар дьонноох. Аныгы көлүөнэ ыччат ортотугар ордук кимнээх биллэллэрий, холобур буолалларый?

Green Apelsin (Анжела Жиркова)

Green Apelsin – бу кини ыллыыр аата, сөбүлүүр фруктатын уонна ыллыыр бөлөҕүн ааттарын аттарбыт. Анжела номнуо 14 сааһыттан бу ааты псевдоним оҥосторго санаммыт. Кини куолаһын Арассыыйа дьоно барыта сөбүлээн истэр, сэҥээрэр. Кэрэ эйгэлээх кыыс музыканан үлүһүйэр, музыкальнай оскуолаҕа фортепиано кылааһын бүтэрбит. 16 сааһыгар «Что меня ждет» диэн ырыаны ыллаабытын Арассыыйа аатырбыт Russian Singers паблига бэлиэтии көрөн, дьон дьүүлүгэр таһаарбыта. 2021 сыллаахха «Хотугу тыал» диэн бастакы альбомун таһаарбыт. «Охота на лисицу» диэн ырыата YouTube балаһааккатыгар үс ый иһигэр 1 мөл. тахса көрөөччүлэммит. Билигин ырыаһыт кыысчаан Sony Music Entertainment лейбл тарбахха баттанар сулуһа.

 

Николай Тудиман

Талааннаах худуоһунньук. Уруһуйдара интэриниэт ситимигэр элбэхтик тахсаллар. Араас спецэффектэри туттар буолан, бэйэтэ туспа буочардаах, ураты көрүүлээх. Кыра эрдэҕиттэн өрөспүүбүлүкэҕэ ыытыллар граффити күрэхтэрин кыайыылааҕа. Цифровой үнүстүрүмүөннэр уонна анал бырагыраамалар көмөлөрүнэн хамсанар-имсэнэр көстүүлэри ситиһэр.

 

Uraan бөлөх

Айтал Алексеев уонна Дмитрий Попов Uraan бөлөхтөрүн 2015 сыллаахха тэрийбиттэр. Билигин хас даҕаны альбому оҥорон таһаардылар, саха ыччата кинилэри сөбүлээн истэр, холобур оҥостор. Биир да улахан тэрээһин кинилэрэ суох ыытыллыбат. Ырыалара сүрүннээн этно-сахалыы тыыны уонна аныгылыы истиили дьүөрэлиир.

 

Семен Аманатов

Сахабыт сирин биир талааннаах видеограф уола. Бэйэтин үлэлэригэр мэлдьи саҥа ньымалары, истиили көрдүүр. Хас даҕаны аатырбыт саха киинэтин устубута: «Мин үрдүбэр күн хаһан да киирбэт» (2019), «Хара хаар» (2021), «Замыкание» (2021), «Бөртөлүөт» (2021), «24 снега», «Тойон кыыл» уо.д.а. Режиссер Сергей Потаповтыын устубут «Дьөһөгөй Айыы» киинэтэ түүр-монгол киинэтин куонкуруһугар Гран-При хаһаайына буолбута.

 

Кира Тарасова

Кира – өрөспүүбүлүкэбит саамай эдэр уонна ситиһиилээх истилииһэ, сааһа 15. Бэйэтэ «Kira Tarasova studio” диэн агентстволаах, үлэһиттэрдээх. Оскуолаларга, эдэр кыргыттарга маастар-кылаастары ыытар, муода туһунан бэйэтин ситимигэр элбэхтик кэпсиир.

Сахаайа Гоголева

«Три кита» реклама агентствотын салайааччыта. Улахан тэрээһиннэри уонна күрэхтэри тэрийиинэн дьарыктанар. SMM исписэлиис быһыытынан уопсайа 1200 киһини үөрэппит. Пандемия кэмигэр эмчиттэргэ үтүө дьыала хамсааһынын тэрийээччилэртэн биирдэстэрэ.

 

Сергей Протопопов

2005 сылтан IT-эйгэтигэр үлэлиир, компьютернай оонньууларынан дьарыктаммыт, “MyTona” хампаанньа тэриллиитигэр уонна үлэҕэ киириитигэр сүҥкэн кылааттаах. Сергей билигин «Boontar Ltd” IT- хампаанньа бэрэсидьиэнэ. Арассыыйа уонна кыраныысса таһыгар саҥа инновационнай үлэлэри ыытар, чуолаан бизнескэ атыыны тупсарар туһугар үлэлэһэр. Өрөспүүбүлүкэ уопсастыбаннай олоҕор уонна региоҥҥа саҥа IT каадырдар, стартаптар тахсалларыгар суолу арыйааччы диэххэ сөп. 

 

Кюннэй Тимофеева

Кюннэй — «TAG» арт-резиденцияны тэрийээччилэртэн биирдэстэрэ. Резиденция эдэр айар талааннарга, худуоһунньуктарга аналлаах. Ол эбэтэр кинилэргэ үлэлиир балаһаакка бэриллэр.Арт-резиденция искусство бары салаатын хабар. Ол курдук, урут хаһан даҕаны искусствоны кытта алтыспатах дьоҥҥо араас хабааннаах маастар-кылаастары, үөрэх куурустарын ыыталлар. Кюннэй Art Public School 2018 сылтан эдэр худуоһунньуктар бөлөхтөрүн салайбыта. Ону тэҥэ, аатырбыт «Таврида» күрэх амбассадора.

