Саха сирин экэниэмикэтэ 10,5 млрд солкуобай эбии өйөбүлү ылыаҕа

Саха Өрөспүүбүлүкэтэ экэниэмикэни уонна нэһилиэнньэни өйүүр РФ Бэрэсидьиэнэ Владимир Путин эппит бары миэрэлэрин олоххо киллэрэр диэн брифиҥҥэ өрөспүүбүлүкэ Ил Дархана Айсен Николаев эттэ.  Бу туһунан Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрдэ.
«Экэниэмикэ салааларын уонна нэһилиэнньэни өйүүргэ эбии быһаарыылар кээмэйдэрэ 10,5 млрд солкуобайга тэҥнэһэр. Итинтэн 2,5 млрд – дьоҕус бизнес нолуогун кыччатыыга, 2 млрд – табаары эрдэттэн аҕалыыга, 5 млрд тахса – тыа хаһаайыстыбатын, сайдыы институттарын, промышленнаһы, авиацияны, IT-салааны өйөөһүҥҥэ уонна тэрилтэлэргэ чэпчэтиилээх кредиттэри биэриигэ ананна. Сотору кэминэн Ил Түмэн сессиятыгар ити быһаарыылар көрүллүөхтэрэ», – диэн бэлиэтээтэ Айсен Николаев. 
Нэһилиэнньэ дохуотун таһымын өйүүр сыаллаах 2022 сыл муус устар 1 күнүттэн бүддьүөт эйгэтин үлэһиттэрин хамнастарын үрдэтэр быһаарыы ылылынна. Бу иннинэ ити миэрэ алтынньы ыйга олоххо киирэрэ былааннаммыта. 
Итини кытта уустук балаһыанньаҕа киирбит гражданнарга, кыра дохуоттаах ыалларга аадырыстаах көмөнү оҥорор эбии миэрэлэр ылыллыахтара. 
«РФ Бэрэсидьиэнэ санкция усулуобуйаларыгар экэниэмикэни уонна нэһилиэнньэни өйүүр миэрэлэри биллэрдэ уонна регионнарга экэниэмикэ балаһыанньатын көннөрөргө эбии боломуочуйалары биэрдэ. Биһиги, өрөспүүбүлүкэ сайдыыта бытаарбатын, нэһилиэнньэ дохуота оннунан хааларын уонна уустук материальнай балаһыанньаҕа баар дьоҥҥо көмөлөһөр курдук, быһаарыылары суһаллык ылыныахтаахпыт», – диэтэ Айсен Николаев. 
Саха сирин Баһылыга иһитиннэрбитинэн, региоҥҥа тыын суолталаах табаар сөптөөх кээмэйэ бэлэмнэммит. Дьоҕус уонна орто бизнес эбии нолуок өттүнэн өйөбүлү ылаллар, итиэннэ тэрилтэлэргэ бородуукталары, ол иһигэр бурдугу уонна саахары эрдэттэн атыылаһан хаһааналларыгар көмө оҥоһуллар. Урукку өттүгэр бородуукта 4 ыйга тиийэр гына аҕалыллар эбит буоллаҕына, билигин сыл бүтүөр диэри хаһааныллар. 
Салаалар бэрэстэбиитэллэрин кытта ордук эмсэҕэлиэн сөптөөх салааларга куттал суоһаабатын уонна тыын суолталаах тэрилтэлэр харгыһа суох үлэлииллэрин курдук миэрэлэр оҥоһуллаллар. Сотору кэминэн кинилэргэ бүддьүөт кредиттэрин биэриигэ миэрэлэр бэлэм буолуохтара. 
Дойду Бэрэсидьиэнин сорудаҕынан бары регионнарга экэниэмикэни өйүүр штабтар тэриллиэхтэрэ, кинилэри регион баһылыктара салайыахтара. Саха сиригэр итинник штаб номнуо үлэлии турар. Суһал штаб быһаарыыларын ситэриилээх былаас уорганнара уонна биэдэмистибэлэр булгуччу толоруохтаахтар.