Саха сирин олохтоохторун сибиинньэ чуматын туһунан сэрэттилэр

Уһук Илиҥҥэ уонна Арассыыйа киин өттүгэр сибиинньэлэр африка чуматынан ыалдьан уустук быһыы-майгы үөскээбитинэн сибээстээн, биһиги өрөспүүбүлүкэбитигэр эмиэ куттал суоһуура билиннэ. Бу туһунан Россельхознадзор Управлениетын пресс-сулууспата иһитиннэрдэ.  
«2021 сыл балаҕан ыйыгар африка чуматын (АЧС) вируһун генома Амур, Владимирскай, Псковскай, Белгородскай уонна Еврейскай автономнай уобаластарга булуллубута», — диэн этиллэр иһитиннэриигэ.
Бүгүҥҥү туругунан дойду үрдүнэн 117 улахан түбэлтэ тахсыбыт, ол иһигэр 82 дьиэ сибиинньэлэрэ уонна 35 дьиикэй кабааннар ыалдьыбыттар.
Итинэн сибээстээн, сибиинньэ тутааччылары уонна сибиинньэ иитиитинэн дьарыктанар тэрилтэлэри ветеринарнай  быраабылалары булгуччу тутуһалларыгар, докумуона суох сибиинньэлэри уонна бородууксуйатын ылбаттарыгар, судаарыстыбаннай ветеринарнай сулууспаны кытта сөпсөһүүтэ суох атын регионнартан кыыллары уонна эттэрин, бородууксуйаларын киллэрбэттэригэр ыҥыраллар. 
Сибиинньэлэри хааччахтаах сирдэргэ, атын кыыллары кытта хантаактаһыннарбакка, мэччитэ ыыппакка уонна сиикэй ас тобоҕунан аһаппакка тутар ирдэнэр. 
«Болҕомтоҕо таһааран сэрэтэбит, сибиинньэ африканскай чуматын көбүтүү, тарҕатыы иһин административнай уонна холуобунай ирдэбил көрүллэр», — диэн иһитиннэриигэ тоһоҕолоон этиллэр