Эдуард уонна Айсен Готовцевтар

Убайдыы-бырааттыы уолаттар Арассыыйа уонна Саха сирин IT-эйгэтин ырыынагар ситиһиилээхтик үлэлииллэр. Компьютернай оонньуулары айаллар, хас даҕаны бырайыактара Саха сиригэр таҥыллан, аан дойдуга атыыга тахсар. AppStore маҕаһыыҥҥа оонньуулара сүрүн испииһэккэ киирэллэр.

Ини-бии уолаттар айан таһаарар оонньууларыгар сытыы социальнай тиэмэлэри өрө туталлар. Холобура, чугас дьону кытта ситим, киһи уонна айылҕа уо.д.а. Хас биирдии оонньуулара олоххо баар түгэҥҥэ олоҕурар. Билигин хампаанньалара Арассыыйаҕа эрэ буолбакка, тас дойдуга эмиэ үлэлиир, сахалартан биир бастакынан виртуальнай офиһы олоххо киллэрбит дьон.

Бай Балалай

«БАЙ БАЛАЛАЙ» - YouTube-ханаалга интэриэһинэй дьону ыҥыран, дьиҥ олох уонна бэйэ икки ардыгар сыһыан туһунан видео таһаарар. Төрөппүттэр уонна оҕолор араас тиэмэҕэ аһаҕастык кэпсэтэллэр, күүтүллүбэтэх аһаҕас ыйытыыларга хоруйдууллар. Билигин 45 тыһ. тахса сурутааччылаах ханаалы Максим Ю-Ци-Фа уонна Айсен Калининскай диэн доҕордуу кинилэр туталлар. Уолаттар этэллэринэн, биир ролигы 30-ча чаас усталлар

Сонуннар

Ордук ааҕаллар

Замполит Александр:  «Эр санаалаах боотурдары төрөтөр Саха сиригэр сүгүрүйэбин»
Дьон | 12.07.2024 | 12:00
Замполит Александр: «Эр санаалаах боотурдары төрөтөр Саха сиригэр сүгүрүйэбин»
Бу сурук кэлбитин туһунан миэхэ Уус Алдан улууһун социальнай политика салаатын үлэһитэ, хаһыаппар сырдаппыт, анал байыаннай дьайыы саҕаланыаҕыттан үлэлии сылдьар Наталья Охлопкова от ыйын 3 күнүгэр эрийэн, хаһыаккар таһаарыаҥ дуо диэбитин тута сөбүлэспитим. Онон, сурук хайдах баарынан тылбаастаан, ааҕааччыларбар тиэрдиэм, Саха сирэ дьоруойдарын билиэхтээх!   “Наталья, дорообо! Мин аатым Александр. Мин...
Истиҥник санаан
Дьон | 05.07.2024 | 20:38
Истиҥник санаан
(Учууталбар Раиса Реасовна Кулаковскаяҕа ананар)
Светлана Дьяконова: «Саҥаттан ыал буолан эрэр курдукпут...»
Дьон | 04.07.2024 | 16:00
Светлана Дьяконова: «Саҥаттан ыал буолан эрэр курдукпут...»
Быйылгы халаан Хатырык нэһилиэнньэлээх пуунун олох үөйбэтэх өттүттэн ылан, олохтоохтору ууга-уокка түһэрбитин ааһан, уйулҕаларыгар да охсуу ыллылар, күн бүгүн ол содулун туоратыыга күүскэ үлэлииллэр, кэлэн ааспыт иэдээни оһоруналлар.   Светлана Васильевна Дьяконова, Хатырык олохтооҕо, биэнсийэлээх, култуура эйгэтигэр 35 сыл үлэлээн, “Култуура туйгуна” бэлиэлээх үлэ бэтэрээнэ, бүгүн ааҕааччыларга халаан иэдээнин туһунан кэпсиир:...
Туймаада ыһыаҕын туһунан дьон санаата
Сонуннар | 04.07.2024 | 14:00
Туймаада ыһыаҕын туһунан дьон санаата
Туймаада ыһыаҕа ыһыллар Үс Хатыҥ сирэ-уота куорат кииниттэн төһө да ыраах турдар, норуот уустук айаны, араас мэһэйдэри аахсыбакка, бииргэ мустар үөрүүтүн билээри, алгыс баһын сыалаары, кэлэр сылга күүс эбинээри, быйыл номнуо үйэ чиэппэриттэн ордук саараабакка дьулуһар. Быйылгы ыһыах тэрээһинин туһунан норуот санаатын билсээри, ыйынньыктарынан сирдэтэн, түһүлгэлэринэн хаамтыбыт.   Бастатан туран, оптуобус....